បារាំង ៖ ការបោះឆ្នោតប្រធានាធិបតីជុំទីមួយចាប់ផ្តើម តែអ្នកមិនទាន់សម្រេចចិត្តនៅមានច្រើន
ការបោះឆ្នោតប្រធានាធិបតីបារាំងជុំទីមួយ បានចាប់ផ្តើមជាបណ្តើរៗហើយ តាំងពីរសៀលថ្ងៃសៅរ៍ទី ២២មេសាមក សម្រាប់ពលរដ្ឋបារាំងនៅបរទេស និងតំបន់ឯនាយសមុទ្ទ។ សម្រាប់អ្នករស់នៅក្នុងប្រទេសបារាំងវិញ ការបោះឆ្នោតដែលស្ថិតក្រោម ការការពារសន្តិសុខយ៉ាងតឹងតែងបំផុត នឹងចាប់ផ្តើមនៅថ្ងៃអាទិត្យ ទី២៣ មេសា វេលាម៉ោង៨ព្រឹក (ត្រូវនឹងម៉ោង១រសៀលម៉ោងនៅប្រទេសកម្ពុជា) តែពលរដ្ឋដ៏ច្រើននៅមិនទាន់ធ្វើការសម្រេចចិត្តទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ការិយាល័យបោះឆ្នោតនៅតំបន់ឯនាយសមុទ្ទបានចាប់ផ្តើមហើយ ! ពលរដ្ឋបារាំងនៅតំបន់ហ្គូយ៉ាន ដែលមានចលនាបាតុកម្មអូសបន្លាយអស់ពេលជាងមួយខែ ទើបចរចាត្រូវរ៉ូវចុះកិច្ចព្រមព្រៀងជាមួយរដ្ឋាភិបាលកាលពីថ្ងៃសុក្រ ក៏បានចាប់ទៅបោះឆ្នោតដែរ។
នៅក្នុងប្រទេស ការិយាល័យទាំង៦៦៥៤៦ នឹងត្រូវបើកនៅថ្ងៃអាទិត្យវេលាម៉ោង ៨ព្រឹករហូតដល់ម៉ោង៧ល្ងាច និង៨ល្ងាចសម្រាប់រដ្ឋធានីនិងក្រុងធំៗមានប្រជាជនរស់នៅច្រើន។ ជាការបោះឆ្នោតដែលប្រព្រឹត្តទៅក្រោមការការពារ និងរឹតបន្តឹងសន្តិសុខបំផុត បន្ថែមទៀត ក្រោយពីមានហេតុការណ៍វាយប្រហារភេរវកម្មសម្លាប់ជីវិតប៉ូលិសម្នាក់និងរបួសបីនាក់ នៅលើដងវិថីស្ហង់ស៍អេលីហ្សេមក។ រដ្ឋាភិបាលបានប្រមូលកម្លាំងនគរបាល ភ្នាក់ងាររក្សាសន្តិសុខជាង ៥ម៉ឺននាក់ បន្ថែមពីកងកម្លាំងយោធា៧ពាន់នាក់ដែលមានស្រាប់។
នេះជាលើកទីមួយហើយដែលបារាំងរៀបចំការបោះឆ្នោតប្រធានាធិបតី ក្នុងស្ថានភាពប្រទេសក្នុងភាពអាសន្ន។ ការបោះឆ្នោតប្រធានាធិបតីជាសកល លើកនេះ ក៏មានបង្កប់ទៅដោយលក្ខណៈពិសេសមិនធ្លាប់មាន ជាច្រើនចំណុចផ្សេងទៀត ដូចជាប្រធានាធិបតីផុតអាណត្តិគ្មានវត្តមានក្នុងការប្រកួតប្រជែងឆ្នោត !
បេក្ខជនប្រធានាធិបតីមាន១១រូប ក្នុងនោះបួននាក់កំពុងប្រកួតប្រដេញគ្នាយ៉ាងកិតៗ ប្រជាពលរដ្ឋជាម្ចាស់ឆ្នោត មួយចំនួនធំ កំពុងប្រឈមនឹងជម្រើសដ៏លំបាកបំផុត ក្នុងការបោះឆ្នោតនៅជុំទីមួយថ្ងៃទី២៣មេសានេះ។ បើតាមការស្ទង់មតិពីរថ្ងៃមុនការបោះឆ្នោត ប្រជាពលរដ្ឋបីនាក់ក្នុងចំណោម១០នាក់ មិនដឹងថាត្រូវបោះឆ្នោតគាំទ្របេក្ខជនណាទេ។ ពុំដែលមានការបោះឆ្នោតប្រធានាធិបតីណាដែលពលរដ្ឋពិបាកសម្រេចចិត្តយ៉ាងដូច្នេះឡើយ។ ជាងនេះទៅទៀត ចំនួនអ្នកអវត្តមានមិនទៅបោះឆ្នោត និងការបោះឆ្នោតអនុប្បវាទ បានក្លាយជាសញ្ញាសួរដ៏ធំមួយដែលគ្មានចម្លើយនិងពិបាកស្មានបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ