រុស្ស៊ីអំពាវនាវពិភពលោកឲ្យរួបរួមគ្នាប្រឆាំង”ភេរវនិយម”
លោកប្រធានាធិបតីរុស្ស៊ីវ្លាឌីមៀរ ពូទីនថ្ងៃអង្គារ ៩ ឧសភាដោយថ្លែងសុន្ទរកថាពីលើវេទិកាទីលានក្រហមក្នុងឱកាសប្រារព្ធខួប ៧២ ឆ្នាំនៃជ័យជំនះលើរបបណាស៊ីអាល្លឺម៉ង់ខណ្ឌបញ្ចប់សង្គ្រាមលោកលើកទី២ បានអំពាវនាវពិភពលោកឲ្យរួបរួមគ្នាដើម្បីប្រយុទ្ធទល់នឹងរាល់ការគម្រាម ជា បឋម គឺទល់នឹង” ភេរវនិយម “ហើយគាត់បានអះអាងថាប្រទេសរុស្ស៊ីអាចកំចាត់ឲ្យធ្លាក់ក្នុងបរាជ័យគឺពួកឈ្លានពានណាក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ថ្ងៃ៩ឧសភាប្រទេសរុស្ស៊ី បានទទួលអំណរអបអរទិវាមហាជ័យជំនះក្នុងឆ្នាំ ១៩៤៥ លើ់ប្រទេសអាល្លឺម៉ង់ក្រោមរបបណាស៊ីហ៊ីត្លែរ ទៅដោយព្យុហយាត្រាយ៉ាងគគ្រឹកគគ្រេងលើទីលានក្រហមចូលរួមដោយយោធាដល់ទៅ ១០.០០០ នាក់តំណាងឲ្យកងទ័ពគ្រប់ប្រភេទនិងយានយន្តចម្បាំងសរុបទៅ ១១៤ គ្រឿងប៉ុន្តែដោយមកពីធាតុអាកាសមិនអនុគ្រោះការហោះបញ្ចេញរាងដែលមានគ្រោងទុកនៃយន្តហោះនិងឧទ្ធម្ភាគចក្រយោធា៧២គ្រឿងត្រូវបានលុបទៅវិញ។
ថ្លែងសុន្ទរកថាបើកក្បួនព្យុហយាត្រានេះ លោកប្រធានាធិបតីរុស្ស៊ី វ្លាឌីមៀរ ពូទីន ដែលជាអគ្គមេបញ្ជាការជាន់ខ្ពស់បំផុតនៃកងទ័ពបានលើកឡើងជាអាទិ៍ ៖
-មេរៀននៃសង្គ្រាម តម្រូវឲ្យយើងស្ថិតក្នុងភាពប្រុងប្រយ័ត្នជានិច្ចហើយកងកម្លាំងប្រដាប់អាវុធរុស្ស៊ី អាចច្រានឲ្យខ្ទាតទៅអំពើឈ្លានពានជាយថាហេតុ។ ស្ថានការណ៍បច្ចុប្បន្នចងជាកាតព្វកិច្ចលើយើងឲ្យបង្កើនសមត្ថភាពការពារសម្រាប់ប្រយុទ្ធយ៉ាងស័ក្តិសិទ្ធិទល់នឹងពួកភេរវជនពួកជ្រុលនិយមពួកណាស៊ីបែបថ្មីនិងទល់នឹងការគម្រាមឯទៀតដូច្នេះចាំបាច់ត្រូវឲ្យសហគមន៍អន្តរជាតិទាំងមូលស្រាក់កម្លាំងគ្នា។ រុស្ស៊ីបើកចំហសម្រាប់សហប្រតិបត្តិការបែបនេះ។ ម៉ូស្គូស្ថិតនៅជានិច្ចនៅខាងកម្លាំងសន្តិភាពនិយមនិងនៅខាងរាល់នរណាដែលជ្រើសយកផ្លូវតាំងភាពជាដៃគូស្មើសិទ្ធិគ្នា។
ជាការកត់សម្គាល់៖សហភាពសូវៀតដែលមានរុស្ស៊ីជាប្រទេសបន្តកេរ្តិ៍ បានបាត់បង់ពលរដ្ឋដល់ទៅជិត២៧ លាននាក់ក្នុងមហាសង្គ្រាមការពារមាតុភូមិ៍ដែលបានពន្យារទៅអស់ ១៤១៨ថ្ងៃ។ ម៉្លោះហើយបានជា ជ័យជំនះនេះក្នុងឆ្នាំ ១៩៤៥ ត្រូវបានរដ្ឋលើកដល់កំពស់ជាទេវស្ថាបនិកស្មារតីស្នេហាជាតិនិងភាពមហិមានៃប្រជាជាតិរុស្ស៊ី។
លោកប្រមុខរដ្ឋរុស្ស៊ីក៏បានរំលឹកថា ៖ -“សោកនាដកម្មសែនរន្ធត់នេះមិនអាចត្រូវបញ្ចៀសបានដូចចិត្តគឺមកពីមានការបណ្តោយឲ្យលេចចេញមកជាមនោគមន៍វិជ្ជាឧក្រិដ្ឋលើកពូជសាសន៍មួយឲ្យខ្ពស់ជាងពូជសាសន៍ដ៏ទៃនិងមកពីការបែកបាក់គ្នារវាងពូកប្រទេសនាំមុខគេ”។ យើងនឹងពុំភ្លេចសោះឡើយថា សេរីភាពទ្វីបអឺរ៉ុបសន្តិភាពយូរអង្វែងលើផែនដីដណ្តើមបានគឺពិតជាដោយសារឪពុកជីតា ជីទួតយើង។
លោកពូទីនបញ្ចប់សេចក្តីថា”គ្មានហើយនឹងពុំមានទេកម្លាំងដែលអាចដាក់រុស្ស៊ីឲ្យនៅក្រោមទាសភាព”។
ប្រជាជនរុស្ស៊ីបាននិងបន្តឈរការពារទឹកដីកំណើតខ្លួនលុះរហូតដល់តំណក់ឈាមចុងក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ