ភេរវកម្មទម្លាក់ចំនួនទេសចរមកប៉ារីសអស់១លាននាក់កន្លះនៅឆ្នាំ២០១៦
នៅឆ្នាំ២០១៦នេះ ប៉ារីស ទីក្រុងទេសចរណ៍ដ៏ល្បីល្បាញ នៅអឺរ៉ុប បានទាក់ទាញភ្ញៀវទេសចរបរទេស តិចជាងធម្មតា ដល់ជាង១លាននាក់កន្លះ។ ការធ្លាក់ចុះនេះ បណ្តាលមកពី ទេសចរជនជាតិចិន ជប៉ុន និងពលរដ្ឋអឺរ៉ុប រួញរាក្នុងចិត្តខ្លាំង មិនចង់មកទស្សនាក្រុងប៉ារីស ដោយខ្លាចរអាភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
តុល្យការប្រចាំឆ្នាំ២០១៦ បានបង្ហាញថាចំនួនភ្ញៀវទេសចរមកទស្សនាក្រុងប៉ារីសបានធ្លាក់ចុះអស់ ៤,៧% និងបើរាប់ពីភ្ញៀវបរទេសការធ្លាក់ចុះមានកំរិតដល់ទៅ ៨,៨% ពោលគឺប៉ារីសបានបាត់បង់ភ្ញៀវអស់ជាងមួយលាននាក់កន្លះ។ នេះបើតាមរបាយការណ៍របស់គណៈកម្មាធិការទេសចរណ៍តំបន់ ប៉ុន្តែរដ្ឋាភិបាលមិនទាន់ផ្តល់តួលេខផ្លូវការទូទាំងប្រទេសទេ។
ទេសចរបារាំងមកលេងប៉ារីស ថយចុះតិចតួចទេ តែគឺ ទេសចរចិន ដែលជាប់ចំណាត់ថ្នាក់លេខបី បើគិតពីចំនួនមនុស្សមកប៉ារីស បានថយចុះអស់២១,៥% ជប៉ុនថយអស់៤១,២%។ សូម្បីទេសចរអឺរ៉ុបក្នុងទ្វីបតែមួយ និងជាប់ព្រំប្រទល់ជាមួយបារាំង ក៏រួញរាមិនសូវនាំគ្នាមកទស្សនាក្រុងប៉ារីសដែរ ៖ទេសចរអ៊ីតាលី ថយអស់២៦,១% -អង់គ្លេស៨,៦% និង៩,៩% អេស្ប៉ាញ ហើយដក២៧,៦%សម្រាប់ទេសចរជាតិរុស្ស៊ី។អាមេរិក ទេសចរលំដាប់លេខមួយខាងបរិមាណ នៅតែបន្តមកទស្សនាប៉ារីសច្រើនជាងគេដដែល ដោយមានការថយចុះត្រឹមតែ៤,៩% ក្នុងរយៈពេលមួយឆ្នាំ។
ចំនួនទេសចរធ្លាក់ចុះ ចំណូលក៏ថយ។ បើតាមរបាយការណ៍ដដែល ប៉ារីសបានបាត់បង់ប្រាក់ចំណូល ប្រមាណ១៣០០លានអឺរ៉ូ។ ប៉ុន្តែជាសំណាងល្អ ការថមថយមានកំរិតទាបជាងការគ្រោងទុក ព្រោះសកម្មភាពទេសចរណ៍បានរើបឡើងវិញ តាំងពីខែវិច្ឆិកា ២០១៦មក។ ហើយចំនួនទេសចរការងារ បានកើនឡើងគួរឱ្យកត់សម្គាល់ ! កើនឡើងលើសឆ្នាំ២០១១-២០១២ ឆ្នាំដែលល្បីមានទេសចរវិជ្ជាជីវៈច្រើនបំផុតទៅទៀត។ ភាពប្រសើរឡើងផ្នែកទេសចរណ៍ នៅតែបន្តមានសម្រាប់ខែមករាឆ្នាំ២០១៧។
បើតាមប្រសាសន៍លោករដ្ឋមន្ត្រីការបរទេស ដែលបានព្រលយតួលេខប៉ាន់ស្មានផ្លូវការដំបូង បារាំងនៅតែរក្សាកិត្តិនាមជាទិសដៅទេសចរណ៍លំដាប់លេខមួយលើពិភពលោកដដែល នៅឆ្នាំ២០១៦ ដោយទទួលភ្ញៀវទេសចរបរទេសដល់ទៅប្រមាណ៨២កន្លះ ទៅ៨៣លាននាក់ ពោលគឺទាបជាងឆ្នាំ២០១៥ (៨៥លាននាក់) ប្រមាណ ២,៣%ទៅ ២,៩%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ