ជនសង្ស័យមេគំនិតភេរវកម្មនៅប៉ារីស ត្រូវបាញ់សម្លាប់ តែបារាំងបន្តពន្យាភាពអាសន្ន
ការឡោមព័ទ្ធចាប់បណ្តាញក្រុមភេរវករ ដែលជាជនដៃដល់រៀបចំភេរវកម្មដ៏សាហាវ នៅក្រុងប៉ារីស បានធ្វើឡើងកាលពីព្រឹកថ្ងៃពុធ ទី ១៨ ដោយនគរបាលបារាំង បានចាប់បានមនុស្ស៨ នាក់ និងបានបាញ់សម្លាប់មនុស្ស២នាក់។ ទើបតែនៅថ្ងៃព្រហស្បតិ៍ ដោយយោងទៅលើលទ្ធផលធ្វើកោសល្យវិច្ច័យ លោករដ្ឋអាជ្ញាក្រុងប៉ារីស បានប្រកាសថា សាកសពភេរវជនដែលស្លាប់ គឺមានម្នាក់ ជាសាកសពរបស់ អាប់ឌែលហាមីដ អាបាអ៊ូដ។ ជននេះត្រូវបាននគរបាលសង្ស័យថា ជាមេក្លោងរៀបចំធ្វើភេរវកម្ម កាលពីថ្ងៃទី១៣ វិច្ឆិកា។
ចុះផ្សាយនៅថ្ងៃ៖
មួយថ្ងៃក្រោយ ពេលការឡោមព័ទ្ធចាប់ក្រុមភេរវជន នៅថ្ងៃព្រហស្បតិ៍ នគរបាលបារាំង បានប្រកាសថា សាកសពមួយ ក្នុងចំណោមសាកសពទាំងពីរដែលបានស្លាប់ គឺមានមួយពិតជាសាកសពរបស់ ភេរវជនឈ្មោះ អាប់ឌែលហាមីដ អាបាអ៊ូដ ពិតប្រាកដមែន។ នគរបាលបារាំង បានស្រាវជ្រាវឃើញភ្លាមៗថា ជនឈ្មោះ អាប់ឌែលហាមីដ អាបាអ៊ូដ នេះ គឺទំនងជាមេក្លោងដឹកនាំការធ្វើភេរវកម្ម កាលពីថ្ងៃទី ១៣ វិច្ឆិកា។ភេរវកម្មដ៏ធ្ងន់ធ្ងរ មិនធ្លាប់មានសម្រាប់បារាំង ដែលបានសម្លាប់ជីវិតជនស្លូតត្រង់ ១២៩នាក់ និងរបួសជាង៣០០នាក់។
ការឡោមព័ទ្ធ បាញ់តដៃគ្នា រវាងក្រុមភេរវករ និងនគរបាលពិសេសបារាំង បានធ្វើឡើងកាលពីថ្ងៃពុធ ធ្វើឲ្យកក្រើ ផ្អើលពេញតំបន់ Saint-Denis ភាគខាងជើងក្រុងប៉ារីស។ តាមការឲ្យព័ត៌មានពីសាក្សី បានប្រាប់នគរបាលបារាំងថា ជនមេក្លោងភេរវកម្ម ឈ្មោះ អាប់ឌែលហាមីដ អាបាអ៊ូដ ពិតជាកំពុងសំងំលាក់ខ្លួន នៅក្បែរក្រុងប៉ារីស ក្រោយពីបានបញ្ជាឲ្យបក្សពួករបស់ខ្លួន ចេញធ្វើភេរវកម្ម។ ការឡោមព័ទ្ធចាប់ បានធ្វើទៅដោយជោគជ័យ ហើយជននេះ បានស្លាប់ ក្រោមគ្រាប់កាំភ្លើងរបស់នគរបាលពិសេសបារាំង។ ជនឈ្មោះ អាប់ឌែលហាមីដ អាបាអ៊ូដ ជាជនជាតិប៊ែលហ្សិក មានអាយុ២៨ឆ្នាំ។ ជននេះ ធ្លាប់បានចេញចូលទៅស៊ីរី ហើយធ្លាប់ត្រូវបាននគរបាលសំងាត់អាមេរិកតាមដានផងដែរ ថាមានជាប់ពាក់ព័ន្ធ និងក្រុមភេរវនិយម។
ដោយឡែក លោករដ្ឋមន្ត្រីមហាផ្ទៃបារាំង បានថ្លែង ក្នុងសន្និសីទកាសែតថា នៅមានភេរវជនដ៏សំខាន់ម្នាក់ទៀត ដែលកំពុងតែសំងំលាក់ខ្លួន ហើយអាជ្ញាធរកំពុងតែតាមចាប់។ គឺជនឈ្មោះ សាឡាហ អាប់ដេស្លាម អាយុ២៦ឆ្នាំ ដែលជាជនដៃដល់បាញ់រះសម្លាប់មនុស្ស នៅក្នុងភោជនីដ្ឋាន នៅក្រុងប៉ារីស កាលពីយប់ថ្ងៃទី ១៣។ តាមរយៈសារនេះ អាជ្ញាធរបារាំង បានប្រកាសឲ្យមានការប្រុងប្រយ័ត្នជាទូទៅ ព្រោះក្រុមភេរវជន អាចមានគ្នាច្រើនជាងនេះ ហើយថាមិនត្រូវ ពួកគេអាចនឹងកំពុងរៀបចំភេរវកម្មថ្មីថែមទៀត។
យ៉ាងណាមិញ លោកនាយករដ្ឋមន្ត្រីបារាំង បានថ្លែងបញ្ជាក់ នៅមុខសភាបារាំងពីគ្រោះថ្នាក់ ដែលថាក្រុមភេរវជន អាចនឹងប្រើអាវុធ ដែលផ្សំពីជាតិពុលគីមី ដើម្បីធ្វើភេរវកម្មថ្មីផ្សេងទៀត។ បើទោះបីជាគ្មានអ្វីសំអាងឲ្យពិតប្រាដក ក៏ប៉ុន្តែរដ្ឋាភិបាលបារាំង សម្រេចចិត្តធ្វើការប៉ាន់ស្មាន ដើម្បីត្រៀមធ្វើការប្រុងប្រយ័ត្ន។ ឱសថដ្ឋាននានា ត្រូវបានអនុញ្ញាតិ ឲ្យលក់ថ្នាំបន្សាបផ្សេងៗ ដើម្បីទប់ស្កាត់ឥទ្ធិពលអាក្រក់ រឺបង្កាការពារពីជាតិពុលគីមី។
ចំណែកសភាបារាំង ទើបតែបានបោះឆ្នោតសម្រេច នៅព្រឹកថ្ងៃព្រហស្បតិ៍ដែរ ថានឹងពន្យាស្ថានភាពបណ្តោះអាសន្ន រហូតដល់រយៈពេល៣ខែ រហូតដល់ខែកុម្ភៈ។ ការដាក់ប្រទេស ឲ្យស្ថិតក្នុងភាពអាសន្ន និងអនុញ្ញាតិឲ្យអាជ្ញាធរបារាំង មានសិទ្ធិប្រើកម្លាំង ដើម្បីចេញប្រតិបត្តិការ ឡោមព័ទ្ធ ឆែកឆេរ ចាប់ជនសង្ស័យដាក់ឃុំរយៈពេលវែង និងធ្វើការត្រួតពិនិត្យចរាចរ ចេញចូលស្រុកបារាំង ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ