ពូទីន និង អ៊ែរដូហ្កាន់ ជួបជជែកគ្នានៅក្រុងបាគូ ស្តីពីការកសាងបំពង់បង្ហូរឧស្ម័ន
វេទិកាប្រកូតកីឡាអឺរ៉ុប ដែលកំពុងតែបើកធ្វើឡើងនៅទីក្រុងបាគូ រដ្ឋធានីប្រទេសអាហ្ស៊ែកបៃហ្សង់ នៅថ្ងៃសៅរ៍ទី ១៣ មិថុនានេះ គឺជាឱកាសមួយ ដែលលោក ពូទីន ប្រធានាធិបតីរុស្ស៊ី បានជួបជជែកគ្នា ដោយផ្ទាល់ជាមួយលោក អ៊ែរដូហ្កាន់ ប្រធានាធិបតីតួគី។ តាមការរាយការណ៍របស់ អ្នកយកព័ត៌មានផ្លូវការ របស់រុស្ស៊ី បានបញ្ជាក់ថាថ្នាក់ដឹកនាំទាំង ពីរនឹងជជែកគ្នា ពីគម្រោងសាងសង់បំពង់បង្ហូរឧស្ម័ន ព្រមទាំងវិបត្តិនៅប្រទេសស៊ីរី ផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
ទីក្រុងបាគូ រដ្ឋធានីប្រទេសអាហ្ស៊ែកបៃហ្សង់ បានបើកឆាករៀបចំការប្រកួតកីឡាអឺរ៉ុប នៅថ្ងៃសៅរ៍ទី ១៣មិថុនា។ ពិធីសម្ភោធប្រកួតកីឡាអឺរ៉ុប ប៉ុន្តែគ្មានថ្នាក់ដឹកនាំប្រទេសអឺរ៉ុបខាងលិចណា ទៅចូលរួមទាល់តែសោះ ដោយសារតែគេនាំគ្នាធ្វើពហិការ ប្រឆាំងនឹងប្រទេសអាហ្ស៊ែកបៃហ្សង់ ទាក់ទងនឹងការរំលោភបំពានសិទ្ធិមនុស្ស របស់រដ្ឋអំណាចប្រទេសនេះ។
យ៉ាងណាក៏ដោយ លោក អ៊ែរដូហ្កាន់ ប្រធានាធិបតីតួគី និងលោក ពូទីន ប្រធានាធិបតីរុស្ស៊ី បានចូលរួមក្នុងកម្មវិធីនេះ ដើម្បីឆ្លៀតឱកាសជួបពិភាក្សាគ្នាលើកិច្ចការសំខាន់មួយចំនួន។ លោក ពូទីន បាននិយាយបែបចំអក ថា តួគីមកចូលរួមកម្មវិធី គឺតំណាងឲ្យសហភាពអឺរ៉ុបទាំងមូលហើយ មិនបាច់ចាំអ្នកផ្សេងទៀតមកក៏បានដែរ។ នេះជាសម្តីលេងសើច ក្នុងន័យពេបជ្រាយ ដោយសារតែតួគី មានចេតនា ក្លាយជាសមាជិករបស់សហភាពអឺរ៉ុប។
លោកពូទីន ដែលអមដំណើរដោយ រដ្ឋមន្រ្តីការបរទេសរុស្ស៊ី នឹងមន្ត្រីរុស្ស៊ី ទទួលបន្ទុកកិច្ចការថាមពល ព្រមទាំងលោក Alexis Miller ប្រធានក្រុមហ៊ុន Gazprom រុស្ស៊ីផងដែរនោះ បានជួបពិភាក្សាគ្នា ដោយបិទទ្វារជិត ជាមួយភាគីតួគី។ សំណុំរឿងសំខាន់ ដែលត្រូវជជែកគ្នា គឺគម្រោងសាងសង់បំពង់បង្ហូរឧស្ម័ន ដែលរុស្ស៊ីចង់សាងសង់ឆ្លងកាត់ប្រទេសតួគី ដើម្បីនាំយកឧស្ម័ន ទៅលក់នៅអឺរ៉ុបខាងលិច។ ក្រៅពីចំនុចនេះ ថ្នាក់ដឹកនាំទាំងពីរ ក៏បានពិភាក្សាគ្នា ពីបញ្ហាវិបតិ្តនៅស៊ីរីផងដែរ។
សូមបញ្ជាក់ថា គម្រោងសាងសង់បំពង់បង្ហូរឧស្ម័នធម្មជាតិ ដែលមានឈ្មោះថា TurkStream ត្រូវបានរុស្ស៊ីស្នើរឡើង ដើម្បីបង្ហូរឧស្ម័នចេញពីតំបន់សមុទ្រកាសព្យែន ក្នុងទឹកដីរុស្ស៊ី កាត់តាមក្រោមសមុទ្រខ្មៅ ក្នុងដែនទឹកតួគី។ បន្ទាប់មកទៀត បំពង់បង្ហូរនឹងធ្វើការចែកចាយ កាត់តាមទេស ប៊ុលហ្គារី និងក្រិក ដើម្បីនាំឧស្ម័ន ចូលទៅដល់ប្រទេសផ្សេងៗ នៅប៉ែកអឺរ៉ុបខាងលិច។
គួរបញ្ជាក់ផងដែរថា គម្រោងនេះ គឺរុស្ស៊ីបានស្នើឡើង ដើម្បីបញ្ចៀស កុំឲ្យរំពឹងតែលើការបង្ហូរឧស្ម័ន កាត់តាមដីអ៊ុយក្រែន។ បច្ចុប្បន្ននេះ ៦០%ភាគរយនៃឧស្ម័នរបស់រុស្ស៊ី ដែលនាំចូលទៅអឺរ៉ុប គឺកាត់តាមអ៊ុយក្រែនទាំងអស់។ ដោយឡែក គម្រោង TurkStream នេះក៏គឺជាគម្រោង របស់រុស្ស៊ី ដើម្បីប្រជែងជាមួយគម្រោងរបស់ សហភាព អឺរ៉ុបមួយ ដែលមានឈ្មោះថាNabucco ដែលជាគម្រោងសាងសង់បំពង់បង្ហូរឧស្មន័ដែរ តែកាត់តាមដីគោកតួគី ហើយមិនមានការចូលរួមពីសំណាក់ ក្រុមហ៊ុនGazprom របស់រុស្ស៊ីទេ។ តួគី បានបញ្ចេញឥរិយាបថ ជ្រើសរើសយកគម្រោងរបស់រុស៊្សី ប៉ុន្តែកិច្ចសន្យាផ្លូវការនៅមិនទាន់បានចុះហត្ថលេខានៅឡើយទេ។ បើតាមការសន្និដ្ឋាន គឺភាគីទាំងពីរនៅមិនទាន់ត្រូវគ្នា លើតម្លៃឧស្ម័ន។ ដោយឡែក ខាងរុស្ស៊ីបានអះអាងថា បើត្រូវរ៉ូវគ្នា ការដ្ឋានសាងសង់ នឹងចាប់ផ្តើមនៅចុងខែនេះ តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ