ភេរវកម្មនៅ Manchestre៖ប៉ូលិសអង់គ្លេសបន្តការស៊ើបអង្កេត និងស្នើអាមេរិកឲ្យឈប់ទម្លាយព័ត៌មាន
នៅក្នុងប្រទេសអង់គ្លេស ជាង ៤៨ម៉ោងក្រោយភេរវកម្មអត្តឃាតសម្លាប់មនុស្ស ២២នាក់ និងរបួសប្រមាណជា ៦០នាក់នៅរង្គសាលក្នុងក្រុង Manchester មក ការស៊ើបអង្កេតកំពុងបន្តធ្វើយ៉ាងសកម្ម និងចម្រើនទៅមុខគួរឲ្យកត់សម្គាល់។ ប៉ូលិសបានឃាត់ខ្លួនជនសង្ស័យជាច្រើននាក់ និងបានចូលឆែកឆេរលំនៅដ្ឋានច្រើនកន្លែងក្នុងក្រុង Manchester។ ប៉ូលិសកំពុងបន្តស៊ើបអង្កេតលើមនុស្សជំនិតរបស់ភេវជនអត្តឃាតជនជាតិអង់គ្លេសដើមកំណើតលីប៊ី។ ទន្ទឹមគ្នានេះ ប៉ូលិសក៏បានស្នើរដ្ឋអំណាចអាមេរិកឲ្យឈប់ទម្លាយព័ត៌មានដែលនាំឲ្យរំខានដល់ការស៊ើបអង្កេត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ការស៊ើបអង្កេតកំពុងបន្តយ៉ាងសកម្ម ហើយក្រុមអ្នកស៊ើបអង្កេតបានផ្តោតការស៊ើបអង្កេតលើក្រុមមនុស្សជំនិតនឹងភេរវជនអត្តឃាតឈ្មោះ សាលម៉ាន អាបេឌីជនជាតិអង់គ្លេសដើមកំណើតលីប៊ី។ ការតម្រង់លើក្រុមមនុស្សជំនិតនឹងរបស់សាលម៉ានក៏ដោយសារតែក្រុមអ្នកស៊ើបអង្កេតយល់ថា សាលម៉ានមិនអាចធ្វើសកម្មភាពតែម្នាក់ឯងបានទេ ហើយគ្រាប់បែកដ៏មានឥទ្ធិពលខ្លាំងដែលសាលម៉ានបានប្រើក៏អាបេឌីមិនអាចធ្វើដោយខ្លួនឯងដោយគ្មានជំនួយពីអ្នកផ្សេងដែរ។ មនុស្សជំនិតដែលជាផ្ទាំងស៊ីបរបស់ប៉ូលិស គឺបងប្រុស និងឱពុករបស់សាលម៉ានដែលទើបបានចាប់ខ្លួននៅក្នុងទីក្រុងទ្រីប៉ូលី ប្រទេសលីប៊ី។
បងប្រុសសាលម៉ានឈ្មោះហាសេមដែលប្រកាសសារភាពជាសមាជិករបស់អង្គការរដ្ឋអ៊ីស្លាមបានប្រាប់ភ្នាក់ងារសន្តិសុខលីប៊ីថា រូបគេបានស្ថិតក្នុងទឹកដីអង់គ្លេសនៅប៉ុន្មានថ្ងៃមុនអាបេឌីធ្វើភេរវកម្មអត្តឃាតនៅក្រុង Manchester និងបានដឹងមុនពីផែនការរបស់ប្អូនប្រុសខ្លួន។ ស្របពេលគ្នានេះ ក្រុមប៉ូលិសបន្តចាប់ខ្លួន និងបន្តធ្វើការចូលឆែរឆេរលើលំនៅដ្ឋានសន្ស័យជាច្រើននៅប៉ែកខាងជើងក្រុង Manchester។ ដោយឡែកនៅថ្ងៃព្រហស្បតិ៍ ទី២៥ ឧសភា រដ្ឋអំណាចអង់គ្លេសបានសម្តែងការសោកស្តាយលើព័ត៌មានមួយចំនួនដែលបានបែកធ្លាយនៅលើបណ្តាញសារព័ត៌មានបរទេស ពិសេសសារព័ត៌មាននៅអាមេរិក។
តាមរដ្ឋអំណាចអង់គ្លេស ការចុះផ្សាយព័ត៌មានមុនគេរបស់កាសែតអាមេរិកាំងទាក់ទងនឹងអត្តសញ្ញាណ និងប្រវត្តិរបស់ភេរវជនអត្តឃាត ឬព័ត៌មានសម្ងាត់មួយចំនួនបានធ្វើឲ្យប៉ះពាល់ដល់ដំណើរការស៊ើបអង្កេត។ នៅត្រង់ចំណុចនេះ លោករដ្ឋមន្រ្តីក្រសួងមហាផ្ទៃអង់គ្លេសបានលើកយកទៅនិយាយជាមួយសមភាគីអាមេរិក និងបានស្នើដល់បណ្តាញសារព័ត៌មានងាមេរិកឲ្យឈប់ទម្លាយព័ត៌មានខ្លះដែលរំខានដល់ការស៊ើបអង្កេត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ