អូតង់ ផ្តើមសមយុទ្ធថ្មី នៅក្បែរព្រំដែនពាយ័ព្យប្រទេសរុស្ស៊ី
លំហាត់សឹកថ្មីរបស់បក្សសម្ព័ន្ធអូតង់ ចូលរួមដោយយោធា ៦.០០០នាក់ រថក្រោះធុន Abrams និងយន្តហោះទម្លាក់គ្រាប់បែកធុនធ្ងន់ B-52 បានចាប់ផ្តើម ថ្ងៃចន្ទ ទី ១មិថុនា នៅតាម ៣ប្រទេសបាល់ត៍ និង ប៉ូឡូញ ដើម្បីផ្តល់ភាពកក់ក្តៅ ដល់រដ្ឋទាំងនេះ ដែលព្រួយបារម្ភនឹងមហិច្ឆតា ពីខាងមហាប្រទេសជិតខាងរុស្ស៊ី តាំងពីនៅអ៊ុយក្រែនមានផ្ទុះឡើង ជាវិបត្តិ អស់ជាងមួយឆ្នាំមកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ប្រទេសរុស្ស៊ី បានបង្កើនវត្តមានយោធានៅតំបន់មាត់សមុទ្របាល់ទិក ជាទីដែលមាន ប្រទេសលីទុយអានី ឡេតូនី អេស្តូនី ស្ថិតនៅ ជាពិសេស បង្កើនក្នុងលំហអាកាសរបស់គេ ហេតុដែលដាស់ស្មារតីគេឲ្យភិតភ័យនិងខ្វល់ខ្វាយជាថ្មី ក្រោយពីគេធ្លាប់បាន ខាឃាំង ដោយ រនាំងដែក សហភាពសូវៀត លុះមកទល់ឆ្នាំ១៩៩០។
ពួកប្រទេសសមាជិកអូតង់ បាននាំគ្នាឆ្លើយតបនឹងភាពសកម្មនៃវត្តមាននេះរបស់រុស្ស៊ី ដោយធ្វើកាន់តែញឹកញយលំហាត់សឹកនៅអឺរ៉ុបខាងកើត។
“សមយុទ្ធទាំងនេះ ស្ថិតក្នុងចំណោម សមយុទ្ធធំៗបង្គួរចាត់ចែងឡើងនៅលីទុយអានី តាំងពីប្រទេសនេះ បានចូលជាសមាជិកអូតង់ក្នុងឆ្នាំ២០០៤មក” - សេចក្តីនេះ ថ្លែងទៅពួកអ្នកកាសែត នៅរដ្ឋធានី វិលញូស ដោយលោកឧត្តមសេនីយលីទុយអានី Almantas Leika មេបញ្ជាការកងទ័ពជើងគោកលីទុយអានី។ គាត់បន្ថែមថា ៖ វត្តមានដ៏ក្រាស់ក្រែលនៃកងទ័ពសម្ព័ន្ធមិត្ត ស ឲ្យឃើញ ពីសាមគ្គីភាពអូតង់ជាមួយបណ្តាប្រទេសនៅតំបន់ ដែលមានព្រំដែនជាប់នឹងរុស្ស៊ី។
ជាសរុប មាន១៣ប្រទេសនៃបក្សអាត្លង់ទិកខាងជើង ចូលរួមក្នុងសមយុទ្ធឈ្មោះ “Saber Strike ឆ្នាំ២០១៥“ ដែលចាត់ចែងឡើង ក្រោមការឧបត្ថម្ភរបស់ ស.រ.អា.។
លីទុយអានី ឡេតូនី អេស្តូនី ដែលត្រូវបានបញ្ចូលទាំងបង្ខំ ទៅក្នងសហភាពសូវៀត នៅចន្លោះពីកណ្តាលទសវត្សរ៍ទី៤០ គឺពីពេលចប់ទៅនៃសង្គ្រាមលោកលើកទី២ លុះរហូតដល់ឆ្នាំ១៩៩១ ឆ្នាំ ដែលគេបានឯករាជ្យ ពីសហភាពសូវៀតវិញ បច្ចុប្បន្ននាំគ្នាភ័យខ្លាចមែនទែន ខ្លាចក្រែងរុស្ស៊ីពាំនាំអស្ថិរភាពដល់ស្ថានការណ៍ផ្ទៃក្នុងប្រទេសគេ ម៉្លោះហើយបានជា ក្នុងខែមុន គេទទូចសុំឲ្យពួកយោធាអូតង់ វត្តមានជាអចិន្ត្រៃយ៍ជាច្រើនពាន់នាក់តែម្តង នៅត្រង់តំបន់នោះ។
ប៉ុន្តែ អ្នកនាំពាក្យផ្លូវការ របស់ក្រសួងការពារជាតិ លីទុយអានីលោក Mindaugas Neimontas បានថ្លែងទៅ AFP ថា “អូតង់នៅមិនទាន់ឆ្លើយតបនៅឡើយ នឹងសំណូមពរនេះរបស់គេ”។
លំហាត់សឹក “Saber Strike ឆ្នាំ២០១៥” ដែលនឹងពន្យារទៅរហូតដល់ថ្ងៃ ១៩មិថុនា មានន័យ ជាចម្លើយម្យ៉ាងតបនឹងសមយុទ្ធឥតប្រកាសឲ្យដឹងជាមុននៅរុស្ស៊ី ក្នុងសប្តាហ៍កន្លងទៅ ដែលត្រូវបានចូលរួមដោយយោធាដល់ ១២.០០០នាក់ និង យន្តហោះ២៥០គ្រឿងឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ