អ៊ីតាលីគំរាមបិទកំពង់ផែបើគ្មានអ្នកជួយសម្រាលបន្ទុកអន្តោប្រវេសន៍
សហភាពអឺរ៉ុប បានបង្ហាញសាមគ្គីភាពជាមួយអ៊ីតាលីតែរហូតមក ក្នុងវិបត្តិអន្តោប្រវេសន៍ ប៉ុន្តែគ្មានទេដំណោះស្រាយ។ ក្នុងបរិបទបែបនេះ ក្រុងរ៉ូមអស់សេចក្តីអត់ធ្មត់បានប្រកាសគំរាមថានឹងបិទកំពង់ផែរបស់ខ្លួន ប្រសិនបើគ្មានប្រទេសណាព្រមជួយសម្រាលបន្ទុក និងគ្មានការអនុវត្តកម្មវិធីបែងចែកអន្តោប្រវេសន៍កំណត់ដោយអឺរ៉ុបទេនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
តើសហភាពអឺរ៉ុបត្រូវធ្វើដូចម្តេចទើបអាចជួយប្រទេសជាសមាជិកមួយដែលស្រែកអស់សមត្ថភាពទ្រាំលែងបានហើយ ? អ៊ីតាលីត្រូវការអ្នកជួយសម្រាលបន្ទុក ចង់ឱ្យកម្មវិធីបែងចែកអន្តោប្រវេសន៍កំណត់ដោយសហភាពអឺរ៉ុបចាប់ដំណើរការ។
តាំងពីថ្ងៃព្រហស្បតិ៍មក គណៈកម្មការអឺរ៉ុប បានសន្យាផ្តល់ជំនួយបន្ថែមថ្មីទៀត ដូចជាជំនួយហិរញ្ញវត្ថុ សម្ភារៈ និងបទបញ្ជាថ្មីនៃការទទួលសង្គ្រោះមនុស្សពីសមុទ្ទ។ កាលពីថ្ងៃសុក្រពីប្រទេសអេស្តូនី ប្រធានផ្លាស់វេនសហភាពអឺរ៉ុប លោក Jean Claude Juncker ប្រធានគណៈកម្មការអឺរ៉ុប បានរំលឹកថាអ៊ីតាលីនិងក្រិកមិនអាចនៅតែម្នាក់ឯងទេ។ លោកប្រកាសផ្តល់ថវិកា១០ពាន់លានអឺរ៉ូសម្រាប់ដោះស្រាយវិបត្តិអន្តោប្រវេសន៍ ឆ្នាំ២០១៦-២០១៧។ ឆ្មាំសមុទ្ទ៣០០នាក់ ត្រូវបានពង្រាយទៅអ៊ីតាលី និង៨០០នាក់ទៅក្រិក។ លោក Juncker ត្រៀមជាស្រេចនឹងពិចារណាថាតើធ្វើម្តេចអាចជួយសមាជិកទាំងពីរនេះថែមទៀត។
រដ្ឋមន្ត្រីក្រសួងមហាផ្ទៃអឺរ៉ុប ដែលនឹងជួបប្រជុំគ្នាក្រៅផ្លូវការ នៅចុងសប្តាហ៍ក្រោយនេះ សុទ្ធតែបានលើកឡើងអំពីភាពចាំបាច់នៃសាមគ្គីភាពជាមួយអ៊ីតាលី ប៉ុន្តែទំនងជាមិនអាចសម្រេចសេចក្តីអ្វីសំខាន់បានទេ ឧបសគ្គនៅតែមានដូចទម្លាប់។ ដើម្បីជាការត្រៀម រដ្ឋមន្ត្រីក្រសួងមហាផ្ទៃបារាំង អ៊ីតាលី អាល្លឺម៉ង់ ព្រមទាំងឧត្តមស្នងការអឺរ៉ុបត្រូវជួបពិភាក្សាគ្នានៅថ្ងៃល្ងាចអាទិត្យទី២កក្កដានេះ នៅទីក្រុងប៉ារីស។
បើមានតែពាក្យ តែគ្មានសកម្មភាព អ៊ីតាលីមានតែបិទកំពង់ផែរបស់ខ្លួន។ តើអ៊ីតាលីមានសិទ្ធិធ្វើយ៉ាងដូច្នេះដែរឬទេ ? នេះហើយជាបញ្ហា ព្រោះថាច្បាប់អឺរ៉ុប មានចែងតែលើប្រតិបត្តិការរបស់ភ្នាក់ងារព្រំដែនអឺរ៉ុប Frontexប៉ុណ្ណោះ។ ឯច្បាប់អន្តរជាតិមានចែងត្រឹមឱ្យប្រទេសជាសមាជិកសន្យាដោះស្រាយតាមសម្រួលនិងតាមការយោគយល់គ្នា។ ហើយជាចុងក្រោយបើតាមច្បាប់ចរាចរណ៍សមុទ្ទនិងអន្តោប្រវេសន៍ គេមិនអាចរុញទូកអន្តោប្រវេសន៍ទៅប្រភពដើមវិញ ដូចយ៉ាងប្រទេសលីប៊ី ដែលគ្មានលក្ខន្តិកៈជាប្រទេសមានសន្តិសុខពិតនោះបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ