ស៊ីរី៖Amnesty International ចោទក្រុមឧទ្ទាមអ៊ីស្លាមពីបទឧក្រិដ្ឋកម្មសង្រ្គាម
នៅថ្ងៃអង្គារ ទី៥ កក្កដានេះ អង្គការការពារសិទ្ធិមនុស្សអន្តរជាតិ Amnesty International ដែលមានទីស្នាក់ការក្នុងទីក្រុងឡុងដ៏ ប្រទេសអង់គ្លេសចេញផ្សាយរបាយការណ៍ថ្មីមួយទៀតស្តីពីស្ថានការណ៍នៅក្នុងប្រទេសស៊ីរី។ របាយការណ៍ថ្មីនេះបានចោទក្រុមឧទ្ទាមអ៊ីស្លាមនៅស៊ីរីពីបទធ្វើទារុណកម្ម និងប្រហារជីវិតមនុស្ស។ ទន្ទឹមគ្នានេះ Amnesty International ក៏បានអំពាវនាវឲ្យសហគមន៍អន្តរជាតិដកការគាំទ្ររបស់ខ្លួនពីក្រុម ឬចលនាណាដែលជាប់ចោទពីបទឧក្រិដ្ឋកម្មសង្រ្គាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
មានខេត្តស៊ីរីចំនួនពីរ គឺខេត្តអាឡិបស្ថិតប៉ែកខាងជើង និងខេត្តអ៊ីដឡិបស្ថិតប៉ែកពាយព្យប្រទេសដែលអង្គការ Amnesty International បានចង្អុលមុខក្រុមឧទ្ទាមពីបទឧក្រិដ្ឋកម្មសង្រ្គាម និងការរំលោភបំពានលើច្បាប់មនុស្សធម៌អន្តរជាតិផ្សេងទៀត។ Amnesty International បានកត់សម្គាល់ឃើញជាទូទៅថា ក្រុម ឬចលនាឧទ្ទាមអ៊ីស្លាមនៅក្នុងខេត្តទាំងពីរមានសេរីភាពធ្វើអ្វីស្រេចតែក្បាលចិត្តដោយគ្មានការទទួលទោសពៃអ្វីទាំងអស់ និងថា ទង្វើព្រៃផ្សៃរបស់ក្រុម ឬចលនាឧទ្ទាមទាំងនោះថែមទាំងមានការជួយឧបត្ថម្ភ និងគាំទ្រពីបរទេសទៀតផង ពិសេសពីប្រទេសកាតា អារ៉ាប៊ីសាអូឌីត តួកគី និងសហរដ្ឋអាមេរិក។
ចលនាឧទ្ទាមអ៊ីស្លាមទាំងនោះរួមមាន ចលនា Noureddine Zinki ឬចលនារណសិរ្យ Al-Chamia ដែលស្ថិតក្នុងចង្កោមសម្ព័ន្ធអ៊ីស្លាម Fatah Halab។ ក្រៅពីនេះ នៅមានចលនាប្រដាប់អាវុធ Ahrar al-Cham ដែលគាំទ្រដោយប្រទេសអារ៉ាប៊ីសាអូឌីត និងចលនារណសិរ្យ Al-Nosra ដែលជាសាខារបស់អាល់កៃដាក្នុងប្រទេសស៊ីរី។ ក្រុម ឬចលនាឧទ្ទាមអ៊ីស្លាមទាំងអស់នេះបានលេចរូបរាង និងផ្តើមសកម្មភាពព្រៃផ្សែតាំងពីស៊ីរីបានធ្លាក់ក្នុងវិបត្តិហែកហួរផ្ទៃក្នុងកាលពីឆ្នាំ ២០១១។ វិបត្តិដែលមកដល់ពេលនេះបានបណ្តាលឲ្យមានមនុស្សស្លាប់ជាង ២៨ម៉ឺននាក់ និងជនភៀសខ្លួនជាច្រើនលាននាក់។
របាយការណ៍របស់ Amnesty International ដដែលបានលើកឡើងពីករណីចាប់មនុស្សធ្វើជាថ្នូរចំនួន ២៤ករណីរបស់ក្រុមឧទ្ទាមប្រដាប់អាវុធក្នុងចន្លោះឆ្នាំ ២០១២ និង ២០១៦ ហើយក្រុមមនុស្សផ្ទាំងស៊ីបរបស់ពួកគេ គឺសកម្មជនសន្តិភាពនិយម កូនក្មេង រួមទាំងអ្នកកាន់សាសនាភាគតិចទៀតផង។ Amnesty International បានគូសបញ្ជាក់ថា មានជនស៊ីវិលជាច្រើនកំពុងបន្តរស់នៅក្នុងការភ័យខ្លាចជាប្រចាំ ដោយខ្លាចក្រុមឧទ្ទាមអ៊ីស្លាមចាប់ខ្លួន ប្រសិនបើពួកគេហ៊ានចេញមុខរិះគន់ទង្វើ ឬមួយមិនគោរពតាមការណែនាំរបស់ក្រុមឧទ្ទាមប្រដាប់អាវុធនោះទេ។
នៅក្នុងន័យនេះ Amnesty International បានអំពាវនាវដល់ក្រុមប្រទេសអន្តរជាតិដែលស្វែងរកសន្តិភាពសម្រាប់ស៊ីរី ពិសេសអាមេរិក កាតា តួកគី និងអារ៉ាប៊ីសាអូឌីតឲ្យបញ្ឈប់ និងដកការគាំទ្ររបស់ខ្លួនចំពោះក្រុម ឬចលនាឧទ្ទាមអ៊ីស្លាមណាដែលបានប្រព្រឹត្តទង្វើឧក្រិដ្ឋកម្មសង្រ្គាម ឬរំលោភបំពានច្បាប់មនុស្សធម៌អន្តរជាតិផ្សេងៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ