បារាំងដឹកមុខអឺរ៉ុបបើកផ្លូវមនុស្សធម៌ស្វាគមន៍អន្តោប្រវេសន៍
នាយករដ្ឋមន្ត្រីបារាំង អមដំណើរដោយរដ្ឋមន្ត្រីក្រសួងមហាផ្ទៃ និងស្នងការអឺរ៉ុប បានធ្វើដំណើរទៅកាត់ក្រុងកាឡេ ភាគខាងជើងប្រទេសបារាំង។ តំបន់ដែលអន្តោប្រវេសន៍មកផ្តុំកកកុញរង់ចាំរត់ឆ្លងសមុទ្ទទៅអង់គ្លេស។ លោកនាយករដ្ឋចង់បង្ហាញអំពីទំនួលខុសត្រូវរបស់បារាំងក្នុងវិបត្តិអន្តោប្រវេសន៍ដែលកំពុងញាំញីអឺរ៉ុប គ្រប់ជ្រុង ស្ទើរគ្រប់គ្រងលែងជាប់។
ចុះផ្សាយនៅថ្ងៃ៖
“អឺរ៉ុបកំពុងតែប្រមូលផ្តុំគ្នា រកដំណោះស្រាយប្រកបដោយសិល្បវិធី ដោយភាពវាងវៃ ដែលចាំបាច់ ក្នុងការទទួល និងផ្តល់ជំនួយមនុស្សធម៌” ! នេះជាប្រសាសន៍របស់លោក ម៉ានុយអែល វ៉ាល្ល ពេលអញ្ជើញទៅមជ្ឈមណ្ឌលទទួលជនភៀសខ្លួនកាឡេ។ សម្រាប់លោកនាយករដ្ឋមន្ត្រី ក៏ដូចជាស្នងការអឺរ៉ុបទាំងពីររូប គេមិនអាចរុញមនុស្សដែលត្រូវការការពារទៅវិញទេ អឺរ៉ុបមានមនុស្សធម៌ ព្រមទទួលជនភៀសខ្លួន តែមានភាពតឹងតែង កម្ចាត់ពួកមេខ្យល់ ពួករកស៊ីជួញដូរអន្តោប្រវេសន៍ និងបែងចែកច្បាស់លាស់រវាងជនអន្តោប្រវេសន៍ខុសច្បាប់ និងជនភៀសខ្លួនដែលស្វែងរកសិទ្ធិជ្រកកោនដើម្បីគេចពីសង្គ្រាមនិងសោកនាដកម្ម។
ក្នុងអត្ថន័យមនុស្សធម៌ បារាំងបានសន្យាយកថវិកាដែលអឺរ៉ុបព្រមផ្តល់ឱ្យ៥លានអឺរ៉ូបន្ថែមនៅថ្ងៃនេះ នៅសាងសង់ជំរំបណ្តោះអាសន្ន ដើម្បីទទួលជនអន្តោប្រវេសន៍ប្រមាណ១៥០០នាក់ និងបញ្ជូនជនកំពុងសុំសិទ្ធិជ្រកកោនទៅកាន់ទីតាំងផ្សេង។ សូមបញ្ជាក់ថា មជ្ឈមណ្ឌលជនភៀសខ្លួនកាឡេ ដ៏ប្រកបដោយនិម្មិតរូបដ៏ចម្រូងចម្រាស អាចទទួលមនុស្សជាអចិន្ត្រៃយ៍តែជាង១រយនាក់ប៉ុណ្ណោះ។ តែចំនួនជនអន្តោប្រវេសន៍សំកុកចាំឆ្លងទៅអង់គ្លេស កើនឡើងឥតឈប់ មានយ៉ាងហោចណាស់ជាងបីពាន់នាក់រស់នៅយ៉ាងអនាថានិងអាណោចអធម ក្នុងព្រៃគម្ពោតក្បែរនោះ មកទទួលរបបអាហារ និងទឹកស្អាត ឬបង្គន់នៅមណ្ឌលនេះ។
លោកនាយករដ្ឋមន្ត្រីបារាំងបានទៅទស្សនារូងផ្លូវរទេះភ្លើងក្រោមសមុទ្ទដែរ ព្រោះអង់គ្លេសទើបចេញលុយសាងសង់រនាំងដែកហើយ ទប់មិនឱ្យជនអន្តោប្រវេសន៍អាចបុករុលចូល ដោយខុសច្បាប់ ដូចកាលពីខែកក្កដា។
អឺរ៉ុបកំពុងវិលវល់យ៉ាងខ្លាំងនឹងរលកអន្តោប្រវេសន៍ ក្រោយពីចរន្តរត់ឆ្លងសមុទ្ទមេឌីរ៉ាណេ ស្លាប់ទាំងទូកៗ ពេលនេះជនភៀសខ្លួនមកពីស៊ីរី អ៊ីរ៉ាក់ ឬអាហ្វហ្កានីស្ថាន នាំគ្នាបុកចូលតាមច្រកខាងកើតបាល់កង់ម្តង។ ហុងគ្រី ដែលទើបដាក់សម្រាស់ដែកតាមព្រំប្រទល់ជាមួយនឹងសេរប៊ីរួច បានបញ្ជូនជនភៀសខ្លួនទាំងពាន់ៗនាក់តាមរទេះភ្លើងទៅអាល្លឺម៉ង់និងអូទ្រីស។ ហើយបើតាមព័ត៌មានទើបទទួលបាន មានបណ្តាជនស៊ីរីប្រមាណជាងមួយនាក់បានប្រថុយជីវិតរត់ឆ្លងមកអឺរ៉ុបតាមច្រកខាងជើងអាទិក កាត់តាមព្រំប្រទល់រុស្ស៊ីនិងណ័រវេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ