អាល្លឺម៉ង់៖សភាបានបោះឆ្នោតទទួលស្គាល់អំពើប្រល័យពូជសាសន៍លើជនជាតិអាមេនី
នៅក្នុងប្រទេសអាល្លឺម៉ង់ សភាបានបោះឆ្នោតអនុម័តនាថ្ងៃព្រហស្បតិ៍ ទី២ មិថុនាលើសេចក្តីសម្រេចចិត្តមួយដោយទទួលស្គាល់អំពើប្រល័យពូជសាសន៍លើប្រជាជនអាមេនី។ ប្រទេសតួកគីដែលជាប់ចោទនឹងទង្វើប្រល័យពូជសាសន៍នេះបានបញ្ចេញប្រតិកម្មមិនសប្បាយចិត្ត និងបានកោះហៅឯកអគ្គរដ្ឋទូតរបស់ខ្លួនប្រចាំក្រុងប៊ែរឡាំងឲ្យត្រឡប់ចូលស្រុកវិញ។ កាលពីថ្ងៃពុធ ទី១ មិថុនា លោកប្រធានាធិបតីតួកគី Erdogan ក៏បានទូរស័ព្ទទៅលោកស្រីនាយរដ្ឋមន្រ្តីអាល្លឺម៉ង់ Merkel ដើម្បីសម្តែងពីក្តីបារម្ភរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
នៅទីបំផុត និងដោយមិនខ្វាយខ្វល់ពីការព្រមានរបស់តួកគី សមាជិកសភាអាល្លឺម៉ង់សឹងតែទាំងអស់បានបោះឆ្នោតគាំទ្រលើសេចក្តីសម្រេចចិត្តមួយដោយទទួលស្គាល់អំពើប្រល័យពូជសាសន៍លើប្រជាជនអាមេនី។ សមាជិកសភាអាល្លឺម៉ង់ភាគច្រើនបានលើកយកហេតុផលទៅពន្យល់ថា សេចក្តីសម្រេចចិត្តទទួលស្គាល់អំពើប្រល័យពូជសាសន៍លើប្រជាជនអាមេនីមិនមានគោលដៅប្រឆាំងរដ្ឋាភិបាលតួកគីបច្ចុប្បន្នទេ តែទាក់ទងនឹងការទទួលខុសត្រូវរបស់អាណាចក្រអូតូម៉ង់នាសម័យនោះ។ មួយវិញទៀត សេចក្តីសម្រេចចិត្តរបស់សភាអាល្លឺម៉ង់ពេលនេះក៏សំដៅបង្កើតមូលដ្ឋានចំាបាច់មួយនៃការផ្សះផ្សាជាតិរវាងប្រជាជនតួកគី និងប្រជាជនអាមេនី។
គួរបញ្ជាក់ជូនថា សេចក្តីសម្រេចចិត្តរបស់សភាអាល្លឺម៉ង់ក្នុងការទទួលស្គាល់អំពើប្រល័យពូជសាសន៍លើប្រជាជនអាមេនីក៏បាននិយាយពីការទទួលខុសត្រូវមួយចំណែករបស់អាល្លឺម៉ង់ក្នុងនាមជាសម្ព័ន្ធមិត្តរបស់តួកគីក្នុងសម័យសង្រ្គាមលោកលើកទី១ដែរ។ កាលណោះ អាល្លឺម៉ង់ត្រូវបានគេជូនដំណឹងពីផែនការសម្លាប់រង្គាលលើប្រជាជនអាមេនីពីសំណាក់តួកគី តែបានបិទភ្នែក មិនធ្វើអ្វីទាំងអស់។ ប្រតិកម្មភ្លាមៗពេលនេះ ប្រទេសអាមេនីបានសាទរលើសេចក្តីសម្រេចចិត្តរបស់សភាអាល្លឺម៉ង់។
តែតួកគីបានបញ្ចេញប្រតិកម្មក្តៅក្រហាយយ៉ាងខ្លាំង។ ទីក្រុងអង់ការ៉ាបានបញ្ជាក់ជាថ្មីថា គឺក្នុងសម័យសង្រ្គាមស៊ីវិល និងគ្រោះទុរ្ភិក្សទេដែលបានសម្លាប់ប្រជាជនអាមេនីពី ៣០០ ០០០ ទៅ ៥០០ ០០០នាក់ រួមទាំងប្រជាជនតួកគីជាច្រើនម៉ឺននាក់ផងដែរ។ អ្នកនាំពាក្យរបស់រដ្ឋាភិបាលតួកគីបានឆ្លើយបកទៅអាល្លឺម៉ង់វិញភ្លាមៗថា សេចក្តីសម្រេចចិត្តគ្មានភស្តុតាង មិនមូលដ្ឋានច្បាស់លាស់របស់សភាអាល្លឺម៉ង់ពេលនេះ ជាកំហុសប្រវត្តិសាស្រ្តមួយធំណាស់ និងថា តួកគីបានចាត់ទុកសេចក្តីសម្រេចនេះជាមោឃៈ។ ទន្ទឹមគ្នានេះក្រុងអង់ការ៉ាក៏បានហៅឯកអគ្គរដ្ឋទូតរបស់ខ្លួនប្រចាំក្រុងប៊ែរឡាំងឲ្យត្រឡប់ចូលស្រុកវិញដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ