លោក អូបាម៉ា អំពាវនាវឱ្យអឺរ៉ុបរួបរួមគ្នា ទើបខ្លាំង
នៅថ្ងៃចន្ទនេះ នាឱកាសជំនួបប្រជុំ៥ប្រទេសនៅប្រទេសអាល្លឺម៉ង់ ជាមួយជាប្រមុខដឹកនាំសំខាន់ៗរបស់អឺរ៉ុប (បារាំង អង់គ្លេស អ៊ីតាលី និងអាល្លឺម៉ង់) លោកប្រធានាធិបតីអាមេរិក បារ៉ាក់ អូបាម៉ា បានអំពាវនាវឱ្យ “អឺរ៉ុបផ្តុំកម្លាំងនិងរួបរួមគ្នា”។ សេចក្តីអំពាវនាវនេះ ធ្វើឡើងក្នុងខណៈដែលអឺរ៉ុបកំពុងឆ្លងកាត់វិបត្តិប្រេះឆាយ៉ាងខ្លាំងមិនធ្លាប់មាន ព្រោះតែការគំរាមដើរចេញពីអឺរ៉ុបរបស់អង់គ្លេស និងការស្ទុះឡើងខ្លាំងនៃចលនាជាតិនិយមជ្រុល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
“សហរដ្ឋអាមេរិកនិងពិភពលោកទាំងមូល ត្រូវការឃើញអឺរ៉ុបខ្លាំង សម្បូរសប្បាយ ប្រជាធិបតេយ្យ និងរួបរួមគ្នាជាធ្លុងមួយ” ! នេះជាប្រសាសន៍របស់លោកអូបាម៉ា ពីទីក្រុងឧស្សាហកម្មអាល្លឺម៉ង់ Hanovre ដោយបានគូសបញ្ជាក់បន្ថែមទៀតថា អឺរ៉ុបដ៏ចំណាស់កំពុងឆ្លងកាត់ពេលវេលាដ៏សំខាន់មួយនៃប្រវត្តិសាស្ត្រ ដោយហេតុតែភាពរង្គោះរង្គើខ្លាំងពុំធ្លាប់មានឡើយគិតចាប់ពីសង្គ្រាមលោកលើកទីពីរមក។
បន្ទាប់ពីបានទៅព្រមានអង់គ្លេសដល់ផ្ទះ អំពីគ្រោះថ្នាក់នៃការដើរចេញពីអឺរ៉ុប កាលពីសប្តាហ៍មុន នៅថ្ងៃនេះ លោកអូបាម៉ា បានជ្រើសរើសប្រទេសអាល្លឺម៉ង់ ដើម្បីបង្ហើរសារណែនាំឱ្យអឺរ៉ុបចេះរួបរួមគ្នា និងបានដាស់តឿនអឺរ៉ុបថា សង្គ្រាម ជម្លោះ ប្រជែងគ្នាថ្នាក់ជាតិ គឺជាប្រភពនៃសង្គ្រាមបង្ហូរឈាមដ៏រ៉ាំរ៉ៃកាលពីជិតមួយសតវត្សរ៍មុន។
សម្រាប់លោកអូបាម៉ា ដែលយល់ថាអឺរ៉ុបត្រូវការការដាស់តឿនពីអ្នកខាងក្រៅ ប្រសិនបើសហភាពអឺរ៉ុប មានសន្តិភាព មានប្រជាធិបតេយ្យ និងមានសេដ្ឋកិច្ចទីផ្សារសេរី ចាប់ផ្តើមសង្ស័យលើខ្លួនឯង លើអ្វីដែលសម្រេចបានរាប់ទសវត្សរ៍កន្លងមក មានន័យថាអឺរ៉ុបកំពុងតែធ្វើឱ្យអ្នកប្រឆាំងកាន់តែខ្លាំង និងគាំទ្រគំនិតសហគមន៍និយម។
ការស្ទុះឡើងនៃចលនាជាតិនិយមជ្រុលដោយហេតុវិបត្តិអន្តោប្រវេសន៍ ការគំរាមកំហែងដើរចេញពីអឺរ៉ុបរបស់អង់គ្លេស ការគំរាមកំហែងជីហាត អស្ថិរភាពនៅអ៊ុយក្រែន ព្រមទាំងសេដ្ឋកិច្ចត្រដាបត្រដួស បានធ្វើអឺរ៉ុបធ្លាក់ស្ថានភាពរង្គោះរង្គើជាងពេលណាៗទាំងអស់ និងបានផ្តល់ការព្រួយបារម្ភយ៉ាងខ្លាំងដល់រដ្ឋបាលអាមេរិក។
ក្រៅអំពីសារតើនរំលឹក លោកប្រធានាធិបតីអាមេរិកក៏បានទទូចឱ្យអឺរ៉ុបលះបង់គំនិតគ្រប់គ្រាន់និយម ក្នុងវិស័យការពារជាតិ កុំរំពឹងតែលើជំនួយពីមិត្តអាមេរិកឬអូតង់ តែត្រូវបង្កើនចំណាយយោធាខ្លះ និងគាំទ្របណ្តាប្រទេសអឺរ៉ុបខាងកើត ដើម្បីអាចទប់ទល់នឹងសម្ព័ន្ធសាមគ្គីភាពខាងត្បូង គឺតួកគី ស៊ីរីនិងអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ