ប្រធានាធិបតីបារាំងចង់ផ្តើមគំនិតរៀបចំរចនាសម្ព័ន្ធទំបន់ចាយលុយអឺរ៉ូ
វិបត្តិបំណុលក្រិក ដែលកំពុងតែធ្វើឲ្យរង្គោះរង្គើសហភាពអឺរ៉ុប និងជាពិសេសក្រុមប្រទេសចាយលុយអឺរ៉ូ បានជំរុញថ្នាក់ដឹកនាំអឺរ៉ុប ឲ្យចាប់ផ្តើមរិះរកមធ្យោបាយ ដើម្បីបញ្ចៀសបញ្ហាបែបនេះ ទៅថ្ងៃក្រោយ។ លោក ប្រធានាធិបតីបារាំង ហ្វ្រង់ស័រ ហូឡង់ បានថ្លែងប្រាប់អ្នកកាសែត ក្នុងបទសម្ភាសន៍មួយនៅថ្ងៃអាទិត្យនេះ ថាបារាំងកំពុងពិចារណា ដើម្បីស្នើទៅកាន់ប្រទេសសមាជិកតំបន់ចាយលុយអឺរ៉ូផ្សេងទៀត នូវការរៀបចំបង្កើតជារចនាសម្ព័ន្ធគ្រប់គ្រងមួយ ដែលរឹងមាំ ដើម្បីការពារតំបន់ចាយលុយអឺរ៉ូ មិនឲ្យរលំខ្ចាត់ខ្ចាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:០៧
តើវិបត្តិបំណុលក្រិក បានផ្តល់ជាមេរៀនអ្វីខ្លះ ដល់សហភាពអឺរ៉ុប និងក្រុមប្រទេសចាយលុយអឺរ៉ូ?
ដូចយើងបានដឹងស្រាប់ហើយ ថាវិបត្តិបំណុលក្រិក បានធ្វើឲ្យរង្គោះរង្គើសហភាពអឺរ៉ុប។ រង្គោះរង្គើគឺដោយសារ តែវាបានធ្វើឲ្យសាមគ្គីភាពរបស់ប្រទេសសមាជិកសហភាពអឺរ៉ុប មានភាពផុយស្រួយ ដោយមានប្រទេសខ្លះចង់ជួយក្រិក ឯប្រទេសខ្លះទៀត មិនចង់ជួយក្រិកទេ។ មួយវិញទៀត វាក៏បង្ហាញផងដែរ ពីចំណុចខ្សោយរបស់តំបន់ចាយលុយអឺរ៉ូ។
យោងតាមបទពិសោធន៍ ដែលទាញចេញពីការដោះស្រាយវិបតិ្តបំណុលរបស់ក្រិក យើងឃើញថា តំបន់ចាយលុយអឺរ៉ូ មានលក្ខណៈស្មុគស្មាញ ហើយពុំមានយន្តការមួយ ដែលមានប្រសិទ្ធិភាព ក្នុងការពារ រឺក៏ស្រោចស្រង់ សមាជិករបស់ខ្លួននោះទេ។
លោក ដានីញែល កូអែន សាស្រ្តាចារ្យ នឹងជាអ្នកវិភាគសេដ្ឋកិច្ចម្នាក់ បានពន្យល់ថា បើអឺរ៉ុប មិនចង់ផុងខ្លួនកាន់តែជ្រៅ ទៅក្នុងវិបត្តិទេ ត្រូវប្រញាប់ ធ្វើកំណែទម្រង់ ព្រោះលោកយល់ថា រចនាសម្ព័ន្ធដែលអឺរ៉ុប មានសព្វថ្ងៃសម្រាប់តំបន់ចាយលុយអឺរ៉ូ គឺវាមិនគ្រប់គ្រាន់ទេ។ ពោលគឺវាមានក្បាលពីរ ម្ខាងជាគណកម្មការអឺរ៉ុប ដែលព្យាយាមសម្របសម្រួលការចរចា ឯម្ខាងទៀត ជាប្រទេសសមាជិកម្នាក់ៗ ដែលទាមទារប្រយោជន៍តែរៀងៗខ្លួន ក្នុងតុចរចា។ លោកថា ដូចក្នុងពេលចរចា អំពីកិច្ចព្រមព្រៀងស្តីពីគំរោងជួយក្រិកអញ្ចឹង អ្នកមកចូលរួមចរចា មានច្រើននាក់ពេក ដល់អញ្ចឹងទៅ និយាយអត់ទៅមុខទេ ព្រោះគ្មាននរណាស្តាប់នរណា។ ដូច្នេះអ្វីដែលជាមេរៀនសំខាន់ សម្រាប់អឺរ៉ុប គឺធ្វើយ៉ាងណា បង្កើតយន្តការថ្មី ឲ្យមានប្រសិទ្ធិភាព ក្នុងការការពារសេដ្ឋកិច្ចនៃតំបន់ចាយលុយអឺរ៉ូ ក៏ដូចជាការដោះស្រាយវិបត្តិ។
បង្កើតអង្គការគ្រប់គ្រងមួយ សភាមួយ ជាមួយនឹងកញ្ចប់ថវិកាពិសេស៖
លោកប្រធានាធិបតីបារាំង ដែលបានផ្តល់បទសម្ភាសន៍ ជូនសារព័ត៌មានប្រចាំថ្ងៃអាទិត្យ របស់បារាំង បានបញ្ជាក់ថា បារាំងត្រៀមខ្លួនជានិច្ច ក្នុងការធ្វើជាមេគំនិត ដើម្បីរៀបចំតំបន់ចាយលុយអឺរ៉ូ ឲ្យមានភាពរឹងមាំ។ លោកថា ថ្មីៗនេះ ក្នុងបរិបទនៃការដោះស្រាយវិបត្តិក្រិក យើងឃើញថា បារាំង និងអាល្លឺម៉ង់ បានចាប់ដៃគ្នាយ៉ាងស្អិត ដើម្បីត្រិះរិះ ទម្រាំបានកិច្ចព្រមព្រៀងមួយ ដែលបានបញ្ចៀស មិនឲ្យក្រិកបែកខ្ទាច ចេញពីតំបន់ចាយលុយអឺរ៉ូ។ តែលោកថា ប៉ុននេះ នៅមិនទាន់គ្រប់គ្រាន់ទេ។ លោកចង់ស្នើ ឲ្យបង្កើតជារចនាសម្ព័ន្ធថ្មី សម្រាប់គ្រប់គ្រងតំបន់ចាយលុយអឺរ៉ូ ដោយយោងទៅតាមយោបល់ របស់លោក ហ្សាក់ ឌឺល័រ អតីតប្រធានគណកម្មាធិការអឺរ៉ុប។
រចនាសម្ព័ន្ធទាំងនោះ គឺអាចជាការបង្កើត ជាអភិបាលគ្រប់គ្រង់មួយ ដើម្បីគ្រប់គ្រង តំបន់អឺរ៉ូ ព្រមជាមួយនឹងសភាមួយ ដើម្បីឃ្លាំមើលដំណើរការ នៃការគោរពលទ្ធិប្រជាធិតេយ្យរបស់រដ្ឋាភិបាលនេះ។ មានស្ថាប័នទាំងពីរនេះ គឺត្រូវមានកញ្ចប់ថវិកាពិសេស ដើម្បីឲ្យវាអាចដំណើរការទៅបាន។
តំបន់ អឺរ៉ូ មានលក្ខណៈស្មុគស្មាញ ការគ្រប់គ្រងគ្មានប្រសិទ្ធិភាព៖
គួររំលឹកផងដែរថា សហភាពអឺរ៉ុប ដែលយើងគ្រប់គ្នាស្គាល់ហ្នឹង គឺមានប្រទេសសមាជិកទាំងអស់២៨ ដែលមានស្ថាប័នចាត់ចែង ដូចជាក្រុមប្រឹក្សាអឺរ៉ុប គណកម្មាធិការអឺរ៉ុប និងសភាអឺរ៉ុប។ ចំណែក តំបន់អឺរ៉ូ រឺក៏ក្រុមប្រទេសចាយលុយអឺរ៉ូវិញ មានតែ១៩ប្រទេសទេ ដែលជាសមាជិក។ ពោលគឺជាបណ្តុំប្រទេសសមាជិកសហភាពអឺរ៉ុប ដែលចាយលុយអឺរ៉ូតែមួយ។ ប្រទេសទាំង២៨ របស់សហភាពអឺរ៉ុប មិនមែនចាយលុយអឺរ៉ូទាំងអស់គ្នាទេ។ តួយ៉ាងដូចជាអង់គ្លេស រឺដាណឺម៉ាក រដ្ឋាភិបាលគេបានជ្រើសរើសអត់ចាយលុយអឺរ៉ូ ដូចបារាំង រឺអាល្លឺម៉ង់ទេ។ ហើយប្រទេសផ្សេងទៀត ដែលចង់ចាយលុយអឺរ៉ូ តែមិនអាចចាយបាន ដោយសារតែសេដ្ឋកិច្ចនៅមិនទាន់ មានភាពរឹងមាំគ្រប់គ្រាន់។ បច្ចុប្បន្ននេះ តំបន់ចាយលុយអឺរ៉ូនេះ គឺគ្រប់គ្រង ដោយសា្ថប័នរួម របស់សហភាពអឺរ៉ុប ដែលមានក្រុមប្រឹក្សាអឺរ៉ុប គណកម្មការអឺរ៉ុប និងធនាគារកណ្តាលរបស់អឺរ៉ុប។
ដូច្នេះ បើតាមសម្តីរបស់លោកហ្វ្រង់ស័រ ហូឡង់ ដោយបានស្រង់គំនិត របស់លោក ហ្សាក់ ឌឺល័រ គឺគាត់ចង់បង្កើតជាស្ថាប័នពិសេសថ្មីដាច់ដោយឡែក សម្រាប់តែ ក្រុមប្រទេសចាយលុយអឺរ៉ូតែម្តង។ គំនិតនេះ វាប្រហាក់ប្រហែលនឹងអ្វី ដែល លោក ដានីញែល កូអែនបានលើកឡើងដែរ ព្រោះថា រាល់ថ្ងៃនេះ ការចរចេសម្រេចសេចក្តីផ្សេងៗ គឺធ្វើជុំគ្នាទាំងអស់ ដែលធ្វើឲ្យមានការយឺតយ៉ាវ។ ដូច្នេះ បើសិនជាមានស្ថាប័នគ្រប់គ្រង ដាច់ដោយឡែក ក្នុងការ ចាត់វិធានការផ្សេងៗ វាហាក់ដូចជាក្រុមប្រទេសចាយលុយអឺរ៉ូ មានមេមានកើយត្រឹមត្រូវ មិនមែនម្នាក់ៗ យកតែរួចខ្លួន ដូចសព្វថ្ងៃនេះទេ។
កសាងឆន្ទៈរួម នៃសាមគ្គីភាព និងការជួយយកអាសារគ្នា ក្នុងគ្រួសារអឺរ៉ូ៖
ឆ្លងកាត់ការដោះស្រាយវិបត្តិនៅក្រិក យើងឃើញថា គ្រួសារអឺរ៉ុប សឹងតែបែកខ្ញែក ព្រាត់ប្រាសគ្នាទៅហើយ។ ក្រិក សឹងតែត្រូវគេបណ្តេញចេញ ឈប់ឲ្យចាយលុយអឺរ៉ុប។ យ៉ាងណាមិញ មានថ្នាក់ដឹកនាំមួយចំនួន នៅតែទាមទារថាឲ្យក្រិកចេញពីតំបន់ចាយលុយអឺរ៉ូ។ មូលហេតុអ្វី បានជា មានអ្នកមិនចង់ជួយក្រិក គឺដោយសារតែគេយល់ថា បើទុកក្រិក គេនឹងមានបន្ទុក ត្រូវស្រាក់លុយគ្នាយកទៅជួយក្រិក។ ចំណុចនេះហើយ ដែលរដ្ឋាភិបាលបារាំង ព្យាយាមប្រយុទ្ធតស៊ូ ព្រោះថាសម្រាប់បារាំង ប្រទេសតំបន់ចាយលុយអឺរ៉ូទាំងអស់ ជិះទូកជាមួយគ្នា គេមិនអាចឲ្យនរណាម្នាក់ ធ្លាក់ទឹកបានទេ។ មុននឹងឡើងជិះទូកជុំគ្នា ទាំងអស់គ្នាបានសន្យាហើយថា ត្រូវចេះជួយ យកអាសារគ្នា។
ដើម្បីកសាងគ្រួសារមួយឲ្យរឹងមាំ ទាល់តែយើងសាងសង់ផ្ទះមួយឲ្យរឹងមាំ និងមានមេគ្រួសារដែលរឹងប៉ឹង ចេះគិតវែងឆ្ថាយ ជាមុនសិន ទើបកូនចៅ វាមិនបែកខ្ញែកគ្នា ម្នាក់ទៅឆ្វេង ម្នាក់ទៅស្តាំ។ ដូចគ្នាដែរ គំនិតលោកហ្វ្រង់ស័រហូឡង់ ដែលចង់បង្កើតជារចនាសម្ព័ន្ធគ្រប់គ្រងនេះ គឺវាប្រៀបដូចជាការកសាងផ្ទះ និងមេគ្រួសារអញ្ចឹង។ ដូច្នេះ តែកាលណា យើងមានការគ្រប់គ្រងត្រឹមត្រូវ វានឹងមានភាពងាយស្រួល ក្នុងការសម្រុះសម្រួល ក៏ដូចជាបង្កើតឲ្យមានគំនិតស្រលាញ់ ជួយយកអាសារគ្នា ទៅវិញ ទៅមក នៅក្នុងគ្រួសារ អឺរ៉ុប។
វិបត្តិក្រិក ជាកំហុសមួយផ្នែកធំ របស់មូលនិធិរូបិយវត្ថុអន្តរជាតិ៖
តាមការពិត វិបត្តិក្រិក មិនមែនជាកំហុសរបស់ក្រិកទាំងស្រុង រឺក៍ជាកំហុសរបស់សហភាពអឺរ៉ុបទាំងស្រុងដែរ។ កំហុសមួយចំណែក ដែលគេទទួលស្គាល់ គឺជារបស់មូលនិធិរូបិយវត្ថុអន្តរជាតិ ដោយសារតែ មូលនិធិនេះ ជាអ្នកផ្តល់កម្ចី ទៅឲ្យក្រិក ទាំងគ្មានយន្តការមួយច្បាស់លាល់ ដើម្បីបញ្ចៀសក្រិក កុំឲ្យវ័នក។ មូលនិធិនេះខ្លួនឯង ថែមទាំងបាន ទទួលស្គាល់ទៀតផង ថាមិនគួរ ទុករឿងឲ្យធ្ងន់ធ្ងរ ដល់ថ្នាក់នេះទេ។ អញ្ចឹងហើយ បានមូលនិធិនេះ បានសំណូមពរថា បើចាំបាច់ គេសុខចិត្តលប់ចោលបំណុល និងកាប្រាក់ខ្លះ ដើម្បីជួយសម្រាលបន្ទុករបស់ក្រិក។
ដំណោះស្រាយ ដោយការលប់បំណុល មួយចំណែក និង ពន្យាពេលសងនេះ ត្រូវបានអ្នកជំនាញសេដ្ឋកិច្ច ភាគច្រើនយល់ស្រប ប៉ុន្តែផ្ទុយទៅវិញ អឺរ៉ុប ដែលមានអាល្លឺម៉ង់ជាមេនាំអាទិ៍ទៅវិញទេ ដែលបានបដិសេធដាច់អហង្ការ ដោយសារអី្វ គឺដោយសារមានះ ចង់យកឈ្នះរដ្ឋាភិបាលក្រិក។
ចរិកមានះនយោបាយរបស់អាល្លឺម៉ង់ យកឈ្នះលើតថភាពសេដ្ឋកិច្ចរបស់ក្រិក៖
ថ្ងៃអាទិត្យ ទៅ ១៩ កក្កដា លោក ដូមីនីក ស្រ្តូស្កាន់ អតីតអគ្គនាយក មូលនិធិរូបិយវត្ថុអន្តរជាតិ បានសរសេរអត្ថបទមួយ សរសើរបែបចំអក ស្តីពីជោគជ័យរបស់អឺរ៉ុប ក្នុងការបញ្ចុះបញ្ចូលក្រិក ឲ្យព្រមទទួលយកសំណើរកំណែទម្រង់។ យោងតាមអ្វីដែលលោកសរសេរ លោកថា បញ្ហាក្រិក ជាបញ្ហាពីរ ទីមួយគឺក្នុងបរិបទសេដ្ឋកិច្ច និងទីពីរគឺបរិបទនយោបាយ។ ប៉ុន្តែក្នុងការលៈទេសៈនេះ អាល្លឺម៉ង់ បានមានះ យកឈ្នះលើរដ្ឋាភិបាលក្រិក ក្នុងន័យវាយប្រហារនយោបាយ ជាជាងចង់ជួយសេដ្ឋកិច្ចក្រិក។ គ្មាននរណាសង្ឃឹមទេ ថាគម្រោងកំណែទម្រង់ថ្មី ដែលអឺរ៉ុបដាក់សង្កត់ទៅលើក្រិក នឹងអាចជួយក្រិក បាននោះទេ ព្រោះវាប្រៀបបីដូច ជាដាក់ប្រទេសក្រិកទាំងមូល ទៅបញ្ចាំនៅធនាគារអញ្ចឹង។
ដូច្នេះបើសរុបមកវិញ អ្វីដែលមិនអាចប្រកែកបាន គឺ តំបន់ចាយលុយអឺរ៉ូ ត្រូវតែធ្វើកំណែទម្រង់ ព្រោះអ្វីដែលកើតឡើងកន្លងមកនេះ បញ្ជាក់ថាម្នាក់ៗគ្មាននរណាស្តាប់នរណាទេ។ ប៉ុន្តែកំណែទម្រង់របៀបណាក៏ដោយ គឺត្រូវធ្វើយ៉ាងណា បង្កើតយន្តការឲ្យមានប្រសិទ្ធិភាព ដើម្បីធានាទំនុកចិត្ត ព្រមទាំងការសាមគ្គីគ្នា រវាងប្រទេសសមាជិក មិនមែនជាការសម្រេចរបស់អាល្លឺម៉ង់ រឺបារាំងតែម្នាក់ឯងនោះទេ។ ចូរកំភ្លេចថា វិបត្តិក្រិក នៅមិនទាន់ដោះស្រាយ បានចប់សព្វគ្រប់នៅឡើយទេ ស្រួសមិនស្រួល បន្តិចទៀត ក្រិកកាន់តែផុងខ្លួន ហើយត្រូវដើរចេញពីតំបន់អឺរ៉ូ នៅថ្ងៃខាងមុខ ក៏ថាបានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ