នៅរុស្ស៊ី មេប្រឆាំងអំពាវនាវ ឲ្យធ្វើបាតុកម្មនៅតាមក្រុងចំនួន ១៨០ នៃប្រទេស
ថ្ងៃ១២មិថុនានេះ នៅរុស្ស៊ី ជាទិវាបុណ្យជាតិ ហើយពិតជានៅចំថ្ងៃនេះឯង ដែលមេប្រឆាំង លោក Alexei Navalny បានអំពាវនាវឲ្យប្រជាពលរដ្ឋចុះថ្នល់ទាំងពាន់ៗនាក់ ធ្វើបាតុកម្ម ប្រឆាំងអំពើពុករលួយ សំដែងមតិខ្លួន កាលដែលក្នុងឆ្នាំក្រោយ ឆ្នាំ ២០១៨ ត្រូវប្រព្រឹត្តទៅ ការបោះឆ្នោតលើកបន្តបន្ទាប់រើសប្រធានាធិបតី។ អាជ្ញាធរ បានព្រមានទៅហើយថា បើបាតុកម្មស្រាប់តែប្រព្រឹត្តទៅ ខុសពីកន្លែង ដែលអនុញ្ញាត គឺសន្មត់ថា ខុសច្បាប់ ហើយនឹងត្រូវទប់ស្កាត់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ភាពសំបើមនៃបាតុកម្មដែលគ្រោងប្រព្រឹត្តទៅ នៅតាមក្រុងចំនួនរហូតដល់១៨០ក្រុង នឹងរំលេច ឲ្យឃើញថា លោក Navalnyអាចពន្យារ ជោគជ័យកាលពីថ្ងៃ២៦មីនា ពេលដែលគាត់ចេះ ប្រមូលផ្តុំ បាតុកម្មយ៉ាងគគ្រឹកគគ្រេង ទាមទារពីលោកនាយករដ្ឋមន្ត្រី ឌ្មីទ្រី មេដវេដេវ ឲ្យចុះចេញពីតំណែង។
កាលណោះ បាតុកររាប់ពាន់នាក់ ដែលមានយុវជនយ៉ាងច្រើន បានប្រមូលផ្តុំគ្នា ក្នុងទំហំមិនធ្លាប់មានដូចទេ បើគិតតាំងពីមានផ្ទុះឡើងជារលកតវ៉ា ទល់នឹងលទ្ធផលបោះឆ្នោតសភាឆ្នាំ២០១១ និង លទ្ធផល បោះឆ្នោតប្រធានាធិបតីឆ្នាំ២០១២។ ក្នុងរលកតវ៉ានោះ អាជ្ញាធរបានឃាត់ខ្លួន បាតុករជាង១.០០០ នាក់។
កាលដែលនៅសល់មិនដល់១ឆ្នាំផង ដល់ការបោះឆ្នោតប្រធានាធិបតី ជាទីដែលលោក ពូទីន ត្រូវដណ្តើម ឲ្យបានមួយអាណត្តិថ្មីសម្រាប់៦ឆ្នាំទៀត ក្រោយពីគាត់អាងយ៉ាងលើឆាកនយោបាយអស់១៧ឆ្នាំ លោក Navalnyប្រាថ្នាកេណ្ឌការគាំទ្រ ដល់បេក្ខភាពគាត់សម្រាប់ចូលប្រឡូកក្នុងការបោះឆ្នោតនោះដែរ។
គេនៅមិនទាន់ដឹង តើវិមានក្រេមឡាំងនឹងអនុញ្ញាតឲ្យ បុរសនេះអាយុ៤១ឆ្នាំ ដែលបានជាប់ឃុំអស់១៥ថ្ងៃ ដោយមកពីបាតុកម្មថ្ងៃ២៦មីនា អាចឈរឈ្មោះជាបេក្ខជនប្រធានាធិបតីឫទេ។
មេប្រឆាំងរូបនេះតែងបរិហារអាក្រាត ការស៊ុមគ្រលុំគ្នា រវាង ពួកមន្ត្រីនៃរដ្ឋអំណាច និង ពួកមហាសេដ្ឋី Businessmen ដែលតាមយោបល់គាត់ គឺឆ្លៀតប្រើប្រព័ន្ធគ្រប់គ្រងសព្វថ្ងៃ ដើម្បីកើប ប្រាក់ និង ទ្រព្យ សម្បត្តិ ផ្ទាល់ខ្លួន។
លោក Alexei Navalnyជាប្រធាននៃ មូលនិធិប្រឆាំងអំពើពុករលួយនៅរុស្ស៊ី បានថ្លែងជាអាទ៏ ៖
-ខ្ញុំចង់រស់នៅ ក្នុងរដ្ឋប្រជាធិបតេយ្យទំនើបទាន់សម័យ ហើយខ្ញុំចង់ឲ្យពន្ធដារប្រមូលបានពីអ្នកស្រុកយើង ប្រើសម្រាប់សង់ផ្លូវ សង់សាលារៀន សង់មន្ទីរពេទ្យ មិនមែន ប្រែទៅជា នាវាកំសាន្ត ជាភូម៏គ្រឹះដូចប្រាសាទ និង ជាចំការទំពាំងបាយជូរ របស់ក្រុមបុគ្គលពុករលួយឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ