លោកហ្រ្វង់ស័រ ហូឡង់៖មានតែការរួមកម្លាំងគ្នាទេ ទើបអឺរ៉ុបខ្លាំងដើម្បីប្រឈមទប់នឹងបញ្ហាក្នុងលោក
ជំនួបកំពូលអឺរ៉ុបដើម្បីប្រារព្ធខួបគម្រប់ ៦០ឆ្នាំនៃសន្ធិសញ្ញាទីក្រុងរ៉ូមបានបិទបញ្ចប់នៅរសៀលថ្ងៃសៅរ៍ ទី២៥ មីនា។ នាឱកាសនោះ ជំនួបកំពូលបានចេញផ្សាយសេចក្តីថ្លែងការណ៍រួមមួយដែលអឺរ៉ុបបានបញ្ជាក់ជាថ្មីម្តងទៀតពីការប្តេជ្ញាចិត្តកសាងអនាគតរួមគ្នា។ លោកប្រធានាធិបតីបារាំងហ្រ្វង់ស័រ ហូឡង់បានថ្លែងថា មានតែការរួបរួមកម្លាំងតែមួយទេទើបអឺរ៉ុបខ្លាំងដើម្បីប្រឈមទប់នឹងរាល់បញ្ហាដែលកំពុងកើតមាននៅក្នុងលោក។
ចុះផ្សាយនៅថ្ងៃ៖
ស្តាប់ - ០១:៣៦
« ពិធីប្រារព្ធខួប ៦០ឆ្នាំនៃសន្ធិសញ្ញាទីក្រុងរ៉ូមពេលនេះមានបង្កប់ដោយអត្ថន័យពិសេសមួយធៀបនឹងបញ្ហាប្រឈម និងការគំរាមកំហែងមួយចំនួនដែលកំពុងស្ថិតនៅពីមុខយើង។ តើយើងខ្លាំងដោយសារតែយើងរួបរួមគ្នាជាធ្លុងមួយ ជាកម្លាំងតែមួយ ឬមួយក៏យើងខ្លាំងដោយសារតែយើងបែកបាក់គ្នា?។
ចម្លើយចំពោះសំណួរខាងលើត្រូវបានសម្តែងឡើងតាមរយៈការជួបជុំគ្នាពេលនេះដែលបញ្ជាក់ថា យើងនឹងខ្លាំងក្នុងពេលរួមកម្លាំងគ្នាដើម្បីប្រឈមទប់នឹងអំពើភេរវកម្ម ដើម្បីទប់ទល់នឹងជម្លោះប្រដាប់អាវុធដែលកំពុងស្ថិតនៅជុំវិញខ្លួន។ យើងនឹងខ្លាំងក្នុងពេលរួមកម្លាំងគ្នាដើម្បីធ្វើយ៉ាងណាឲ្យភពផែនដីរបស់យើងអាចទទួលបានការការពារ។ យើងនឹងខ្លាំងក្នុងពេលរួមកម្លាំងគ្នាដើម្បីប្រឆាំងទប់នឹងការវិលត្រឡប់របស់អាណាចក្រ និងគំនាបពីខាងក្រៅ។
យើងនឹងខ្លាំងក្នុងពេលរួមកម្លាំងគ្នាដើម្បីប្រឈមទប់នឹងគំនិតជាតិនិយម និងគំនិតជ្រុលនិយម។ ថ្ងៃនេះ ពលរដ្ឋបារាំងត្រូវតែដឹងថាជាមួយអឺរ៉ុប ពួកគេអាចនឹងរឹងមាំ មានអនាគតល្អ និងទទួលបានការយកចិត្តយ៉ាងខ្លាំង។ គឺនៅក្នុងន័យនេះហើយបានជាខ្ញុំចង់ឲ្យបារាំងចូលរួមគាំទ្រពេញទំហឹងលើសេចក្តីថ្លែងការណ៍នេះ ព្រោះជាសេចក្តីថ្លែងការណ៍ដែលបារាំងបានរង់ចាំយ៉ាងខ្លាំង រួមទាំងបារាំងជាមួយថ្នាក់ដឹកនាំថ្មីផងដែរ។ ខ្ញុំចង់និយាយដល់ការបោះឆ្នោតនាពេលខាងមុខ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ