រុស្ស៊ីមិនប្រើអាវុធគ្រាប់ផ្ទុះដើម្បីសងសិកតួកគីទេ តែនឹងប្រើអាវុធសេដ្ឋកិច្ច
ពីរថ្ងៃបន្ទាប់ពីយន្តហោះចម្បាំងរបស់រុស្ស៊ីមួយគ្រឿង ត្រូវបានតួកគីបាញ់បំផ្លាញ នៅស៊ីរី រុស្ស៊ីបានប្រកាសថាគេនឹងមិនប្រើអាវុធគ្រាប់ផ្ទុះ ដើម្បីសងសិកទៅនឹងទង្វើរបស់តួកគីទេ តែគេនឹងប្រើមធ្យោបាយសេដ្ឋកិច្ច ដើម្បីដាក់ទារុណកម្មលើតួកគី។ ស្របពេលដែលរដ្ឋាភិបាលរុស្ស៊ី កំពុងថ្កោលទោសតួកគី ថាមានចេត្តនា បង្កររឿង និងបង្អាក់បេសកកម្មរបស់រុស្ស៊ី ក្នុងការកម្ទេចក្រុមជីហាដ នៅឯក្រុងម៉ូស្គូ ស្ថានទូតតួកគី ត្រូវបានក្រុមបាតុករ យកដុំថ្មគុប និងវាយកម្ទេច។ ហេតុការណ៍បាញ់ទម្លាក់យន្តហោះរុស្ស៊ី នៅស៊ីរី ធ្វើឲ្យ គេមើលឃើញ កាន់តែច្បាស់ អំពីភាពស្ទើរស្ទាក់របស់តួកគី ក្នុងការចូលរួមកម្ទេច ក្រុមជីហាដអង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
វិមានក្រិមឡាំង បានប្រកាសឲ្យដឹងនៅថ្ងៃព្រហស្បតិ៍ទី ២៦ វិច្ឆិកាថា រុស្ស៊ីកំពុងត្រៀមអនុវត្តវិធានមួយចំនួន ដើម្បីឆ្លើយតបឲ្យសមនឹងទង្វើរបស់តួកគី។ ទង្វើតួកគី ដែលបានបាញ់ទម្លាក់យន្តហោះចម្បាំងរុស្ស៊ី បានធ្វើឲ្យរុស្ស៊ីចោទប្រកាន់ថា មេដឹកនាំតួកគី មានចេត្តនាបង្កររឿង ហើយម្យ៉ាងទៀត គឺវាសរបញ្ជាក់អំពីចេត្តរបស់តួកគី ក្នុងការបំផ្លាញការខិតខំប្រឹងប្រែងរបស់អន្តរជាតិ ដែលម្នាក់ៗកំពុងខ្នះខ្នែង បោសសម្អាតក្រុមជីហាដអង្គការរដ្ឋអ៊ីស្លាម។ តែផ្ទុយទៅវិញ តួកគីកំពុងយកជើងរាទឹក។
រុស្ស៊ីរិតតែក្តៅចិត្ត ព្រោះមកទល់ពេលនេះ ខាងតួកគី នៅមិនទាន់ សម្តែងការសុំទោសជាសាធារណៈ រឺមួយស្នើរសុំចេញសងជម្ងឺចិត្ត មកខាងរុស្ស៊ីទេ។ យ៉ាងណាមិញ លោក រដ្ឋមន្ត្រីការបរទេសតួកគី បានបញ្ជាក់ថា គឺតួកគី គ្មានថ្ងៃមកសុំទោសរុស្ស៊ី ជាដាច់ខាត ក្នុងរឿងនេះ។
ក្រោមការបង្គាប់ពីប្រធានាធិបតីពូទីន លោកមិដ វេដេវ នាយករដ្ឋមន្ត្រីរុស្ស៊ី បានកោះប្រជុំរដ្ឋមន្ត្រីពាក់ព័ន្ធ ដើម្បីដាក់ចុះនូវវិធានការមួយចំនួន ដើម្បីសងសឹកតួកគី។ វិធានការទាំងនោះ មានទាក់ទងដល់វិស័យជំនួញការនាំចេញនាំចូលរបស់ផលិតផលតួកគី វិស័យទេសចរណ៍ និងការដាក់ទុនវិនិយោគជាដើម។ បុគ្គលិកតួកគី ដែលកំពុងតែធ្វើការនៅរុស្ស៊ី ក៏អាចនឹងត្រូវបញ្ឈរជើងផងដែរ។
ក្នុងមួយឆ្នាំៗ មានអ្នកទេសចរណ៍ រុស្ស៊ីដែលទៅកម្សាន្តលេងនៅតួកគី ចំនួនយ៉ាងហោចណាស់៤លាននាក់។ ភ្លាមៗ ក្រោយព្រឹត្តិការណ៍បាញ់ទំលាក់យន្តហោះ រដ្ឋាភិបាលរុស្ស៊ី បានហាមប្រាម មិនឲ្យអ្នកទេសចរណ៍រុស្ស៊ី នាំគ្នាឈប់ទៅលេងនៅតួកគីទៀត។ ទាក់ទិននឹងវិស័យនាំចេញនំាចូល មានផលិតផលកសិកម្មជាច្រើនរបស់តួកគី ដែលអាចនឹងជួបការលំបាក។ ពន្ធនាំចូល នឹងត្រូវតម្លើង ចំណែកលក្ខខណ្ឌអនាម័យ និងសុខភាព នៃផលិតផលរបស់តួកគី ដែលនាំចូលរុស្ស៊ី នឹងត្រូវគេត្រួតពិនិត្យយ៉ាងតឹងតែង។
ដោយឡែក គម្រោងវិនិយោគធំៗ ក្នុងតម្លៃទឹកប្រាក់ រាប់ពាន់លានដុល្លារ អាចនឹងនៅនឹងថ្កល់ រឺត្រូវលុបចោលផងក៍ថាបាន។ នោះគឺគម្រោងសាងសង់រោងចក្រផលិតថាមពលនុយក្លេអ៊ែរមួយ នៅតួកគី ដែលរុស្ស៊ីជាអ្នកសាងសង់ និងគម្រោងសាងសង់បំពង់បង្ហូរឧស្ម័នហ្គាស ដែលរុស្ស៊ីចង់សង់ឆ្លងកាត់តួកគី ដើម្បីបញ្ជូនហ្គាសទៅលក់នៅអឺរ៉ុប។ ប៉ុន្តែយ៉ាងណាក៏ដោយ ការផ្អាក រឺលប់ចោលគម្រោងទាំងនេះ រុស្ស៊ីក៏ប្រាកដជាខាតមិនតិចដែរ។
ចំណែកនៅក្រុងម៉ូស្គូ បាតុកម្មតវ៉ា បានកើតមានឡើងនៅខាងមុខស្ថានទូតតួកគី ប្រចាំរុស្ស៊ី។ បាតុកររាប់រយនាក់ នាំគ្នាលើកបដាថ្កោលទោសប្រធាធិបតីតួកគី ដោយមានខ្លះសរសេរ និងបង្ហាញពីរូបលោក អ៊ែកដូហ្គាន់ ជាត្លុកអាយ៉ងរបស់ ក្រុមជីហាដអ៊ីស្លាមនៅស៊ីរី។ បាតុករបានយកដុំថ្ម ពងមាន់ ថ្នាំព័ណគុបបំផ្លាញជញ្ជាំងស្ថានទូត សឹងតែមើលលែងស្គាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ