ជ័យជំនះរបស់គណបក្សឯករាជ្យ នៅតំបន់កាតាឡូញ អាចជាគ្រោះថា្នក់របស់អេស្ប៉ាញ
ការបោះឆ្នោតសភាតំបន់នៃតំបន់កាតាឡូញ ភាគឦសានប្រទេសអេស្ប៉ាញ បានបង្ហាញពីជោគជ័យ របស់គណបក្សបី ដែលជាក្រុមអ្នកឯករាជ្យនិយម ដែលមានបំណងទាមទារផ្តាច់ខ្លួនតំបន់នេះ ចេញពីប្រទេសអេស្ប៉ាញ។ ការបោះឆ្នោតសភាជាតិ ទូទាំងអេស្ប៉ាញក៏ខិតជិតមកដល់ ហើយជោគជ័យរបស់ ក្រុមអ្នកផ្តាច់ខ្លួននាពេលនេះ អាចជាគ្រោះថ្នាក់ធំ សម្រាប់រដ្ឋាភិបាលអេស្ប៉ាញ ព្រមទាំងឯកភាពជាតិទាំងមូល របស់អេស្ប៉ាញតែម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
គណបក្សឯករាជ្យនិយមនៅតំបន់ កាតាឡូញចំនួនបី បានទទួលជោគជ័យគួរឲ្យជាទីមោទន ក្នុងពេលបោះឆ្នោតសភាតំបន់ នៅតំបន់កាតាឡូញ ជាតំបន់នៅភាគឦសានអេស្ប៉ាញ ជាប់នឹងព្រំដែនបារាំង ដោយបានទទួលអាសន្នៈសរុបក្នុងសភាតំបន់នេះ ចំនួន៧៧ ក្នុងចំណោម ១៣៥អាសនៈ។ មេដឹកនាំគណបក្សទាំងបីនេះ បានសន្យាប្រហាក់ប្រហែលគ្នា ក្នុងន័យតែមួយ គឺបន្តទាមទារស្វ័យភាពតំបន់កាតាឡូញបន្តិចម្តងៗ រហូតទាល់តែបានឯករាជ្យ ផ្តាច់ខ្លួនចេញពីអេស្ប៉ាញ។
ចំនួនអ្នកមកបោះឆ្នោត មានច្រើនរហូតដល់ ជាង៧៧% ដែលនេះសបង្ហាញថា មតិប្រជាជនតំបន់កាតាឡូញទូទៅភាគច្រើន បានផ្តល់ការគាំទ្រ ដល់ក្រុមបក្សដែលចង់ផ្តាច់ខ្លួនពីអេស្ប៉ាញ។ សម្រាប់ក្រុមនេះ ជ័យជំនះនេះ គឺមានន័យថា ប្រជាជនបានផ្តល់នូវការទុកចិត្ត ដល់ក្រុមពួកគេ ដើម្បីធ្វើការតស៊ូទាមទារឯករាជ្យ។
នេះអាចជាគ្រោះថា្នក់សម្រាប់រដ្ឋាភិបាលអេស្ប៉ាញ របស់លោកនាយករដ្ឋមន្ត្រី ម៉ារីយ៉ាណូ រ៉ាចយ និងសម្រាប់ឯកភាពជាតិអេស្ប៉ាញទាំងមូលតែម្តង ជាពិសេសគឺការបោះឆ្នោតសភាជាតិអេស្ប៉ាញ នៅអាណត្តិខាងមុខ។ ប៉ុន្តែយ៉ាងណាក៏ដោយ លោកនាយករដ្ឋមន្ត្រីអេស្ប៉ាញ បានព្រមានថា រដ្ឋាភិបាលអេស្ប៉ាញ នឹងមិនលើកលែងឲ្យដល់សកម្មភាពទាំងឡាយណា ដែលផ្ទុយពីរដ្ឋធម្មនុញ្ញ និងមានចេតនាបំផ្លាញឯកភាពជាតិអេស្ប៉ាញ ជាដាច់ខាត។
ប៉ុន្តែបើយើងវិភាគឲ្យបានស៊ីជំរៅជាងនេះ ជ័យជំនះនេះមិនមែនមានន័យថា ប្រជាជនតំបន់កាតាឡូញភាគច្រើន បានបោះឆ្នោតដើម្បីផ្តាច់ខ្លួនចេញពីអេស្ប៉ាញទេ ព្រោះថាថ្វីបើក្រុមអ្នកឯករាជ្យនិយម បានអាសនៈភាគច្រើនមែនពិត ប៉ុន្តែបើនិយាយពីសម្លេងឆ្នោត គឺមានត្រឹមតែ៤៧,៨%តែប៉ុណ្ណោះ ពោលគឺស្មើនឹង ១លាន៩សែននាក់ ក្នុងចំណោមសម្លេងទាំងអស់ ៤លាននាក់។ ចង់បានឯករាជ្យទៅថ្ងៃមុខ គឺត្រូវឆ្លងកាត់ការធ្វើប្រជាមតិទូទៅមួយ ហើយគឺត្រូវការជាចាំបាច់ នូវសម្លេងភាគច្រើនដាច់ខាត នៃសម្លេងឆ្នោតទាំងអស់។
ទោះបីជាយ៉ាងណា យើងត្រូវទទួលស្គាល់ថា ចាប់ពីពេលនេះទៅ វាសនាតំបន់កាតាឡូញ និងឯកភាពជាតិអេស្ប៉ាញ នឹងត្រូវជួបភាពមិនប្រាកដប្រជា ក្នុងខណៈដែលសេដ្ឋកិច្ចអេស្ប៉ាញ នៅមិនទាន់ទាំងងើបមុខឡើងវិញ បានស្រួលបួលផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ