ភេរវកម្មប៊ែរឡាំង ៖ ភេរវជនសង្ស័យ បានឆ្លងកាត់បារាំងមែន មុនទៅដល់អ៊ីតាលី
ភេរវជនសង្ស័យធំបង្អស់ ក្នុងហេតុការណ៍ភេរវកម្មបើកឡានកិនមនុស្សនៅក្រុងប៊ែរឡាំង ពិតជាបានធ្វើដំណើរឆ្លងកាត់ប្រទេសបារាំងមែន មុននឹងឆ្លងទៅអ៊ីតាលី។ វីដេអូសុវត្ថិភាព បានថតឃើញរូប អានីស អាមរី នៅស្ថានីយ៍រថភ្លើងក្រុងលីយ៉ុង។ ជាជនដែលប៉ូលិសអឺរ៉ុបតាមស្វែងរកបំផុត តែអាចធ្វើឆ្លងព្រំដែនពីរ និងឆ្លងប្រទេសបី។ សំណួរកំពុងបន្តចោទ ថាតើភេរវជនធ្វើដូចម្តេចទើបអាចធ្វើដំណើរក្នុងប្រទេសបារាំង ដែលកំពុងស្ថិតក្នុងភាពអាសន្នបាន ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
រូបភេរវជនសង្ស័យជាតិទុយនីស៊ី អានីស អាមរី ឈរចាំឡើងរថភ្លើង តែម្នាក់ឯង នៅស្ថានីយ៍ក្រុងលីយ៉ុង ត្រូវបានកាមេរ៉ាវីដេអូសុវត្ថិភាពថតបាន នៅររសៀលថ្ងៃព្រហស្បតិ៍ ទី ២២ធ្នូ ពោលគឺក្រោយមានដីកាអឺរ៉ុបតាមចាប់ខ្លួនជននេះមួយថ្ងៃ។ នេះបើតាមប្រភពតុលាការអង្កេតបារាំង។
តាមទំនង ជនសង្ស័យកំពុងត្រៀមឡើងរទេះភ្លើង ពីក្រុងលីយ៉ុង ទៅមីឡង់ប្រទេសអ៊ីតាលី ដោយឆ្លងកាត់ និងចុះដូររថភ្លើងនៅក្រុង Chambéry។ បន្ទាប់មកក៏ឡើងរថភ្លើងមួយទៅឈប់នៅក្រុងតួរាំងរបស់អ៊ីតាលី មុននឹងឡើងជិះរថភ្លើងមួយទៀត ដើម្បីទៅដល់ទិសដៅចុងក្រោយក្រុងមីឡង់។
គឺនៅមីឡង់នេះហើយ ដែលប៉ូលិសបានបាញ់សម្លាប់ ភេរវជនសង្ស័យ ក្នុងពេលត្រួតពិនិត្យអត្តសញ្ញាណធម្មតា និងបានរកឃើញមានសំបុត្ររទេះភ្លើងពីរ នៅក្នុងកាបូបស្ពាយខ្នងរបស់គេ។ បើតាមប្រភពដដែល មានសំបុត្រមួយយ៉ាងហោចត្រូវបានទិញនៅស្ថានីយ៍រថភ្លើងក្រុងលីយ៉ុង ដោយប្រើលុយសុទ្ធ ក៏ប៉ុន្តែគេមិនដឹងថាតើអាមរីធ្វើដូចម្តេចទើបយកសំបុត្រនេះបាន។ តើអាចទេថាមានអ្នកឃុបឃិតចាំទិញសំបុត្រឱ្យ?!
ពេលនេះក្រុមអ្នកអង្កេតការណ៍ កំពុងបន្តសិក្សារូបភាពវីដេអូសុវត្ថិភាពផ្សេងៗ នៅតាមស្ថានីយ៍រថភ្លើងក្រុងប៉ារីសទៀត ដើម្បីឱ្យប្រាកដថាតើអាមរី បានឆ្លងកាត់រដ្ឋធានីដែរឬទេ ក្រោយសាងភេរវកម្មនៅប៊ែរឡាំងរួច។ ព្រោះថា អ្នកអង្កេតនៅមានចម្ងល់មួយថា តើភេរវជនសង្ស័យភ្ជាប់ដំណើរពីប៊ែរឡាំងទៅក្រុងលីយ៉ុងបានយ៉ាងដូចម្តេច ? ពេលនោះ អាមរីជាមុខសញ្ញាតាមចាប់របស់ប៉ូលិសអឺរ៉ុប ទាំងមូលហើយទេតើ ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ