អង់គ្លេស-Brexit៖លោកស្រី Theresa May ព្រមានក្រុមអ្នកតំណាងរាស្រ្តពីការប៉ុនប៉ងរារាំង Brexit
នៅក្នុងប្រទេសអង់គ្លេស លោកស្រីនាយករដ្ឋមន្រ្តី Theresa May បានថ្លែងនាថ្ងៃអាទិត្យ ទី៦ វិច្ឆិកានេះដោយព្រមានលើក្រុមអ្នកតំណាងរាស្រ្តដែលប៉ុនប៉ងបិទខ្ទប់ Brexit។ ការថ្លែងព្រមានរបស់លោកស្រី Theresa May ពេលនេះបានធ្វើឡើង បន្ទាប់ពីតុលាការជាន់ខ្ពស់ទីក្រុងឡុងដ៏បានសម្រេចកាលពីថ្ងៃព្រហស្បតិ៍ ទី៣ វិច្ឆិកាឲ្យមានការសួរយោបល់ និងការយល់ព្រមពីសភាជាមុនសិន មុននឹងរដ្ឋាភិបាលផ្តើមនីតិវិធីចាកចេញពីអឺរ៉ុបជាផ្លូវការ។ តែលោកស្រី Theresa May ជំទាស់ និងបញ្ជាក់ពីការរក្សាទុកប្រតិទិនឲ្យនៅដដែលដោយគ្មានការផ្លាស់ប្តូរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
គឺនៅមុនដំណើរចាកចេញទៅបំពេញទស្សនកិច្ចក្នុងប្រទេសឥណ្ឌាដែលលោកស្រីនាយករដ្ឋមន្រ្តីអង់គ្លេស Theresa May បានចេញសេចក្តីថ្លែងការណ៍ព្រមានក្រុមអ្នកតំណាងរាស្រ្តដែលព្យាយាមប្រើប្រាស់សន្លឹកឆ្នោតដើម្បីប្រឆាំងនឹងលទ្ធផលបោះឆ្នោតប្រជាមតិកាលពីខែមិថុនាកន្លងទៅ។ លទ្ធផលប្រជាមតិដែលប្រជារាស្រ្តអង់គ្លេសបានសម្រេចចិត្តផ្តាច់ខ្លួនចេញពីសមាជិកសហភាពអឺរ៉ុប។ « លទ្ធផលដែលទទួលបាន គឺច្បាស់ណាស់ និងស្របច្បាប់ទៀតផង។ អ្នកតំណាងរាស្រ្តគ្រប់រូបដែលមានការសោកស្តាយចំពោះលទ្ធផលនៃការបោះឆ្នោតប្រជាមតិត្រូវតែទទួលយកការសម្រេចចិត្តរបស់ប្រជារាស្រ្ត » នេះជាការថ្លែងរបស់លោកស្រី Theresa May។
សូមជម្រាបជូនថា ការសម្រេចចិត្តរបស់តុលាការជាន់ខ្ពស់ទីក្រុងឡុងដ៏កាលពីថ្ងៃទី៣ វិច្ឆិកាបានបញ្ឆេះកំហឹងរបស់ក្រុមសកម្មជនគាំទ្រ Brexit។ អ្វីដែលក្រុមសកម្មជនគាំទ្រ Brexit បារម្ភនោះ គឺការអូសបន្លាយនៅក្នុងនីតិវិធីផ្តាច់ខ្លួនចេញពីសមាជិកសហភាពអឺរ៉ុបដែលលោកស្រី Theresa May បានប្រកាសចាប់ផ្តើមនៅមុនដំណាច់ខែមីនា ឆ្នាំ ២០១៧ ខាងមុខ។ លោកស្រី Theresa May បានបញ្ជាក់ថា ការពន្យារពេលក្នុងការផ្តើមនីតិវិធីដើរចេញពីអឺរ៉ុបមិនបានហុចប្រយោជន៍អ្វីដល់អង់គ្លេស ហើយក៏មិនបានជួយអង់គ្លេសឲ្យទទួលបានលក្ខខណ្ឌល្អជានេះពីសហភាពអឺរ៉ុបដែរ។
នៅក្នុងន័យនេះ លោកស្រី Theresa May បានអំពាវនាវឲ្យគ្រប់គ្នាផ្តោតអារម្មណ៍លើការស្វែងរកច្រកចេញដ៏ប្រសើរ ពោលរក្សាទុកដដែលនូវផែនការ និងកាលវិភាគដែលបានគ្រោងទុក និងត្រៀមយុទ្ធសាស្រ្តដើម្បីចរចា។ យ៉ាងណាក៏ដោយ គេត្រូវរង់ចាំមើលការសម្រេចចិត្តរបស់តុលាការកំពូលជាមុនសិន។ បើតុលាការកំពូលទទួលយកតាមការសម្រេចចិត្តរបស់តុលាការជាន់ខ្ពស់ទីក្រុងឡុងដ៏មែន នោះការផ្តើមនីតិវិធីចាកចេញពីអឺរ៉ុបអាចនឹងត្រូវអូសបន្លាយ ហើយការចរចារវាងអង់គ្លេស និងអឺរ៉ុបកាន់តែស្មុគស្មាញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ