បារាំង ៖ អ្នកមើលថែក្មេងម្នាក់ត្រូវជាប់ចោទដោយបានអង្រួនកូនគេដល់ស្លាប់
ប្តីប្រពន្ធអ្នកមើលថែក្មេងមួយគូ ត្រូវជាប់ចោទ និងដាក់ឱ្យស្ថិតនៅក្រោមការត្រួតពិនិត្យតុលាការ បន្ទាប់ពីមានជាប់សង្ស័យថាបានអង្រួនក្បាលទារកអាយុ១០ខែ ខ្លាំងជ្រុល រហូតក្រឡកខួរ ហូរឈាមក្នុងក្បាលដល់ស្លាប់។ ការអង្រួនក្បាល ជាកាយវិការស្រាលសម្រាប់មនុស្សចាស់ តែផ្តល់ផលវិបាកមិនអាចស្តារបានឡើយចំពោះកុមារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ភ្នាក់ងារសង្គ្រោះបន្ទាន់ នៃមន្ទីរពេទ្យកុមារក្រុងប៉ារីស បានទទួលត្រួតពិនិត្យនិងព្យាបាលទារកអាយុ១០ខែនោះភ្លាម នៅពេលស្ត្រីមើលថែក្មេង ដឹកយកទៅពេទ្យ ដោយអះអាងថាក្មេងមានអាការៈមិនស្រួលខ្លួន។
ប៉ុន្តែនៅពេលឪពុកម្តាយបង្កើតមកដល់ ទើបក្រុមគ្រូពេទ្យបានពន្យល់អំពីអាការៈរោគសញ្ញា ថាបង្កឡើងដោយការអង្រួនក្បាលខ្លាំង។ ការវះកាត់ ពុះលលាដ៏ក្បាល ដើម្បីបូមឈាម ដែលហូរធ្លាយក្នុងខួរក្បាល ព្រមទាំងការព្យាបាលសម្រុកទាំងយប់ទាំងថ្ងៃ ជាច្រើនថ្ងៃ នៅតែមិនអាចជួយសង្រ្គោះជីវិតកុមារ១០ខែនេះបានឡើយ។
ពេលនេះ ស្ត្រីអ្នកមើលថែក្មេង អាយុ៥៤ឆ្នាំ ជាបុគ្គលិកផ្នែកទារកដ្ឋានរបស់សាលាក្រុង និងប្តីអាយុ៦៥ឆ្នាំ ត្រូវរងបទចោទប្រកាន់ និងដាក់ឱ្យស្ថិតនៅក្រោមការត្រួតពិនិត្យតុលាការ ជាថ្នូរនឹងបណ្តឹងសុំដាក់ឃុំឃាំងជាបណ្តោះអាសន្ន ស្នើឡើងដោយក្រុមគ្រួសារកុមាររងគ្រោះ។ ស្ត្រីរូបនេះមានបទពិសោធន៍ការងារ និងបានទទួលសិទ្ធិមើលថែកុមារ (ទារកដ្ឋានតាមផ្ទះ) តាំងពីឆ្នាំ១៩៩០មក មិនដែលមានឈ្មោះមិនល្អក្នុងបញ្ជីប៉ូលិសទេ។ ទាំងប្តី ទាំងប្រពន្ធ សុទ្ធតែបានបដិសេធ ថាមិនបានអង្រួនក្មេង ដែលជាដើមហេតុនាំឱ្យក្មេងបាត់ស្មារតីដួលសន្លប់ទេ។ ប្រសិនដូចការចោទប្រកាន់មែន នោះប្តីប្រពន្ធអ្នកមើលថែក្មេងនឹងត្រូវជាប់ពន្ធនាគារម្នាក់ៗ១៥ឆ្នាំ ពីបទហិង្សាលើក្មេងមិនទាន់ពេលវ័យ។
សូមបញ្ជាក់ថា ការចាប់អង្រួនក្មេង មួយវឹងដោយកំហឹង ឬដោយមិនប្រុងប្រយ័ត្ន ជាទង្វើស្រាលសម្រាប់មនុស្សចាស់ ប៉ុន្តែសម្រាប់ក្មេងក្រោមបីឆ្នាំ និងពិសេសទារក មួយវឹងមនុស្សចាស់ អាចគ្រោះថ្នាក់ដ៏ធ្ងន់ធ្ងរដល់ជីវិត ឬធ្វើឱ្យក្មេងពិការភ្នែកអស់មួយជីវិត និងមានការលូតលាស់ខួរក្បាលមិនប្រក្រតី រៀនមិនសូវចេះចាំ។ ការចាប់អង្រួន ធ្វើឱ្យក្បាលក្មេងងក់ងើៗ អាចធ្វើខួរក្បាលក្រឡក ទៅបុកប៉ះផ្ទៃលលាដ៏ក្បាល រួចបង្កឱ្យដាច់សរសៃឈាមខួរក្បាល ខ្ទាំឬហើមខួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ