អាល្លឺម៉ង់នឹងចំណាយប្រាក់៦ពាន់លានអឺរ៉ូក្នុងវិស័យយោធា
កងទ័ពអាល្លឺម៉ង់ បានជួបប្រទះនូវការខ្វះខាតជាខ្លាំង ជាពិសេសខាងផ្នែកសម្ភារៈបរិក្ខា ព្រមទាំងយានដឹកជញ្ជូនផ្សេងៗ។ អ្នកនាំពាក្យក្រសួងការពារជាតិអាល្លឺម៉ង់ ទើបបានប្រកាសឲ្យដឹង នៅថ្ងៃសុក្រ ទី៧ សីហាថា រដ្ឋាភិបាលអាល្លឺម៉ង់ នឹងចំណាយប្រាក់ចំនួន៦ពាន់លានអឺរ៉ូ ដើម្បីទិញសម្ភារៈ និងយានយន្តបន្ថែម ដើម្បីអនុញ្ញាតឲ្យកងទ័ព អាល្លឺម៉ង់ មានលទ្ធភាព និងសមត្ថភាពគ្រប់គ្រាន់ ក្នុងការបំពេញបេសកកម្មនានា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
យោងតាមសម្តីរបស់អ្នកនាំពាក្យក្រសួងការពារជាតិអាល្លឺម៉ង់ បានឲ្យដឹងថា ក្នុងរយៈពេលពី ៧ទៅ៨ឆ្នាំខាងមុខនេះ រដ្ឋាភិបាលអាល្លឺម៉ង់ នឹងចំណាយប្រាក់ប្រមាណជា ៦ពាន់លានអឺរ៉ូ ដើម្បីធ្វើទំនើបកម្ម ក្នុងវិស័យយោធាអាល្លឺម៉ង់។ កាសែត Der Spiegel អាល្លឺម៉ង់ បានចុះផ្សាយនៅថ្ងៃសៅរ៍នេះ ដោយបានលើកឡើងពីបណ្តុំកម្មវិធីចំនួន ១២០ចំណុច ដែលបានដាក់ចុះដោយ Bundeswehr ក្រសួងការពារជាតិអាល្លឺម៉ង់។ ក្នុងចំណោមវិធានទាំងនោះ មានជាអាទិ៍ ដូចជា ការរើសបុគ្គលិកចូលបំរើការបន្ថែម ព្រមទាំងការបញ្ជាទិញសម្ភារៈបរិក្ខាទំនើបថ្មីៗ បន្ថែមទៀត។
សារព័ត៌មានដដែល បានចុះផ្សាយផងដែរ នូវសំណុំឯកសារមួយចំនួន របស់ក្រសួងការពារជាតិអាល្លឺម៉ង់ ដែលមានខ្លឹមសារ ធ្វើការសង្កេតទូទៅទៅលើការខ្វះចន្លោះ និងការលំបាក របស់កងទ័ពអាល្លឺម៉ង់ ដោយសារតែខ្វះសម្ភារៈ។ ជាឧទាហរណ៍ ដូចជាឧទ្ធម្ភាគចក្រដឹកជញ្ជូនប្រភេទ NH90 ក្នុងចំណោម៣៩គ្រឿង មានតែ៤គ្រឿងប៉ុណ្ណោះ ដែលប្រើការកើត។ ដូចគ្នាដែរ ការយឺតយ៉ាវ នៃការប្រគល់យន្តហោះដឹកជញ្ជូនយោធាប្រភេទ A400M ដែលផលិតដោយក្រុមហ៊ុនAirbus ក៏រិតតែបង្កការលំបាក ដល់កងទ័ពអាល្លឺម៉ង់ ក្នុងការបំពេញការងារ ផងដែរ។
គួររំលឹកផងដែរថា នៅប៉ុន្មានខែមុននេះដែរ កងទ័ពអាល្លឺម៉ង់ ត្រូវបានគេរិះគន់យ៉ាងខ្លាំង ទាក់ទិនទៅនឹង ឧបករណ៍តម្រង់គ្រាប់កាំភ្លើង ពីចម្ងាយ ដែលកាន់តែចាស់ ហើយមិនអាចតម្រង់គ្រាប់ ឲ្យត្រូវ១០០%។ លោកស្រី រដ្ឋមន្រ្តីការពារជាតិអាល្លឺម៉ង់ ក៏ធ្លាប់ទទួលស្គាល់ផងដែរថា កងទ័ពអាល្លឺម៉ង់ ពុំមានសមត្ថភាពគ្រប់គ្រាន់ ដើម្បីបំពេញបេសកកម្ម របស់អង្គការអូតង់ទេ។
ទោះបីជាយ៉ាងណាក៏ដោយ ការអភិវឌ្ឍន៍វិស័យយោធារបស់អាល្លឺម៉ង់ គឺជាចំណុចរសើបមួយ មិនថាតែមតិសាធារណៈអាល្លឺម៉ង់ រឺក៏ប្រជាជនអឺរ៉ុបផ្សេងទៀតទេ។ គេនៅចាំមិនភ្លេចទេថា សង្រ្គាមលោកដែលបានកើតឡើងទាំងពីរលើក គឺកងទ័ពអាល្លឺម៉ង់នេះឯងហើយ ដែលមានកម្លាំងខ្លាំងក្លា និងសាហាវ ប្រយុទ្ធទន្រ្ទានពាសពេញអឺរ៉ុបទាំងមូល។ ក្រោយចាញ់សង្រ្គាមលោកលើកទីពីរ កងទ័ពអាល្លឺម៉ង់ ត្រូវបានគេរិតត្បិត មិនឲ្យមានសកម្មភាពច្រើន រឺចេញប្រតិបត្តិការនៅបរទេសទេ។ ការពង្រឹងវិស័យយោធាអាល្លឺម៉ង់ នៅពេលនេះ ត្រូវបានគេព្រួយបារម្ភថា វាអាចជាសញ្ញាមួយមិនល្អ ដែលបង្ហាញថាមហិច្ឆិតាយោធាអាល្លឺម៉ង់ កំពុងតែងើបឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ