អង្គការសុខភាពពិភពលោក ៖ នឹងមានអ្នកជំងឺហ្ស៊ីកា (Zika) កើនដល់៣ទៅ៤លាននាក់នៅអាមេរិក
ជំងឺគ្រុនហ្ស៊ីកា ជំងឺស្រាលតែអាចបង្កគ្រោះថ្នាក់ដល់ទារកឱ្្យស្លាប់ ឬកើតមកមានក្បាលតូចខុស ប្រក្រតី អាចនឹងរាតត្បាត ដូចលាជផ្ទុះ ពេញទ្វីបអាមេរិកតែម្តង។ នេះបើតាមការប្រកាសរបស់លោកស្រី ម៉ាហ្ការែត ចាន់ អគ្គនាយកអង្គការសុខភាពពិភពលោក ដែលព្យាករថានឹងមានអ្នកកើតជំងឺហ្ស៊ីកាកើនដល់ទៅ៣-៤លាននាក់ នៅទ្វីបអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ប្រឈមមុខនឹងស្ថានភាពធ្ងន់ធ្ងរនៃការរាតត្បាតជំងឺហ្ស៊ីកា អង្គការសុខភាពពិភពលោក បានកោះប្រជុំគណៈកម្មាធិការជំនាញជាបន្ទាន់មួយនៅថ្ងៃចន្ទសប្តាហ៍ក្រោយ ដើម្បីវាយតម្លៃនិងធ្វើការសម្រេចចិត្តថា តើការរាតត្បាតរបស់ហ្ស៊ីកា គំរាមកំហែងសុខភាពសាធារណៈ និងអន្តរជាតិបន្ទាន់ប៉ុណ្ណា។
វីរ៉ុសហ្ស៊ីកា ដែលទើបចេញមុខជាថ្មី នៅប្រេស៊ីល កំពុងបន្តការរាតត្បាតយ៉ាងលឿនស្លេវ ឆ្លងទ្វីប កំរិតពិភពលោក។ មានប្រទេសចំនួន២៣នៅក្នុងទ្វីបអាមេរិក និងនៅក្នុងតំបន់ កំពុងរងការរាតត្បាតខ្លាំង រហូតទាញសញ្ញាអាសន្នកំរិតខ្ពស់បំផុត។ គិតតឹមពីខែធ្នូមក នៅប្រទេសហុងឌុយរ៉ាស មានករណីកើតហ្ស៊ីកា១ពាន់នាក់។ ចំណែកប្រេស៊ីល រងគ្រោះខ្លាំងគេ ដោយមានអ្នកឆ្លងហ្ស៊ីកា ប្រមាណ១លាន៥សែននាក់។ នេះបើតាមអង្គការសុខភាពពិភពលោក ដែលព្យាករថានឹងមានករណីហ្ស៊ីកាឡើងដល់បីបួននាក់នៅលើទ្វីបអាមេរិក នាពេលឆាប់ៗនេះ។
ក្រៅអំពីអាចធ្វើទារកក្នុងផ្ទៃស្លាប់ឬកើតមកក្នុងទម្រង់មិនត្រឹមត្រូវ អង្គការសុខភាពពិភពលោក បានសម្តែងការព្រួយបារម្ភជាពិសេស ចំពោះភាពប្រឈមរបស់ប្រជាពលរដ្ឋរស់នៅក្នុងតំបន់ទល់នឹងហ្ស៊ីកា ខ្លាចគ្មានប្រព័ន្ធការពារខ្លួនគ្រប់គ្រាន់ប្រឆាំងនឹងចម្លងវីរ៉ុសពីម៉ូសខ្លា និងគ្មានការវិភាគរោគសញ្ញាបានទាន់ពេលវេលា។
បើតាមការគូសបញ្ជាក់របស់លោកស្រីអគ្គនាយកអង្គការសុខភាពពិភពលោក ស្ថានភាពអាកាសធាតុ ប្រែប្រួលខ្លាំងតាំងពីឆ្នាំ២០១៥មកនេះ បានអនុគ្រោះឱ្យមានម៉ូសកើតច្រើន និងបន្តកើនឡើងទៀតនៅឆ្នាំ២០១៦នេះ។ គេពុំទាន់អាចពន្យល់បានអំពីមូលហេតុនៃវីរ៉ុសហ្ស៊ីកានិងការលូតលាស់មិនប្រក្រតីរបស់ទារកទេ ហេតុដូច្នេះហើយបានជាអង្គការនៅរក្សាការប្រុងប្រយ័ត្នខ្លាំង ដោយត្រឹមណែនាំឱ្យអាជ្ញាធរនិងពលរដ្ឋ នាំគ្នាកម្ចាត់ម៉ូស និងប្រើថ្នាំការពារកុំឱ្យម៉ូសខាំ។ អង្គការកាកបាទក្រហមវិញ បានទាមទារឱ្យវិធានការបន្ទាន់ទប់ស្កាត់ការរាតត្បាត។ ក្រសួងសុខាភិបាលបារាំងបានចេញសេចក្តីណែនាំស្ត្រីមានផ្ទៃពោះកុំឱ្យធ្វើដំណើរទៅតំបន់អាមេរិកខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ