លោកដូណាល់ ត្រាំថា គ្មានការសម្រាលទ័ណ្ឌកម្មលើរុស្ស៊ីទេ បើវិបត្តិអ៊ុយក្រែន និងស៊ីរីមិនទាន់បានដោះស្រាយ
លោកអគ្គលេខាធិការអង្គការសហប្រជាជាតិ Antonio Guterres និងលោកប្រមុខការទូតអាមេរិក Rex Tillerson បានអញ្ជើញទៅបំពេញទស្សនកិច្ចក្នុងប្រទេសអ៊ុយក្រែននាថ្ងៃអាទិត្យ ទី៩ កក្កដា។ លោក Antonio បានអំពាវនាវដល់រដ្ឋអំណាចអ៊ុយក្រែន និងក្រុមបះបោរគំាំទ្រដោយរុស្ស៊ីនៅប៉ែកខាងកើតឲ្យគោរពត្រឹមត្រូវលើបទឈប់បាញ់ដែលភាគីទាំងពីរបានចុះហត្ថលេខាចុងក្រោយ។ រីឯលោក Tillerson បានអំពាវនាវត្រង់ដល់រុស្ស៊ីឲ្យគោរពមុនគេលើបទឈប់បាញ់នោះ។ ចំណែកលោកប្រធានាធិបតីអាមេរិកដូណាល់ ត្រាំបានព្រមានត្រង់ៗថា នឹងគ្មានការសម្រាលទ័ណ្ឌកម្មលើរុស្ស៊ីទេ ប្រសិនបើស្ថានការណ៍នៅអ៊ុយក្រែន និងនៅស៊ីរីមិនទាន់បានដោះស្រាយទេនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
« យើងដឹងថា ការប្រយុទ្ធគ្នាកំពុងបន្តមាន ហើយយើងសូមអំពាវនាវឲ្យគោរពបទឈប់បាញ់ពិតប្រាកដ » នេះជាការថ្លែងរបស់លោកអគ្គលេខាធិការអង្គការសហប្រជាជាតិ Antonio Guterres នាដំណើរទស្សនកិច្ចក្នុងទឹកដីអ៊ុយក្រែន។ ចំណែកលោកប្រមុខការទូតអាមេរិក Rex Tillerson ដែលបានបំពេញទស្សនកិច្ចនៅអ៊ុយក្រែនដំណាលគ្នានឹងលោក Antonio បាននិយាយត្រង់ៗដោយមិនលាក់លៀមថា វាជារឿងចាំបាច់បំផុតដែលរុស្ស៊ីត្រូវបោះជំហានមុនគេដើម្បីរំងាប់ភាពតានតឹងនៅប៉ែកខាងកើតអ៊ុយក្រែន ពិសេសការគោរពបទឈប់បាញ់ និងការដកហូតសម្ភារៈយោធា។ លោក Tillerson បានបន្ថែមដោយស្នើរុស្ស៊ីឲ្យគោរពពាក្យសន្យារបស់ខ្លួនដូចដែលមានចែងនៅក្នុងកិច្ចព្រមព្រៀងសន្តិភាពទីក្រុង Minsk និងសុំឲ្យរុស្ស៊ីប្រើឥទ្ធិពលរបស់ខ្លួនដាក់គំនាបលើក្រុមបះបោរ។
អ្វីដែលលោក Antonio និងលោក Tillerson ចង់បានពេលនេះ គឺការគោរពបទឈប់បាញ់ចុងក្រោយដែលភាគីជម្លោះបានព្រមព្រៀងគ្នាកាលពីថ្ងៃទី២៤ មិថុនាកន្លងទៅ។ ដោយឡែក ជួនចំពេលដែលលោក ប្រមុខការទូតអាមេរិកកំពុងស្ថិតក្នុងទឹកដីអ៊ុយក្រែន លោកប្រធានាធិបតីដូណាល់ ត្រាំដែលទើបត្រឡប់ពីការចូលរួមជំនួបកំពូល G២០ ក្នុងទឹកដីអាល្លឺម៉ង់បានបញ្ចេញប្រតិកម្មសង្កត់រុស្ស៊ីបន្ថែមពីទីក្រុងវ៉ាស៊ីតោនថា ដរាបណាវិបត្តិអ៊ុយក្រែន និងស៊ីរីនៅមិនទាន់បានដោះស្រាយទេ នោះនឹងគ្មានការសម្រាលទ័ណ្ឌកម្មលើរុស្ស៊ីឡើយ។ សូមជម្រាបជូនថា លោកដូណាល់ ត្រាំបានជួបសន្ទនាផ្ទាល់ និងជាលើកទី១ជាមួយសមភាគីរុស្ស៊ីលោកពូទីននាជំនួបកំពូល G២០ តែឥស្សរជនទាំងពីរមិនបាននិយាយពីរឿងទ័ណ្ឌកម្មប្រឆាំងរុស្ស៊ីទេ។
តែនាឱកាសមានវត្តមានក្នុងទឹកដីអាល្លឺម៉ង់ លោកពូទីនឆ្លៀតបញ្ជាក់ជាថ្មីថា រុស្ស៊ីមិនបានលូកដៃជួយគាំទ្រក្រុមបះបោរនៅប៉ែកខាងកើតអ៊ុយក្រែនដូចការចោទប្រកាន់របស់បស្ចិមលោកទេ និងថា ទ័ណ្ឌកម្មដាក់លើរុស្ស៊ីមានលក្ខណៈការពារនិយមកំបាំងមុខ។ គួររម្លឹកជូនថា ជម្លោះរវាងរដ្ឋាភិបាលអ៊ុយក្រែន និងក្រុមបះបោរបានចាប់ផ្តើមក្នុងឆ្នាំ ២០១៤ ដោយបណ្តាលឲ្យស្លាប់ជនស៊ីវិល និងយោធាទាំងសងខាងជាង ១០ ០០០នាក់។ មានកិច្ចព្រមព្រៀងសន្តិភាព និងបទឈប់បាញ់ជាច្រើនត្រូវបានភាគីជម្លោះ រួមទាំងភាគីពាក់ព័ន្ធបានចុះហត្ថលេខា តែត្រូវបានរំលោភ និងមិនសូវបានគោរពឲ្យបានពេញលេញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ