ប្រធានាធិបតីគុយបា បំពេញទស្សនកិច្ចនៅបុរីវ៉ាទីកង់
នៅថ្ងៃអាទិត្យទី ១០ឧសភានេះ លោក រ៉ាអ៊ូល កាស្ត្រូ ប្រធានាធិបតីគុយបា បានអញ្ជើញទៅដល់បុរីវ៉ាទីកង់ តាំងពីព្រលឹម ដើម្បីចូលជួបសម្តេចប៉ាប ហ្វ្រង់ស័រ។ ក្នុងឱកាសជាទស្សនកិច្ច ប្រកបដោយអត្ថន័យនេះប្រធានាធិបតីគុយបា បានជូនផ្ទាំងគំនូរ រូបជនភៀសខ្លួនដល់សម្តេចប៉ាប ព្រោះគុយបាចង់ថ្លែងអំណរគុណដល់វ៉ាទីកង់ ដែលបានដើរតួនាទី យ៉ាងសកម្មជាអន្តរការី ក្នុងការចរចានយោបាយ ចងភ្ជាប់គុយបានិងអាមេរិកឱ្យមានទំនាក់ទំនងជាធម្មតានឹងគ្នាឡើងវិញ។
ចុះផ្សាយនៅថ្ងៃ៖
ស្តាប់ - ០២:១០
ទស្សនកិច្ចរបស់ប្រធានាធិបតីកុម្មុយនិស្តគុយបា នៅវ៉ាទីកង់ថ្ងៃនេះ ប្រព្រឹត្តទៅតែបួនខែមុនការនិមន្តទៅក្រុងឡាហាវ៉ានរបស់សម្តេចប៉ាប ហ្វ្រង់ស័រ។
សម្តេចប៉ាប ហ្វ្រង់ស័រ បានទទួលជួបលោក រ៉ាអ៊ូល កាស្ត្រូ នៅបុរីវាទីកង់ ជាលក្ខណៈឯកជនបំផុត។ ប្រធានាធិបតីគុយបាមុនដែលជាបងប្រុស ធ្លាប់បានអញ្ជើញមកវ៉ាទីកង់នៅឆ្នាំ១៩៩៦ ដើម្បីរៀបចំទស្សនកិច្ចរបស់សម្តេចប៉ាប ហ្សង់ប៉ូល២ នៅគុយបាឆ្នាំ១៩៩៨ និងជាការបើកផ្លូវឱ្យមានទំនាក់ទំនងជាមួយវិហារកាតូលិកនិងរដ្ឋគុយបាឡើងវិញផង និងរវាងគុយបាជាមួយបណ្តាប្រទេសជិតខាងដូចយ៉ាងអាមេរិកផង។
វ៉ាទីកង់បានដើរតួយ៉ាងសំខាន់សម្រាប់វិបត្តិផ្ទៃក្នុងគុយបា។ សូមបញ្ជាក់ថាវិហារកាតូលិកគុយបា ធ្លាប់ចេញមុខប្រឆាំងនឹងរដ្ឋាភិបាលកុម្មុយនិស្ត របស់លោក ហ្វីដែលកាស្រ្តូ ក្នុងទសវត្សឆ្នាំ១៩៦០ និងរួមរស់យ៉ាងត្រដាបត្រដួសនៅក្នុងសង្គមគុយបា នៅរវាងពីទសវត្សឆ្នាំ ៧០-៨០-៩០។ វិហារកាតូលិក ជាស្ថាប័នក្រៅផ្លូវការ តែទទួលស្គាល់ដោយរដ្ឋាភិបាលចាប់ផ្តើមមានមុខ ក្លាយគូសន្ទនាជាមួយរបបកុម្មុយនិស្ត និងចូលរួមចំណែកធ្វើកំណែទម្រង់សេដ្ឋកិច្ចជាតិ ចាប់ពីឆ្នាំ២០១០ប៉ុណ្ណោះ។
ផ្នែកទំនាក់ទំនងអន្តរជាតិ វ៉ាទីកង់បន្តខ្នះខ្នែងឥតដាច់ នៅឆ្នាំ២០១២ សម្តេចប៉ាប បឺណ័រទី ១៦ បាននិមន្តទៅឡាហាវ៉ានដែរ ដោយអំពាវនាវឱ្យអាជ្ញាធរគុយបាគោរពមូលដ្ឋានគ្រឹះនៃសេរីភាព និងថ្កោលទោសទណ្ឌកម្មអាមេរិក។ នៅខែតុលាឆ្នាំ២០១៤ សម្តេចប៉ាបហ្វ្រង័ស័រ បានសរសេរលិខិត ជាលក្ខណៈបុគ្គលទៅលោក រ៉ាអ៊ូល កាស្ត្រូ និងទៅលោកបារ៉ាក់អូបាម៉ា ឱ្យប្រមុខដឹកនាំទាំងពីរដោះស្រាយវិបត្តិមនុស្សធម៌រួម។ វ៉ាទីកង់ បានទទួលប្រតិភូអាមេរិកនិងគុយបា ឱ្យចូលតុចរចា ដោយស្ងាត់ៗ ដែលលទ្ធផល ជាប្រវត្តិសាស្ត្រ បង្ខិតអាមេរិកនិងគុយបាឱ្យរាប់អានគ្នាវិញ ត្រូវបានប្រកាសដោយប្រធានាធិបតីទាំងពីរក្នុងពេលតែមួយ កាលពីចុងឆ្នាំ២០១៤ ក្រោមក្រសែភ្នែកភ្ញាក់ផ្អើលរបស់ពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ