អាមេរិកគ្រោងនឹងបញ្ជូនប្រព័ន្ធខែលការពារមីស៊ីល Patriot ទៅតំបន់ Baltes
អាមេរិកគ្រោងនឹងបញ្ជូនជាបណ្តោះអាសន្នប្រព័ន្ធខែលការពារមីស៊ីល ឈ្មោះ Patriot ទៅកាន់បណ្តាប្រទេសក្នុងតំបន់Baltes ដើម្បីការធ្វើសមយុទ្ធរបស់អូតង់នៅរដូវក្តៅនេះ-នេះជាការបញ្ជាក់ របស់បណ្តាអ្នកទទួលខុសត្រូវអាមេរិកទទួលបន្ទុកផ្នែកកិច្ច ការពារជាតិនៅក្រុង Vilnius ប្រទេស Lituanie ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
យោងតាមការបញ្ជាក់របស់ក្រុមអ្នកទទួលខុសត្រូវអាមេរិកទទួលបន្ទុកផ្នែកកិច្ចការពារជាតិកាលពីយប់ថ្ងៃអង្គារមុនដល់ក្រុមអ្នកកាសែត- គម្រោងដាក់ពង្រាយប្រព័ន្ធខែលការពារមីស៊ីលរបស់អាមេរិកឈ្មោះ Patriot នៅក្នុងបណ្តាប្រទេសតំបន់ Baltes នឹង ត្រូវអន្តរាគមន៍នៅក្នុងក្របខណ្ឌសមយុទ្ធពហុជាតិរបស់អង្គការអូតង់ក៏ព្រមទាំងនៅក្នុងបរិបថនៃភាពតានតឹងជាមួយនឹងរុស្ស៊ី។
រុស្ស៊ី ក៏មានកម្មវិធីសមយុទ្ធដ៏សំខាន់របស់ខ្លួនដែរនៅខែកញ្ញាខាងមុខនៅប្រទេស Belarus និងនៅKaliningrad ទឹកដីមួយដុំរបស់រុស្សីនៅតំបន់ Baltes ដែលស្ថិតនៅចន្លោះប្រទេសLituanie និងPologne។
សមយុទ្ធរបស់រុស្ស៊ីដែលប្រសិទ្ធិនាមក្រោមឈ្មោះថា”Zapad ក៏ជាឱកាសមួយសម្រាប់រុស្ស៊ីដែរ ក្នុងការដាក់បង្ហាញជូនសម្ភារៈយោធាថ្មីៗរបស់រុស្ស៊ី ក៏ព្រមទាំងការធ្វើទំនើបកម្មនៅលើសម្ភារៈយោធាដែលមានស្រាប់ហើយនៅក្នុងតំបន់យោធាប៉ែកខាងលិចរុស្ស៊ី។
គួររំលឹកថា កាលពីឆ្នាំទៅមិញ ទីក្រុងមូស្គូ បានដាក់ពង្រាយមីស៊ីល Iskander នៅក្នុងតំបន់ Kaliningrad។ គឺជាមីស៊ីល ដែលអាចដឹកក្បាលគ្រាប់នុយក្លេអ៊ែរ ។ ការដាក់ពង្រាយមីស៊ីលធុននេះហើយ ដែលបានជំរុញឲ្យបណ្តាប្រទេសជិតខាងនៅក្នុងតំបន់និងអង្គការអូតង់ មានការខឹងក្រេវក្រោធ។
នៅ Lituanie កាលពីយប់ថ្ងៃពុធម្សិលមិញ លោក Jim Mattis បានជួបប្រាស្រ័យជាមួយពលទាហានមួយកងវរសេនាតូចចម្រុះជាតិសាសន៍ដែលស្ថិតនៅក្រោមបញ្ជាការរបស់អាល្លឺម៉ង់។ នៅឱកាសនោះ រដ្ឋមន្ត្រីការពារជាតិអាមេរិក បានចាត់ទុកថា ការដែលរុស្ស៊ី ដាក់ពង្រាយមីស៊ីលធុន Iskanderនៅក្នុងតំបន់ Kaliningrad គឺជាកត្តាមួយដែលធ្វើឲ្យអស្ថិរភាពនៅក្នុងតំបន់។
គួររំលឹកថា ដំណើរទស្សនកិច្ចរបស់រដ្ឋមន្ត្រីការពារជាតិអាមេរិកនៅប្រទេសLituanie គឺជាដំណើរទស្សនកិច្ចលើកទីមួយដែររបស់លោកនៅអឺរ៉ុបខាងកើតចាប់តាំងពីលោកបានឡើងកាន់មុខតំណែងជារដ្ឋមន្ត្រីក្រសូងការពារជាតិអាមេរិក។ ម្យ៉ាងទៀត នៅក្នុងជំនួបប្រាស្រ័យរវាងរដ្ឋមន្ត្រីការពារជាតិអាមេរិកនិងប្រធានាធិបតី Lituanie លោក Grybauskaite ឥស្សរជននយោបាយទាំងពីរប្រទេស បានធ្វើការរិះគន់យ៉ាងត្រង់ៗទៅលើនយោបាយរបស់លោកប្រធានាធិបតីរុស្ស៊ីពូទីននៅក្នុងតំបន់ Baltes៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ