ខួប៥៥ឆ្នាំ នៃការ បានបង្ហោះពលរដ្ឋរុស្ស៊ី ជាលើកដំបូង ចេញទៅអវកាស
គឺថ្ងៃ១២មេសា ឆ្នាំ១៩៦១ ដែលសហភាពសូវៀត បានបង្ហោះពលរដ្ឋខ្លួន នាម Yuri Gagarin ចេញទៅអវកាសមុនគេបង្អស់ ដោយបើកសករាជថ្មីស្រឡះក្នុងប្រវត្តិមនុស្សលោក។ តាំងពីពេលនោះមក រុស្ស៊ីតែងប្រារព្ធប្រកបដោយមោទនភាពទិវានេះ ក្នុងឋានៈជា ទិវាអវកាសវិទ្យា។ ៥ឆ្នាំមុន ជាកិត្តិយសដល់ខួប៥០ឆ្នាំ នៃទិវានេះ មហាសន្និបាតអង្គការសហប្រជាជាតិ លើកទី៦៥ នាថ្ងៃ៧មេសាឆ្នាំ២០១១ បានអនុម័តសេចក្តីសម្រេច ប្រកាសទិវា ១២មេសា ថាជា “ទិវាអន្តរជាតិនៃការហោះហើររបស់មនុស្សចេញទៅអវកាស”។ រសៀលថ្ងៃ១២មេសាម្សិលមិញ លោកប្រធានាធិបតី ពូទីន តាមរយៈ Video-conference សំដែងការអបអរសាទរ ទៅកាន់ក្រុមអវកាសយានិកអន្តរជាតិរុស្ស៊ី-អាមេរិកាំង-អង់គ្លេស មានគ្នា៦នាក់ ដែលកំពុងស្នាក់ធ្វើការ ក្នុងស្ថានីយអវកាសអន្តរជាតិ ហោះនៅកំពស់ ៤២០គ.ម.ពីផែនដី។
ចុះផ្សាយនៅថ្ងៃ៖ កែប្រែថ្ងៃទី៖
កាលណោះ លោក Yuri Gagarin បានហោះនៅអវកាសតែ ១ ម៉ោងនិង ៤៨នាទី ប៉ុន្តែវាជារយៈពេលនាំឲ្យបណ្តាជនសូវៀត ភិតភ័យនិងបុកពោះខ្លាចក្រែង មានការខុសទាស់ ផ្នែកបច្ចេកទេស ហើយគាត់មិនអាចត្រឡប់មកផែនដីវិញ។ ក្នុងរយៈពេល១០៨នាទីនោះ យានអវកាស Vostok ទម្ងន់៤.៧២៥គីឡូក្រាម ដែលគាត់ជិះហោះព័ទ្ធបាន១ជុំជុំវិញផែនដី ឆ្លងផុតចម្ងាយ ៤ម៉ឺន១ពាន់គ.ម. តាមតារាវិថី មានរាងពងក្រពើ កំពស់ខ្ពស់បំផុតពីផែនដី គឺ ៣០២គ.ម. និងកំពស់ទាបបំផុត គឺ១៧៥គ.ម.។
គួរនិយាយថា ឆ្នាំ១៩៦១នោះ ជាសម័យសង្គ្រាមត្រជាក់ពេញបន្ទុកតែម្តង នាំឲ្យមានការប្រជែង សឹងស៊ីសាច់គ្នារវាងសហភាពសូវៀត និង ស.រ.អា. ដើម្បីបញ្ជូនពលរដ្ឋខ្លួនទៅអវកាសមុនគេ។
លទ្ធផលដែលមាន គឺថាលុះ៣សប្តាហ៍ក្រោយពីសហភាពសូវៀត ទើបស.រ.អា.អាចបង្ហោះ ពលរដ្ឋខ្លួន ចេញទៅអវកាស។ ពលរដ្ឋអាមេរិកាំងទី១នោះ ដែលជាមនុស្សទី២ របស់ផែនដី ហោះចេញទៅអវកាស គឺលោក Alan Shepard បានត្រូវបង្ហោះចេញទៅនៅថ្ងៃ ទី៥ឧសភា ឆ្នាំ ១៩៦១។ ជាការប្រៀបធៀប គាត់បានស្ថិតនៅក្នុងអវកាសតែ ១៥នាទីនិង២៨វិនាទី ដោយឥតបានហោះព័ទ្ធ ជុំវិញផែនដីឯណា។ យានអវកាស Mercury ដែលផ្ទុករូបគាត់ទៅ គ្រាន់តែហោះឡើងដល់កំពស់ ១៨០គ.ម. ក៏ត្រឡប់មកវិញ ហើយចុះចតក្នុងទឹកមហាសមុទ្រអាត្លង់ទិក។
ជាការកត់សម្គាល់ ពាក្យថា អវកាស គឺលំហដែលមានកំពស់ ចាប់ពី ១០៣គ.ម.ឡើងទៅ។
តាំងពីពេលនោះមក មានយានអវកាសរាប់រយ បានផ្ទុកទៅកាន់អវកាស គឺមនុស្សចំនួនជិត ៥០០នាក់ របស់ផែនដី ជាពលរដ្ឋរាប់សិបប្រទេស ពីក្នុងនោះ ជាតិរុស្ស៊ី តាមតួលេខថ្មីបំផុត ចេញថ្ងៃ១៩មីនាឆ្នាំ២០១៦ គឺមានគ្នា ១២០នាក់ ពីក្នុងនោះ មានស្ត្រី ៤នាក់។
ពេលសន្ទនាតាម Video-conference ជាមួយក្រុមអវកាសយានិកអន្តរជាតិ រុស្ស៊ី-អាមេរិកាំង-អង់គ្លេស មានគ្នា៦នាក់ ដែលកំពុងស្នាក់ធ្វើការ ក្នុងស្ថានីយអវកាសអន្តរជាតិ ហោះនៅកំពស់ ៤២០គ.ម.ពីផែនដី លោកពូទីន សំដែងសេចក្តីសង្ឃឹមថា តាមរយៈការសហការគ្នានៅអវកាស រវាងរុស្ស៊ី-អាមេរិក-ជប៉ុន-អឺរ៉ុប មុខជានឹងជួយរកឲ្យឃើញ ការយោគយល់គ្នា កាន់តែប្រសើរឡើង នៅលើផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ