សមាជិកអឺរ៉ុបទាំង២៧ព្រមព្រៀងជាធ្លុងមួយយុទ្ធសាស្ត្រចរចាលះលែងអង់គ្លេស
ប្រមុខដឹកនាំប្រទេសជាសមាជិកសហភាពអឺរ៉ុបទាំង២៧ ដែលកំពុងបើកជំនួបកំពូលវិសាមញ្ញ នៅទីក្រុងព្រុចសែលប្រទេសប៊ែលហ្សិក ស្តីពីដំណើរសុំចាកចេញពីអឺរ៉ុបរបស់អង់គ្លេស បានអនុម័តជាឯកច្ឆន្ទ នៅថ្ងៃសៅរ៍នេះ គោលការណ៍សំខាន់ៗ សម្រាប់យកទៅចរចាជាមួយអង់គ្លេស។ ជាការព្រមព្រៀងដែលបញ្ជាក់ថាអឺរ៉ុបក៏ចេះរួបរួមគ្នាដែរ ដើម្បីការពារប្រយោជន៍រួម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
មានប្រធានបទជាច្រើនដែលសមាជិកសហភាពអឺរ៉ុបតែងខ្វែងគំនិតគ្នា ប៉ុន្តែនៅចំពោះមុខវិបត្តិអង់គ្លេសចង់ដើរចេញពីអឺរ៉ុប សមាជិកទាំង២៧ បានសម្តែងការព្រមព្រៀងគ្នាជាឯកច្ឆន្ទ អនុម័តយុទ្ធសាស្ត្ររួម ដែលទិសដៅគោលសម្រាប់យកទៅចរចាដាក់គំនាបលើអង់គ្លេស។
ផែនការចរចាBrexit ត្រូវបានត្រៀមរៀបំជាស្រេចហើយ ! នេះបើតាមប្រសាសន៍របស់ប្រធានគណៈកម្មការអឺរ៉ុប លោក ដូណាល់ ទូស្ក ដែលបានគូសបញ្ជាក់អំពីភាពចាំបាច់ដែលប្រទេសជាសមាជិកទាំងអស់ ត្រូវរួបរួមគ្នា ជានិច្ច រយៈពេលពីរឆ្នាំ រហូតដល់មានការព្រមព្រៀងដកអង់គ្លេសឱ្យផុតពីអឺរ៉ុប។
គោលការណ៍នៃការចរចា ត្រូវផ្តោតជាអាទិភាពដំបូងទៅលើ ការការពារសិទ្ធិពលរដ្ឋអឺរ៉ុបដែលរស់នៅនិងធ្វើការនៅអង់គ្លេស (បីលាននាក់) ជាថ្នូរនឹងផ្តល់សិទ្ធិឱ្យពលរដ្ឋអង់គ្លេសអាចរស់នៅនិងធ្វើការក្នុងអឺរ៉ុប។ អង់គ្លេសចង់លែងលះពីអឺរ៉ុប ដូច្នេះត្រូវតែគិតគូរចែកទ្រព្យសម្បត្តិ ក្នុងកញ្ចប់ថវិកាសហគមន៍ ដែលបើតាមការបូកដកគុណចែកទៅអង់គ្លេសត្រូវសងអឺរ៉ុប ក្នុងទំហំប្រមាណ៦០ពាន់លានអឺរ៉ូ។ ចំណុចទីបីគឺបញ្ហា អៀរឡង់ខាងជើង ! អឺរ៉ុបមិនត្រូវការចង់ឃើញខេត្តអៀរឡង់ខាងជើងត្រូវពុះចែកព្រំដែនជាមួយអង់គ្លេសទេ។ នាយករដ្ឋមន្ត្រីអៀរឡង់ អាចសុំចរចាជាមួយដៃគូ២៦ប្រទេសដើម្បីអៀរឡង់ខាងជើងបានចូលជាសមាជិកអឺរ៉ុបដោយស្វ័យប្រវត្តិ បើកាលណាកោះនេះរួបរួមគ្នាតែមួយ។
នៅពេលចរចាបីចំណុចនេះសម្រេចហើយ ទើបអឺរ៉ុបចាប់ផ្តើមចរចាអំពីទំនាក់ទំនងអនាគត រវាងអង់គ្លេសនិងអឺរ៉ុប។ សមាជិកសហភាពអឺរ៉ុបទាំង២៧ ក៏នឹងចាប់ផ្តើមពិនិត្យរើភ្នាក់ងារពីរ គឺធនាគារ និងភ្នាក់ងារឱសថអឺរ៉ុបដែលបច្ចុប្បន្នមានទីស្នាក់ការនៅអង់គ្លេស ផ្ទេរទៅកាន់ទីតាំងផ្សេងក្នុងអឺរ៉ុបវិញ។ ការចរចាអាចនឹងចាប់ផ្តើមក្រោយអង់គ្លេសបោះឆ្នោតសភាថ្ងៃទី៨មិថុនារួច។
ការរួមគ្នាជាធ្លុងមួយ ទៅចរចា នឹងបម្រើឱ្យផលប្រយោជន៍អឺរ៉ុបគ្រប់គ្នា ! នេះជាទស្សនៈអន្តរការីអឺរ៉ុបទទួលបន្ទុកចរចាជាមួយអង់គ្លេស។ អឺរ៉ុបត្រូវតែចេះការពារប្រយោជន៍ខ្លួនឯង ! អង់គ្លេសត្រូវបង់ខាតអំពីការដើរចេញនេះ ! នេះជាការរំលឹករបស់ប្រធានាធិបតីបារាំងហ្វ្រង់ស័រ ហូឡង់ បន្ថែមពីពាក្យព្រមានរបស់លោកស្រីប្រមុខដឹកនាំអាល្លឺម៉ង់ទៅកាន់អ្នកទទួលខុសត្រូវនយោបាយអង់គ្លេស។ នាយករដ្ឋមន្ត្រីអង់គ្លេសយល់ថា សហភាពអឺរ៉ុបពួតគ្នាប្រឆាំងនឹងប្រទេសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ