តើដ្រូនដែលតួកគីបាញ់ទម្លាក់ក្បែរព្រំដែនស៊ីរីជារបស់រុស្ស៊ីមែនឬ ?
យន្តហោះប្រដេញរបស់តួកគី បានបាញ់ទម្លាក់ដ្រូនមួយគ្រឿង ដែលបានហោះរំលោភចូលដែនអាកាសតួកគី ជាប់ព្រំដែនជាមួយស៊ីរី។ ក្នុងពេលភ្លាមនេះ (ល្ងាចថ្ងៃសុក្រទី១៦តុលានេះ) តួកគីមិនទាន់កំណត់អត្តសញ្ញាណថាជារបស់ប្រទេសណានៅឡើយទេ។ ប៉ុន្តែបើតាមអ្នកទទួលខុសត្រូវអាមេរិក ដ្រូននោះគឺជារបស់រុស្ស៊ី។ ចំណែកខាងម៉ូស្គូវិញ គ្រាន់តែបានឮសេចក្តីប្រកាសរបស់យោធាតួកគីភ្លាម ក៏បានចេញសេចក្តីប្រកាសព័ត៌មានដែរថា រាល់គ្រប់យានហោះរបស់រុស្ស៊ី បានត្រលប់ចូលលេនដ្ឋានវិញអស់ ឯដ្រូនបន្តធ្វើសកម្មភាពដូចធម្មតា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
បន្ទាប់ពីបានព្រមានបីលើកមិនស្តាប់ នៅទីបំផុតយោធាអាកាសតួកគីក៏បានប្រើសិទ្ធិស្របច្បាប់ បាញ់យន្តហោះគ្មានមនុស្សបើក ដ្រូន មួយគ្រឿង ដែលហោះចូលដែនអាកាសតួកគី ឱ្យធ្លាក់ ! ទូរទស្សន៍តួកគី បានបរិយាយថា ដ្រូនបានធ្លាក់ក្នុងទឹកដីតួកគីប្រមាណបីគីឡូម៉ែត្រពីព្រំដែនជាមួយស៊ីរី និងបានបង្ហាញរូបភាពទាហានកំពុងត្រួតពិនិត្យទីតាំងធ្លាក់ដ្រូន។
អាជ្ញាធរតួកគី មិនបានបញ្ជាក់ថាតើដ្រូននេះជារបស់ប្រទេសណាទេ ប៉ុន្តែអ្វីជាការកត់សម្គាល់ គឺគ្រាន់បានឮដំណឹងនេះភ្លាម ក្រសួងការពារជាតិរុស្ស៊ី ស្រាប់តែបានស្រែកអះអាងយ៉ាងទាន់ហន់ ថាគ្រប់យន្តហោះរបស់រុស្ស៊ី បានបកចូលលេនដ្ឋានគ្រប់ចំនួន ហើយ ដ្រូនរុស្ស៊ី មានដំណើរជាធម្មតាទាំងអស់។
រុស្ស៊ី បានបើកប្រតិបត្តិការផ្លូវអាកាសនៅប្រទេសស៊ីរី តាំងពីចុងខែកញ្ញាមក ដៅវាយប្រហារទម្លាក់គ្រាប់បែកលើទីតាំងរបស់ពួកភេរវនិយម នៅស៊ីរី រាប់ទាំងពួកអង្គការរដ្ឋអ៊ីស្លាម និងពួកឧទ្ទាមអ៊ីស្លាមមិនជ្រុលនិយម ជាអ្នកតស៊ូប្រឆាំងនឹងរដ្ឋាភិបាលក្រុងដាម៉ាសផង។ ប្រតិបត្តិការនេះត្រូវបានក្រុងអង់ការ៉ា ចាត់ទុកជាកំហុសដ៏ធ្ងន់ធ្ងរ និងបានធ្វើឱ្យទំនាក់ទំនងរវាងម៉ូស្គូនិងតួកគី មានភាពតានតឹងដាក់គ្នាយ៉ាងខ្លាំង ព្រោះយន្តហោះចម្បាំងរុស្ស៊ី បានរំលោភចូលដែនអាកាសតួកគី ជាញឹកញយ រហូតមានការព្រមានជាច្រើនលើកច្រើនសាពីសំណាក់ក្រុងអង់ការ៉ា។ កាលពីថ្ងៃទី ៣ តុលា យោធាអាកាសតួកគីបានពើបប្រទះនឹងយន្តហោះប្រដេញរុស្ស៊ី ក្នុងដែនអាកាសខ្លួន ដោយជាក់ស្តែងតែម្តង ទើបទាហានរុស្ស៊ី បង្ខំចិត្តបកក្រោយវិញ ក្រោមហេតុផលថាអាកាសធាតុមិនល្អ មើលព្រំដែនមិនច្បាស់។
តួកគី ជាសមាជិកអូតង់ ក៏បានចូលរួមធ្វើប្រតិបត្តិការផ្លូវអាកាស កម្ចាត់ពួកអង្គការរដ្ឋអ៊ីស្លាមនៅស៊ីរីដែរ។ ក្រុងអង់ការ៉ា ធ្លាប់បានបញ្ជាក់ជំហររបស់ខ្លួនយ៉ាងច្បាស់លាស់ និងបានទទួលបញ្ជាយ៉ាងដាច់ណាត់ ពីអគ្គមេបញ្ជាការយោធាជាតិ ឱ្យបាញ់ទម្លាក់រាល់គ្រប់យានយន្ត ឬ សូម្បីតែសត្វស្លាបណា ដែលហ៊ានហោះរំលោភដែនអាកាសតួកគី។ នេះជាការប្រកាសរបស់នាយករដ្ឋមន្ត្រីតួកគី កាលពីថ្ងៃទី ៥ តុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ