ម៉ូស្គូ ព្រមានផ្តាច់ការបង្ហូរឧស្ម័នធម្មជាតិរបស់រុស្ស៊ី ទៅអ៊ុយក្រែន
រដ្ឋមន្ត្រីក្រសួងថាមពលរុស្ស៊ី ថ្ងៃ២៤វិច្ឆិកានេះ បានប្រកាសថា ម៉ូស្គូនឹងផ្តាច់ ការបង្ហូរឧស្ម័នខ្លួន ទៅផ្គត់ផ្គង់ដល់តម្រូវការ របស់អ៊ុយក្រែន មកពីក្រុងគៀវយឺតយ៉ាវ ក្នុង ការបង់លុយជាមុន មកឲ្យរុស្ស៊ី ចំពោះឧស្ម័នក្នុងបរិមាណជាក់លាក់ ដែលអ៊ុយក្រែនចង់បាន ពី រុស្ស៊ី។ មិនតែប៉ុណ្ណោះ រដ្ឋមន្ត្រីរុស្ស៊ី ក៏ថ្លែងដែរថា ម៉ូស្គូអាចឈប់ បញ្ជូនធ្យូងថ្មទៅអ៊ុយក្រែន ដើម្បី សងសឹកចំពោះ ការដែលអ៊ុយក្រែនផ្តាច់ចរន្តអគ្គិសនី ទៅកាន់កោះគ្រីមេ តាំងពីយប់ថ្ងៃសៅរ៏មក។
ចុះផ្សាយនៅថ្ងៃ៖
ស្តាប់ - ០២:០៨
“ ឫមួយល្ងាចថ្ងៃអង្គារនេះ ឫមួយ ព្រឹកថ្ងៃពុធស្អែក រុស្ស៊ីនឹងឈប់បង្ហូរឧស្ម័នខ្លួន ទៅ អ៊ុយក្រែន មកពីម៉ូស្គូ មិនបានទទួលប្រាក់ដែលក្រុងគៀវត្រូវបង់ជាមុន ដើម្បីទទួលឧស្ម័ន ពីរុស្ស៊ី តទៅទៀត” - សេចក្តីនេះថ្លែងដោយលោករដ្ឋមន្ត្រីក្រសួងថាមពលរុស្ស៊ី Alexandre Novak តាមការផ្សាយទូរទស្សន៍រដ្ឋរុស្ស៊ី Vesti ទាំងលម្អិតថា ទោះយ៉ាងណាក្តី ក៏សព្វថ្ងៃ អ៊ុយក្រែន ប្រើឧស្ម័នរុស្ស៊ី ក្នុងបរិមាណតិចជាងមុនឆ្ងាយ។
ជាការរំលឹក មូលហេតុដែលតម្រូវឲ្យក្រុងគៀវបង់ប្រាក់ជាមុន ដើម្បីទទួលបានឧស្ម័នពីរុស្ស៊ី គឺមកពីជាង១ឆ្មាំមុន ក្រោយពីអំណាចនៅអ៊ុយក្រែន ធ្លាក់ទៅក្នុងដៃ ពួកដែលបស្ចិមលោក និយម ពួកដែលស្រាប់តែក្អេងក្អាង កិកកុក មិនព្រមសងមករុស្ស៊ី នូវបំណុលចំពោះ ឧស្ម័ន ដែលអ៊ុយក្រែនបានប្រើទៅហើយ ហើយទម្រាំដោះស្រាយរួចដោយ មានអន្តរាគមន៍ពីខាង គណៈកម្មការអឺរ៉ុប ម៉្លោះហើយបានជាសម្រាប់រុស្ស៊ី ជាមេរៀនតែម្តង លុះទាល់តែដាក់ល័ក្ខខ័ណ្ឌ បែបនេះ នៅពីមុខក្រុងគៀវ។ ប្រាក់ដែលអ៊ុយក្រែនបានបង់លើកមុន គឺគ្រប់គ្រាន់សម្រាប់តែ រុស្ស៊ី បង្ហូរឧស្ម័នទៅអ៊ុយក្រែន រហូតដល់ល្ងាចនេះ ឫ ដល់ព្រឹកស្អែក។
ដោយមកពីទៀបកោះគ្រីមេ ដែលកាលពីមួយឆ្នាំកន្លះមុន បានឆ្លងមកជាដែនដីឧបសម្ព័ន របស់ រុស្ស៊ី ស្រាប់តែដាច់ភ្លើងលែងទទួលចរន្តអគ្គិសនីពីអ៊ុយក្រែន តាំងពីយប់ថ្ងៃសោរ៏មក បន្ទាប់ ពីពួកជាតិនិយមជ្រុលនៅអ៊ុក្រែន បានបំផ្ទុះបង្គោលនាំចរន្តអគ្គិសនីនោះ លោករដ្ឋមន្ត្រីក្រសួង ថាមពលរុស្ស៊ី ក្នុងបទអន្តរាគមន៍ខ្លួន ក៏ព្រមានក្រុងគៀវថា ម៉ូស្គូអាចឈប់បញ្ជូនធ្យូងថ្ម សម្រាប់ តម្រូវការនៃ ស្ថានីយអគ្គិសនី៦កន្លែង នៅអ៊ុយក្រែនដែលដើរដោយធ្យូងថ្ម បើ អាជ្ញាធរអ៊ុយក្រែន មិនធ្វើនូវរាល់អ្វីៗ ជាចាំបាច់សម្រាប់ ស្តារឡើងវិញនូវការផ្គត់ផ្គង់ភ្លើងដល់គ្រីមេ។ គួរនិយាយថា ដោយទទួលភ្លើងនេះ ពីអ៊ុយក្រែន គ្រីមេ បង់ក្នុង១ឆ្នាំៗ ទៅក្រុងគៀវ គឺទឹកប្រាក់ ៥០០លានដុល្លារ។
តបនឹងសំនួរស្តីអំពីវិធានការសងសឹក ជាយថាហេតុ លោករដ្ឋមន្ត្រីរុស្ស៊ីថ្លែងថា មានជម្រើស ប្លែកៗ សម្រាប់លើកយកមកអនុវត្ត តាំងពី វិស័យនយោបាយ រហូតដល់វិស័យសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ