បារាំង-អេស្បាញ៖មេចលនាផ្តាច់ទឹកដីនិយមអេស្បាញម្នាក់ត្រូវបានចាប់ខ្លួនក្នុងទឹកដីបារាំង
នៅថ្ងៃសៅរ៍ ទី៥ វិច្ឆិកានេះ ក្រសួងមហាផ្ទៃអេស្បាញបានប្រកាសឲ្យដឹងនៅក្នុងសេចក្តីជូនដំណឹងមួយស្តីពីការចាប់ខ្លួនមេចលនាផ្តាច់ទឹកដីនិយម ETA ម្នាក់ឈ្មោះ Mikel Irastorza នៅប៉ែកខាងត្បូងប្រទេសបារាំង។ ជន Mikel ត្រូវបានរដ្ឋអំណាចអេស្បាញចាត់ទុកជាមេ ETA ជាន់ខ្ពស់ម្នាក់ដែលបានរត់គេចខ្លួនពីសំណាញ់តុលាការ។ ការចាប់ខ្លួនជន Mikel ជាលទ្ធផលបានមកពីកិច្ចសហប្រតិបត្តិការយ៉ាងស្អិតរមួតរវាងទីក្រុងប៉ារីស និងទីក្រុងម៉ាឌ្រីដ។
ចុះផ្សាយនៅថ្ងៃ៖
ស្តាប់ - ០១:៥៦
ជន Mikel Irastorza ត្រូវបានចាប់ខ្លួននាព្រលឹមស្រាងៗក្នុងថ្ងៃសៅរ៍ ទី៥ វិច្ឆិកានេះនៅក្នុងផ្ទះគ្រួសារបារាំងមួយដើមកំណើតអេស្បាញនៅប៉ែកខាងត្បូងប្រទេសបារាំង។ ប្រភពប៉ូលិសបារាំងឲ្យដឹងថា ជន Mikel Irastorza ត្រូវបានបញ្ជូនខ្លួនទៅឃុំនៅទីស្នាក់ការនៃប៉ូលិសតុលាការក្នុងស្រុក Bayonne ប៉ែកនិរតីប្រទេសបារាំង ហើយគ្រួសារប្តី ប្រពន្ធដែលបានលួចជ្រកកោណជន Mikel Irastorza ក៏ត្រូវបានឃុំខ្លួនដែរ។ ក្រៅពីការចាប់ខ្លួនជន Mikel Irastorza ក្រសួងមហាផ្ទៃអេស្បាញក៏បានប្រាប់ឲ្យដឹងពីឃាត់ខ្លួនជនផ្សេងទៀត តែមិនបានលំអិតបន្ថែមអ្វីទេ។
សូមជម្រាបជូនថា អង្គការទាមទារផ្តាច់ទឹកដីនិយមនៅអេស្បាញ ETA ដែលបានចាប់កំណើតក្នុងឆ្នាំ ១៩៥៩ កំពុងជាប់ចោទពីបទទទួលខុសត្រូវនៅក្នុងការស្លាប់មនុស្សជាង ៨០០នាក់នាការប្រយុទ្ធតស៊ូប្រដាប់អាវុធរបស់ខ្លួនជាង ៤០ឆ្នាំដើម្បីឯករាជ្យភាពនៅតំបន់ស្វយ័ត Pays Basque និងតំបន់ Navarre។ កាលពី ៥ឆ្នាំមុន ចលនា ETA បានប្រកាសបញ្ឈប់រាល់អំពើហិង្សា តែបន្តបដិសេធមិនព្រមទម្លាក់អាវុធ និងរំលាយខ្លួនចោលដូចការទាមទារចង់បានរបស់អេស្បាញ និងបារាំងទេ។ នៅថ្ងៃទី១០ តុលាកន្លងទៅ ប៉ារីស និងម៉ាឌ្រីដបានប្រកាសឲ្យដឹងពីការកម្ទេចកន្លែងស្តុកអាវុធរបស់ ETA នៅស្រុក Carlepont មានចម្ងាយ ១២០គីឡូម៉ែត្រប៉ែកខាងជើងទីក្រុងប៉ារីស។
នៅក្នុងសេចក្តីជូនដំណឹងចេញផ្សាយថ្ងៃទី១៨ តុលា ETA បានចោទបារាំង និងអេស្បាញពីបទគ្មានឆន្ទៈចង់ស្វែងរកដំណោះស្រាយសមស្របដើម្បីសន្តិភាពនៅ Pays basque។ ជាការកត់សម្គាល់ សមត្ថភាព និងលទ្ធភាពរបស់ចលនា ETA ហាក់បានចុះខ្សោយកាន់តែខ្លាំង បន្ទាប់ពីទទួលរងការវាយបង្រ្កាបរបស់កម្លាំងប៉ូលិសអេស្បាញសហការណ៍ជាមួយបារាំង និងការបាត់បង់ការគាំទ្រពីពលរដ្ឋរស់ក្នុងតំបន់ Pays basque៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ