បារាំងនិងអាល្លឺម៉ង់អំពាវនាវឱ្យរក្សាអង់គ្លេសក្នុងសហភាពអឺរ៉ុប
មួយថ្ងៃមុនបើកជំនួបកំពូលអឺរ៉ុប ដើម្បីសម្រេចជោគវាសនាអង់គ្លេស ថាត្រូវដើរចេញ ឬមិនដើរចេញពីសហភាពអឺរ៉ុប ប្រមុខដឹកនាំប្រទេសធំៗរបស់សហភាព ជាពិសេសនិងប្រមុខរដ្ឋាភិបាល បារាំងនិងអាល្លឺម៉ង់ បានបង្កើនការពារអង់គ្លេស និងការអំពាវនាវខ្លាំងឡើងៗ ឱ្យប្រទេសជាសមាជិកទាំង២៨ ព្រមទទួលសំណើកំណែទម្រង់ ដើម្បីទប់អង់គ្លេសកុំឱ្យដើរចេញពីអឺរ៉ុបបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ប្រសិនបើអង់គ្លេសដើរចេញអឺរ៉ុប នោះពិតរងការឈឺចាប់បំផុត និងមានរូបភាពមិនល្អទេ សម្រាប់ក្រសៃភ្នែកពិភពលោក ! នេះជាប្រសាសន៍របស់លោកនាយករដ្ឋមន្ត្រីបារាំង ដែលបានបង្ហាញជំហរជឿជាក់ថា និងជំរុញឱ្យសហភាពអឺរ៉ុបទាំង២៨ព្រមទទួលយកកិច្ចព្រមព្រៀងបឋម ធ្វើកំណែទម្រង់ ស្របតាមឆន្ទៈរបស់អង់គ្លេស និងដើម្បីរក្សាអង់គ្លេស ឱ្យនៅក្នុងសហភាពអឺរ៉ុបជាបន្តទៀត។
ចំណែកលោកស្រីប្រមុខរដ្ឋាភិបាលអាល្លឺម៉ង់វិញ បានអះអាងថា ការទាមទាររបស់អង់គ្លេសមួយភាគធំ ជាសំណើសមហេតុផល និងមិនមែនដើម្បីតែប្រយោជន៍អង់គ្លេសមួយប៉ុណ្ណោះ តែកំណែទម្រង់នេះ នឹងក្លាយជាប្រយោជន៍រួមសម្រាប់អឺរ៉ុបទាំងមូល។ សម្រាប់លោកស្រីរក្សាសមាជិកភាពអង់គ្លេសដែលជាប្រទេសខ្លាំង នឹងធ្វើឱ្យអឺរ៉ុបនៅតែខ្លាំង។
សូមបញ្ជាក់ថា កាលពី២កុម្ភៈ ក្រុមប្រឹក្សាអឺរ៉ុប បានរកឃើញគម្រោងកិច្ចព្រមព្រៀងបឋមមួយ ធ្វើកំណែទម្រង់ ដែលមានលក្ខណៈស្របតាមសំណើចង់បានរបស់អង់គ្លេសស្ទើរតែទាំងអស់ ជាថ្នូរនឹងការរក្សាអង់គ្លេសក្នុងសហភាព។ កិច្ចព្រមព្រៀងបឋមនេះ ត្រូវដាក់ជូនសមាជិកសហភាពអឺរ៉ុបទាំង២៨ សម្រេចចិត្ត នៅថ្ងៃព្រហស្បតិ៍និងសុក្រនេះ។ ក៏ប៉ុន្តែ រវាងបញ្ហាអន្តោប្រវេសន៍ បញ្ហាបូរណភាពដែនដី អភិបាលកិច្ចសេដ្ឋកិច្ច មានចំណុចជាច្រើនដែលសមាជិកអឺរ៉ុបមិនព្រមតាម។
ប្រសិនបើកិច្ចព្រមព្រៀងបឋម អាចកើតចេញជាកិច្ចព្រមព្រៀងពេញលេញ នោះនឹងមានការធ្វើប្រជាមតិនៅអង់គ្លេស នៅរដូវក្តៅខាងមុខ។ ប្រមុខរដ្ឋាភិបាលអង់គ្លេស លោក ដេវីត កាមឺរោន មានកាតព្វកិច្ចចេញឃោសនាភ្លាមការពារសមាជិកភាពអង់គ្លេសក្នុងអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ