បារាំង៖លោកហ្រ្វង់ស័រ ហូឡង់សម្រេចរុះរើ និងបិទជំរំជនអន្តោប្រវេសន៍កាឡេ (Calais) ជាស្ថាពរ
នៅថ្ងៃចន្ទ ទី២៦ កញ្ញានេះ លោកប្រធានាធិបតីបារាំងហ្រ្វង់ស័រហូឡង់បានទៅបំពេញទស្សនកិច្ចនៅជំរំជនភៀសខ្លួនកាឡេ (Calais)។ កាឡេ គឺជាស្រុកកំពង់ផែមួយរបស់បារាំងស្ថិតប៉ែកខាងជើង និងដែលមានព្រំដែនសមុទ្រជាប់នឹងប្រទេសអង់គ្លេសប៉ែកអាគ្នេយ៍។ បច្ចុបន្ននេះ មានជនអន្តោប្រវេសន៍យ៉ាងតិច ៧ ០០០ កំពុងរស់នៅក្នុងជំរំនោះ និងមានក្តីប្រាថ្នាតែមួយគត់ គឺឆ្លងចូលទៅក្នុងទឹកដីអង់គ្លេស។ តាំងពីឡើងកាន់តំណែងប្រធានាធិបតី នេះជាលើកទី១ ដែលលោកហូឡង់បានធ្វើដំណើរទៅកាន់ជំរំជនភៀសខ្លួនកាឡេ។ លោកហូឡង់បានថ្លែងនាឱកាសនោះថា រដ្ឋាភិបាលបារាំងនឹងបិទជំរំកាឡេជាស្ថាពរ និងប្តេជ្ញាមិនឲ្យជំរំរបៀបកើតមានជាថ្មីទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
« ខ្ញុំចង់និយាយថា រដ្ឋបានបំពេញកាតព្វកិច្ចរបស់ខ្លួន និងបន្តធ្វើការងារនេះនៅក្នុងអំឡុងពេលនៃការរុះរើជំរំកាឡេ និងនៅក្រោយការរុះរើរួចរាល់ហើយដោយធ្វើយ៉ាងណា កុំឲ្យស្ថានភាពមួយនេះកើតមានជាថ្មីឡើងវិញនៅថ្ងៃខាងមុខ។ ការធ្វើយ៉ាងនេះ គឺដើម្បីចៀសវាងកុំឲ្យមេរៀនក្នុងអតីតកាលវិលត្រឡប់ជាថ្មីនៅពេលដែលជំរំអន្តោប្រវេសន៍ត្រូវបានបំផ្លាញ តែក៏ត្រូវបានចាប់កំណើតជាថ្មីនៅទីកន្លែងដដែលជាមួយនឹងភាពរយ៉េរយ៉ៃ និងអសន្តិសុខ។
ខ្ញុំបានមកកាន់ស្រុកកាឡេពេលនេះក៏ដើម្បីចង់និយាយប្រាប់ពលរដ្ឋរស់នៅទីនេះដែលកំពុងក្តៅក្រហាយថា យើងកំពុងស្ថិតលើផ្លូវនៃដោះស្រាយដែលជិតមកដល់ ហើយយើងនឹងការពារសុវត្ថិភាពពលរដ្ឋកាឡេតាមគ្រប់លទ្ធភាពដែលចាំបាច់។ ខ្ញុំបានមកកាន់ស្រុកកាឡេពេលនេះក៏ដើម្បីចង់និយាយប្រាប់ជនអន្តោប្រវេសន៍ផ្សងព្រេងគ្រប់រូបថា ពួកគេនឹងមិនអាចរស់នៅទីនេះបានទៀតឡើយ ព្រោះកន្លែងរស់នៅរបស់ពួកគេមិនមែននៅទីនេះទេ។
គឺដោយមូលហេតុនេះហើយបានជាយើងនឹងធ្វើការរុះរើជំរំជនអន្តោប្រវេសន៍នេះទាំងស្រុង និងជាស្ថាពរពីស្រុកកាឡេ »
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ