មេប្រឆាំងអំពើពុករលួយនៅរុស្ស៊ីត្រូវបានចាប់ខ្លួន
នារសៀលម្សិលមិញ ក្នុងបាតុកម្មនៅរដ្ឋធានីមូស្គូ ក្រោមពាក្យស្លោក ប្រឆាំងអំពើ ពុករលួយនៅរុស្ស៊ី ដែលជាបាតុកម្ម គ្មានសេចក្តីអនុញ្ញាតរបស់អាជ្ញាធរឯណា តាមតួលេខ មហាផ្ទៃមូស្គូផ្ទាល់ មានមនុស្សចូលរួមជាង ៨.០០០នាក់ ដែលពីក្នុងនោះ ត្រូវបានប៉ូលិសចាប់ ខ្លួន គឺ ប្រមាណ៥០០នាក់ បូកទាំងមេដឹកនាំ អង្គការក្រៅរដ្ឋាភិបាល ក្រោមឈ្មោះថា មូលនិធិ ប្រឆាំងអំពើពុករលួយនៅរុស្ស៊ី គឺលោក Alexei Navalny ល្បីខាងកកូរកកាយ ទ្រព្យសម្បត្តិ ពួក មន្ត្រីដែលជំនិតៗ នឹងលោក ប្រធានាធិបតីពូទីន។ ការទាមទារមួយ ដែលពួកគេបានបន្លឺឡើង គឺ ឲ្យលោកនាយករដ្ឋមន្ត្រី មេដវេដេវ លាចេញពីតំណែង។
ចុះផ្សាយនៅថ្ងៃ៖
ស្តាប់ - ០២:១៩
ស្របនឹងការអំពាវនាវនៃមេប្រឆាំងនេះ បាតុកម្មត្រូវចាប់ផ្តើមនៅម៉ោង២រសៀល នៅ ចំកណ្តាលក្រុងមូស្គូតែម្តង គឺនៅតាមមហាវិថីដែលបែកចេញពីវិមានក្រេមឡាំង។ ប៉ុន្តែ ក្រោយ ពីបាតុករបានជួបជុំគ្នា លើទីលាននៃរូបសំណាកឧទ្ទិសដល់មហាកវីរុស្ស៊ី Pouchkine ស្ថិតនៅ ដងមហាវិថីនោះ ហើយគ្រាន់តែគេប្រុងលាផ្ទាំងបដាបរិហារអំពើពុករលួយ
រដ្ឋអំណាចសព្វថ្ងៃ ប៉ូលិស ក៏អន្តរាគមន៍ភ្លាមភ្លែត ចាប់រុញបញ្ចូលបាតុករណាដែលដៃដល់ ទៅក្នុងឡានទ្រុង បម្រុង ទុកជាស្រេច។
ចំណែករូបលោក Navalny គ្រាន់តែដើរចេញពីមេត្រូ មិនទាន់បានភ្ជាប់ខ្លួន ជាមួយគ្នីគ្នា
គាត់ផង ក៏ត្រូវប៉ូលិសក្រៀកចូលឡានទ្រុងដែរ។ ម៉្លោះហើយបានជាចំនួនបាតុករ ឃាត់ខ្លួន ឡើងដល់ កន្លះពាន់នាក់យ៉ាងនេះ។ លោក Navalny ជាប់ចោទក្នុងការបំពានលើ
សណ្តាប់ធ្នាប់ខាង ចាត់ចែង និង ដឹកនាំ បាតុកម្ម។
ទោះយ៉ាងណាក្តី ក៏ពួកបាតុករបានបន្លឺទៅហើយនូវសម្រែកស្រុះៗគ្នាបែបយ៉ាង៖ប្រទេសរុស្ស៊ីមិនបាច់មានពូទីនទេមេដវេដេវត្រូវតែចុះចេញពីតំណែងទៅប្រទេសរុស្ស៊ីត្រូវការសេរីភាពអំណាចដែលគួរឲ្យអាម៉ាស់ !។ បាតុកម្មប្រឆាំងអំពើពុករលួយនោះ ធ្វើឡើង រំលង១ខែក្រោយ ពីមូលនិធិប្រឆាំងអំពើពុករលួយ ដឹកនាំដោយលោក Navalny បានផ្សព្វផ្សាយវីដេអូ អះអាងថា លោកនាយករដ្ឋមន្ត្រីរុស្ស៊ី ឌ្មីទ្រី មេដវេដេវ មានកម្មសិទ្ធិ ក្នុងទម្រង់ជាអចលនទ្រព្យ តម្លៃរាប់ពាន់លានដុល្លារ ដោយលាក់នៅពី ក្រោយឈ្មោះអ្នកផ្សេងសោះ ហើយដែលរួមក្តោបភូមិគ្រឹះ អគារស្កឹមស្កៃ នាវាកំសាន្ត រហូតដល់ ចំការទំពាំងបាយជូរនៅ អ៊ីតាលីផង។
មេបក្សកុម្មុយនិស្តជាបក្សប្រឆាំងដ៏ធំនៅរុស្ស៊ី ទាមទារឲ្យ បើកការស៊ើបអង្កេត ជាពិសេស វីដេអូនេះ ត្រូវបានមើលតាមបណ្តាញ YouTube ដោយមនុស្ស ជាង១១លាននាក់ទៅហើយ។ ប៉ុន្តែអ្នកនាំពាក្យរដ្ឋាភិបាលរុស្ស៊ី លោកស្រី Natalia Timakova ថ្លែងថា គាត់មិនធ្វើអត្ថាធិប្បាយឲ្យថោកមាត់ឡើយអំពីវីដេអូប្រឌិតក្នុងន័យឃោសនាបែបនេះ ដោយ ជនដែលត្រូវបានតុលារកាត់ទោសទៅហើយ ខំលើកខ្លួនឯង ជាបេក្ខជនប្រធានាធិបតី ចូលប្រឡូក ក្នុងការបោះឆ្នោតឆ្នាំក្រោយ។ ក្រៅពីរដ្ឋធានីមូស្គូ បាតុកម្មប្រឆាំងអំពើពុករលួយ ក៏បានប្រព្រឹត្តទៅនៅតាមក្រុងរុស្ស៊ី ចំនួន ២៥ ទៀតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ