ដើម្បីតម្លាភាព បារាំងលាតត្រដាងទ្រព្យសម្បត្តិបេក្ខជនប្រធានាធិបតីជាសាធារណៈ
ជាលើកទីមួយសម្រាប់ប្រទេសបារាំង ដែលសេចក្តីប្រកាសទ្រព្យសម្បត្តិរបស់បេក្ខជនប្រធានាធិបតី ត្រូវលាតត្រដាងជាសាធារណៈ។ នៅថ្ងៃពុធទី ២២មីនា នេះ អាជ្ញាធរជាន់ខ្ពស់ដើម្បីតម្លាភាពជីវិតសាធារណៈ HATVP បានសម្រេចផ្សព្វផ្សាយ ក្នុងទំព័រវិបសៃត៍របស់ខ្លួន សេចក្តីប្រកាសទ្រព្យសម្បត្តិរបស់បេក្ខជនប្រធានាធិបតី ប៉ុន្តែអាជ្ញាធរមិនធ្វើការផ្ទៀងផ្ទាត់ទេ។
ចុះផ្សាយនៅថ្ងៃ៖ កែប្រែថ្ងៃទី៖
ចាប់ពីម៉ោង ៦ល្ងាចថ្ងៃទី ២២មីនានេះទៅ ប្រសិនបើលោកអ្នកចង់ដឹងអំពីទ្រព្យសម្បត្តិរបស់បេក្ខជនប្រធានាធិបតីបារាំង សូមចូលទៅក្នុងវិបសៃត៍របស់អាជ្ញាធរ http://www.hatvp.fr។ នេះបើតាមការជូនដំណឹងរបស់អាជ្ញាធរជាន់ខ្ពស់ ដើម្បីតម្លាភាព ដែលជាអាជ្ញាធរឯករាជ្យ បង្កើតឡើងដោយនៅឆ្នាំ២០១៣។
សេចក្តីប្រកាសទ្រព្យសម្បត្តិ ដែលមានរៀបរាប់ អំពី អចលនទ្រព្យ សម្បត្តិតម្លៃលើសពីមួយម៉ឺនអឺរ៉ូ រថយន្ត គណនីធនាគារ ព្រមទាំងភាគហ៊ុនឬចំណែកទុននៅក្នុងក្រុមហ៊ុនសហគ្រាស និងបំណុលជាយថាហេតុ អមដោយលិខិតបញ្ជាក់ថាជាព័ត៌មានពិត បានក្លាយជាលក្ខខណ្ឌចាំបាច់មួយ មុននឹងអាចឈរឈ្មោះជាបេក្ខជនប្រធានាធិបតីបាន។
តាមការពិត ការប្រកាសទ្រព្យសម្បត្តិមិនមែនលក្ខខណ្ឌថ្មីថ្មោង ដែលបេក្ខជនប្រធានាធិបតីបារាំង ត្រូវរាយការណ៍ជូនក្រុមប្រឹក្សាធម្មនុញ្ញ ទន្ទឹមនឹងលក្ខខណ្ឌមួយចំនួនផ្សេងទៀតទេ ប៉ុន្តែលើកនេះ ជាលើកទីមួយ ដែលក្រុមប្រឹក្សាធម្មនុញ្ញ បានព្រមព្រៀងផ្ទេរសេចក្តីប្រកាសព័ត៌មានឱ្យអាជ្ញាធរជាន់ខ្ពស់ដើម្បីតម្លាភាពជាអ្នកធ្វើការផ្សព្វផ្សាយ ជាសាធារណៈ លើប្រព័ន្ធអ៊ីនធ័រនែត តែមិនមែនជាការត្រួតពិនិត្យឡើយ។ អាជ្ញាធរជាន់ខ្ពស់ដើម្បីតម្លាភាព គ្មានសិទ្ធិធ្វើការ ត្រួតពិនិត្យ ដើម្បីផ្ទៀងផ្ទាត់ទេ ព្រោះក្រុមប្រឹក្សាធម្មនុញ្ញមិនចង់ឃើញអាជ្ញាធរឯករាជ្យមួយនេះ លូកលាន់ប៉ះពាល់ដល់យុទ្ធនាការបោះឆ្នោត និងធ្វើឱ្យមានមិនស្មើគ្នាកើតឡើង។
ប៉ុន្តែ នៅក្នុងចំណោមបេក្ខជនប្រធានាធិបតីទាំង១១រូប មាន៧រូបធ្លាប់ត្រូវបានអាជ្ញាធរត្រួតពិនិត្យរួចហើយ ក្នុងមានជាតំណាងរាស្ត្រ។ មានតែបេក្ខជនបក្សតូចៗបួននាក់ប៉ុណ្ណោះដែលត្រូវឆ្លងកាត់លំហាត់ថ្មីនេះ។ បេក្ខជនហ្វ្រង់ស័រ ហ្វីយ៉ុង ដែលជាប់រឿងអាស្រូវកេងលុយរដ្ឋ ទើបបង្ខំចិត្តធ្វើសេចក្តីប្រកាសទ្រព្យសម្បត្តិ ជាសាធារណៈ កាលពីខែកុម្ភៈ។
ឯកសារប្រកាសទ្រព្យសម្បត្តិ របស់បេក្ខជនទាំង១១រូប នឹងមានផ្សាយក្នុងវិបសៃត៍របស់អាជ្ញាធរ ចាប់ពីល្ងាចនេះ រហូតដល់ថ្ងៃប្រកាសលទ្ធផលបោះឆ្នោតជុំទីមួយ ថ្ងៃទី ២៣មេសា២០១៧ បន្ទាប់មកគេរក្សាទុកតែសេចក្តីប្រកាសរបស់បេក្ខជនពីររូបនាំគ្នា ត្រូវប្រកួតគ្នាផ្តាច់ព្រ័ត្រជុំទីពីរ។ សេចក្តីប្រកាសទ្រព្យសម្បត្តិរបស់អ្នកឈ្នះឆ្នោត ថ្ងៃទី ៨ឧសភា ២០១៧ នឹងត្រូវរក្សាទុកលើវិបសៃត៍រហូតដល់ថ្ងៃផុតអាណត្តិជាប្រធានាធិបតី។
រហូតមកទល់នឹងឆ្នាំ២០១២ សេចក្តីប្រកាសទ្រព្យសម្បត្តិរបស់បេក្ខជនប្រធានាធិបតី ស្ថិតក្នុងកញ្ចប់បិទត្រាសម្ងាត់របស់ក្រុមប្រឹក្សាធម្មនុញ្ញ មានតែបេក្ខជនជាប់ឆ្នោតប៉ុណ្ណោះ ដែលត្រូវផ្សព្វផ្សាយក្នុងទស្សនាវដ្តីផ្លូវការ ក្រោយដឹងលទ្ធផល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ