ពួកភេរវជន លើកនេះបានបរាជ័យ ក្នុងការវាយប្រហារ ទៅលើទីស្នាក់ការប៉ូលិស
ថ្ងៃចន្ទទី១១មេសា ក្នុងខេត្តមួយ ប៉ែកខាងត្បូងប្រទេសរុស្ស៊ី មានភេរវជនបីនាក់ ប្រដាប់ទៅដោយគ្រាប់បែកដៃ បានសាកល្បងសម្រុកចូលទៅក្នុងទីស្នាក់ការប៉ូលិស ពេលដែលនៅទីនោះ កំពុងប្រព្រឹត្តទៅកិច្ចប្រជុំថ្នាក់ដឹកនាំប៉ូលិស។ ប៉ុន្តែប៉ូលិសដែលយាមនៅក្រៅ ចេះប្រតិកម្មទាន់ពេលវេលា ហើយបាញ់សម្លាប់ពួកនោះ ស្លាប់ទៅហើយនៅចម្ងាយម្តុំ ៦ម៉ែត្រ ពីច្រកចូល ឃើញដូច្នេះ ភេរវជនទី៣ ក៏បានបំផ្ទុះគ្រាប់បែកធ្វើអត្តឃាតខ្លួនឯងទៅ។ ខាងប៉ូលិស និង អ្នកស្រុក ឥតមាននរណារងគ្រោះទេ។ ប៉ុន្តែ ជញ្ជាំងខាងមុខបកប៉ូលិស ព្រមទាំង រថយន្តប៉ុន្មានគ្រឿងចតនៅក្បែរនោះ បានរងការខូចខាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ឧប្បត្តិហេតុនេះ បានកើតឡើង ក្នុងខេត្ត Stavropol ចម្ងាយប្រមាណ១.៣០០គ.ម. ខាងត្បូងពីរដ្ឋធានីម៉ូស្គូ។ ចំណែកពួកភេរវជន វាបានប៉ុនប៉ងវាយប្រហារ គឺទៅលើបកប៉ូលិសនៃទីក្រុងតូចមួយ ឈ្មោះ Novosselitskoie មានបណ្តាជន ៨.៥០០នាក់ ស្ថិតនៅចម្ងាយ ១២០គ.ម. ពីទីរួមខេត្ត Stavropol។ ខេត្តនេះផ្ទាល់ ស្ថិតនៅជិត ខេត្តរុស្ស៊ីជាច្រើនតំបន់ភ្នំកូកាស ល្បីដោយអស្ថិរភាពនៃស្ថានការណ៍ផ្ទៃក្នុង បែបយ៉ាង ខេត្ត Daguestan Ingouchie Tchetchenie អុកឡុក ពីមួយពេលទៅមួយពេល ដោយពួកឧទ្ទាមអ៊ីស្លាមជ្រុលនិយម ដែលនៅតែចងគំនុំ ទល់នឹងពួកយោធារុស្ស៊ី តាំងពីរង្វង់ទសវត្សរ៍ទី ៩០ ម៉្លេះ សម័យនៃប្រតិបត្តិការកងទ័ពរុស្ស៊ី បង្ក្រាបរលកទាមទារផ្តាច់ទឹកដីខេត្តទាំងនោះ ចេញពីសហព័ន្ធរុស្ស៊ី ដើម្បីបង្កើតឡើងជា អាណាចក្រអ៊ីស្លាម ប្រចាំតំបន់ភ្នំកូកាស។
“គណៈកម្មាធិការរុស្ស៊ីខាងអង្កេត” ហៅកាត់ថា SKR ស្រដៀងនឹង FBI នៅស.រ.អា. ក្រោយពី ពិនិត្យមើល សាកសពភេរវជនបីនាក់នោះ សំអាងលើក្រយៅម្រាមដៃរបស់ពួកគេជាដើម បានប្រកាសថា ពួកគេនោះ គឺជាអ្នកស្រុកនៃឃុំមួយនៅជិតខាង ដែលធ្លាប់បានត្រូវតុលាការកាត់ទោសទៅហើយ ចំពោះឧក្រិដ្ឋកម្មដែលគេបានប្រព្រឹត្ត។
អភិបាលខេត្ត Stavropol លោក Vladimir Vladimirov ដោយចាត់ទុកការវាយប្រហារនោះ ថាជាវិច្ឆេទកម្មបានចេញបទបញ្ជា ឲ្យបង្កើនការការពារទាំងរាល់អគារនៃអង្គការរដ្ឋអំណាច ទាំងមតេយ្យសាលា សាលារៀន និង មន្ទីរពេទ្យ។
តបនឹងសំនួរ តើការវាយប្រហារនេះ ជាចម្លើយឬទល់នឹងជោគជ័យនៃប្រតិបត្តិការ កងអាកាស រុស្ស៊ីនៅស៊ីរី អ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ ថ្លែងថា ដើម្បីសន្និដ្ឋាន តើវាជាអំពើភេរវកម្ម ឬ ជាទង្វើពួកចោរព្រៃ គឺត្រូវតែដឹងសិន តើវាមាននរណាឈរនៅពីក្រោយ?
គួររំលឹកថា កាលពីចុងខែមីនាកន្លងទៅ នៅលើដែនដីខេត្ត Daguestan មានការបំផ្ទុះគ្រាប់បែក ផ្ទួនៗដែលសម្លាប់ប៉ូលិសអស់ពីរនាក់ ហើយកាលណោះ បានចេញមុខ ថ្លែងទទួលខុសត្រូវ គឺអង្គការភេរវនិយម”រដ្ឋអ៊ីស្លាម”តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ