មហាបាតុកម្មនៅក្រោយរដ្ឋាភិបាលអេស្ប៉ាញប្រកាសច្បាមយកគ្រប់គ្រង តំបន់កាតាឡូញ៉ា
នាយករដ្ឋមន្រ្តីអេស្ប៉ាញ លោកម៉ារីយ៉ាណូ រ៉ាហយ នៅថ្ងៃសៅរ៍ទី២១ តុលា បានប្រកាសអនុវត្តមាត្រាទី ១៥៥នៃរដ្ឋធម្មនុញ្ញ ដែលនឹងបើកផ្លូវឲ្យរដ្ឋាភិបាលអេស្ប៉ាញ ផ្អាកព្យួរស្វ័យភាពរបស់រដ្ឋាភិបាលតំបន់កាតាឡូញ៉ា។ ដោយមិនបង្អែរបង្អង់យូរ នៅតែប៉ុន្មានម៉ោងក្រោយការប្រកាសរបស់ប្រមុខរដ្ឋាភិបាលអេស្ប៉ាញ ចលនាទាមទារឯករាជ្យឲ្យតំបន់ស្វយ័ត កាតាឡូញ៉ាបានរៀបចំមហាបាតុកម្ម ប្រឆាំងនឹងវិធានការរបស់រដ្ឋាភិបាលក្រុងម៉ាឌ្រីដ។
ចុះផ្សាយនៅថ្ងៃ៖
ស្តាប់ - ០២:១៤
ទៅតាមការអំពាវនាវរបស់សមាគមដើម្បីឯករាជ្យរបស់តំបន់កាតាឡូញ៉ា មនុស្សជាង ៤សែន ៥ម៉ឺននាក់ បានចូលរួមក្នុងក្បួនមហាបាតុកម្ម។ នេះបើតាមតួលេខផ្តល់ដោយប៉ូលិសជាតិកាតាឡូញ៉ា។ ជាមួយនឹងទង់ជាតិកាតាឡូញ៉ា ក្រុមបាតុករបានស្រែកទាមទារឲ្យដោះលែងថ្នាក់ដឹកនាំពីររូប របស់សមាគម ដែលត្រូវបានអាជ្ញាធរអេស្ប៉ាញ ចាប់ឃុំខ្លួន និងចោទប្រកាន់ពីបទបំបះបំបោរឲ្យផ្តាច់ទឹកដីនៅអេស្ប៉ាញ។
មហាបាតុកម្មនៅទីក្រុងបាសឺឡូន ធ្វើឡើងនៅតែប៉ុន្មានម៉ោងក្រោយ លោកនាយករដ្ឋមន្រ្តី អេស្ប៉ាញ ម៉ារីយ៉ាណូ រ៉ាហយ ប្រកាសអនុវត្តមាត្រាទី ១៥៥ នៃរដ្ឋធម្មនុញ្ញ។ អំណើះតទៅ រដ្ឋាភិបាលនៅតែចាំភ្លើងខៀវពីព្រឹទ្ធសភាអេស្ប៉ាញ តែប៉ុណ្ណោះ ដើម្បីផ្អាកព្យួរ ជាផ្លូវការ ស្វ័យភាពតំបន់កាតាឡូញ៉ា។
ប្រមុខដឹកនាំកាតាឡូញ៉ា លោក Carles Puigdemont មិនទទួលស្គាល់ការសម្រេចរបស់រដ្ឋាភិបាលអេស្ប៉ាញដែលលោកចាត់ទុកថា ជាការំលោភសិទ្ធិតំបន់កាតាឡូញ៉ា ដែលគេមិនធ្លាប់ ជួបប្រទះ តាំងពី របបផ្តាច់ការ Franco បានដួលរលំ នៅអេស្ប៉ាញ។ នៅក្នុងសន្ទរកថា ធ្វើឡើងក្នុងបីភាសា គឺកាតាឡូញ៉ា អេស្ប៉ាញ និងអង់គ្លេសដើម្បីសំដៅដល់សហភាពអឺរុប លោក Carles Puigdemont បានព្រមានផងដែរថា តំលៃរបស់អឺរ៉ុប កំពុងរងគ្រោះថ្នាក់ធំ។
នៅយប់ថ្ងៃសៅរ៍ម្សិលមិញ មេដឹកនាំកាតាឡូញ៉ា មិនបានប្រកាសទាមទារឯករាជ្យទេ ប៉ុន្តែ បានអំពាវនាវឲ្យមានការកោះប្រជុំជាបន្ទាន់ សភាតំបន់កាតាឡូញ៉ា ដើម្បីចាត់វិធានការ ឆ្លើយតបនឹងការរឹបអូសអំណាចពីរដ្ឋាភិបាលក្រុងម៉ាឌ្រីដ។
ទៅតាមការគ្រោងទុក រដ្ឋាភិបាលអេស្ប៉ាញ នឹងច្បាមយកអំណាច ពីរដ្ឋាភិបាលកាតាឡូញ៉ា មកគ្រប់គ្រងជាបណ្តោះអាសន្ន មុននឹងរៀបចំការបោះឆ្នោត មុនកាលកំណត់ ដើម្បី ជ្រើសរើសរដ្ឋាភិបាលថ្នាក់តំបន់ថ្មី ជំនួសរដ្ឋាភិបាលរបស់លោក Carles Puigdemont ដែលបានទាមទារឯករាជ្យ ចង់ផ្តាច់ខ្លួនពីអេស្ប៉ាញ។ ក្រៅតែពីផ្នែករដ្ឋបាល រដ្ឋាភិបាលអេស្ប៉ាញ នឹងចូលទៅគ្រប់គ្រងផងដែរ ប៉ូលិស ថ្នាក់តំបន់កាតាឡូញ៉ា បន្ទាប់ពីមេប៉ូលិសរបស់តំបន់នេះ ត្រូវបានអេស្ប៉ាញ ចាប់ខ្លួន និងចោទប្រកាន់ ពីបទ បំបះបំបោរ ដោយសារតែមិនបានទប់ស្កាត់ ការរៀបចំបោះឆ្នោតប្រជាមតិទាមទារឯករាជ្យ កាលពីថ្ងៃទី ១តុលាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ