អ៊ុយក្រែន បើក”ផ្លូវសូត្រ”ថ្មី ទៅ អាស៊ីកណ្តាល និង ចិន ដោយឃ្វាងប្រទេសរុស្ស៊ី
“ជាលទ្ធផលនៃកិច្ចចរចា ជាមួយអាស៊ែរបេដហ្សាន និង កាហ្សាក់ស្ថាន ជុំវិញតម្លៃដឹកឆ្លងកាត់ប្រទេសទាំងនេះ នៅថ្ងៃ១៥មករាខាងមុខ អ៊ុយក្រែននឹងចាប់ផ្តើមពិសោធន៍មើលជើងបើកបរ នៃរថភ្លើងខ្លួនដឹកទំនិញតាមខ្សែផ្លូវដែក អ៊ុយក្រែន-ហ្ស៊កហ្ស៊ី- អាស៊ែរបេដហ្សាន- កាហ្សាក់ស្ថាន លុះរហូតដល់ប្រទេសចិន” - សេចក្តីនេះ ត្រូវបានប្រកាស ដោយលោកនាយករដ្ឋមន្ត្រីអ៊ុយក្រែន ក្នុងកិច្ចប្រជុំរដ្ឋាភិបាល ថ្ងៃពុធម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ជើងបើកបរតាមផ្លូវដែកថ្មីនេះ នឹងប្រព្រឹត្តទៅ គឺដោយប្រើទាំងសាឡាងឆ្លងកាត់ សមុទ្រពីរ គឺសមុទ្រខ្មៅផង សមុទ្រCaspienne ផង។
ជើងរថភ្លើងថ្ងៃមុខ ដែលមានលក្ខណៈបង្ហាញឲ្យគេស្គាល់ នឹងក្លាយទៅជាការបើកផ្លូវដែលជាជម្រើសថ្មី សម្រាប់ដឹកទំនិញចេញពីអ៊ុយក្រែន ទៅកាន់បណ្តាប្រទេសអាស៊ីកណ្តាល។ រថភ្លើនេះ នឹងចេញដំណើរតាមសាឡាងលើផ្ទៃទឹកមាត់សមុទ្រខ្មៅ នៅថ្ងៃ១៥មករា គឺ ពីក្រុងផែ Ilichevsk នៃខេត្តអូដេស្សា អ៊ុយក្រែន លុះរហូតដល់ក្រុងផែឈ្មោះ Batoumi របស់ហ្ស៊កហ្ស៊ី នៅមាត់សមុទ្រខ្មៅដែរ។
បន្ទាប់មក រថភ្លើងនេះ នឹងលូនតាមដែនដីហ្ស៊កហ្ស៊ី ឆ្លងចូលដែនដីអាស៊ែរបេដហ្សាន ហើយ ដើម្បីទៅដល់កាហ្សាក់ស្ថាន គឺត្រូវឆ្លងសាឡាងមួយលើកទៀត កាត់តាមសមុទ្រ Caspienne។
តាមការពន្យល់បំភ្លឺនៃ លោកប្រមុខរដ្ឋាភិបាលអ៊ុយក្រែន អារសេនី យ៉ាត់សេញុក គឺដោយមកពីបម្រាមហាមមិនឲ្យទំនិញអ៊ុយក្រែនដឹកឆ្លងកាត់ដែនដីរុស្ស៊ីទៀតឡើយ បានជាក្រុងគៀវ ស្វែងរកផ្លូវថ្មីសម្រាប់ដឹកទំនិញខ្លួន ទៅកាន់ទីផ្សារណា ដែលអ៊ុយក្រែននៅតែបន្តចាត់ទុក ជារបស់ខ្លួនដដែល។
ពួកអ្នកត្រាយផ្លូវថ្មីនេះ សង្ឃឹមថា វានឹងក្លាយទៅជា “ផ្លូវសូត្រ” សម័យថ្មី ដើរតួជំនួសផ្លូវដែលកាលពីមុន ធ្លាប់តែកាត់តាមដែនដីរុស្ស៊ី ក្នុងឋានៈជាច្រកនាំទំនិញអ៊ុយក្រែនចេញទៅក្រៅ។
ជាការកត់សម្គាល់ រុស្ស៊ីអនុវត្តបម្រាមនេះ គឺក្រោយពី កិច្ចព្រមព្រៀងស្តីអំពីការភ្ជាប់ខ្លួនរបស់អ៊ុយក្រែន ទៅនឹងលំហពាណិជ្ជកម្មសេរី របស់សហភាពអឺរ៉ុប ចូលជាធរមាន តាំងពីថ្ងៃ ទី១មករា ឆ្នាំ២០១៦នេះមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ