បោះឆ្នោតសភាអង់គ្លេស ៖ យុទ្ធនាការឃោសនាចប់ ការចរចាចងសម្ព័ន្ធភាពស្ងាត់ៗបានចាប់ផ្តើម
ការបោះឆ្នោតសភាអង់គ្លេស នឹងប្រព្រឹត្តទៅនៅថ្ងៃទី ៧ ឧសភា ស្អែកនេះ។ នៅក្នុងថ្ងៃបិទបញ្ចប់យុទ្ធនាការឃោសនាបោះឆ្នោត ប្រមុខដឹកនាំបក្សនយោបាយធំៗ បានសម្រុកចេញបង្អួតបង្ហាញកម្មវិធីនយោបាយរបស់ខ្លួនពេញផ្ទៃប្រទេស ក្នុងក្តីសង្ឃឹមទាក់ទាញសំឡេងពលរដ្ឋឱ្យបានច្រើនបំផុតតាមតែអាច។ បើតាមការស្ទង់មតិ គណបក្សអភិរក្សរបស់នាយករដ្ឋមន្ត្រីកាន់អំណាច និងគណបក្សពលករ (ឆ្វេងនិយម) ដែលជាគូប្រជែងនឹងគ្នារាប់ទសវត្សរ៍មកហើយ បានទទួលសំឡេងគាំទ្រប្រកៀកប្រកិតគ្នាបំផុត ម្នាក់ៗប្រមាណតែ៣៣% តាំងពីបីខែមុនមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
បេក្ខជនបក្សនីមួយៗ បានបង្ហាញស្ទីល បញ្ចេញអស់នូវអំណះអំណាងដែលមាន ក្នុងថ្ងៃបញ្ចប់យុទ្ធនាការបោះឆ្នោតនេះ។
សុន្ទរកថារបស់លោក ដេវីត កាមឺរោន នាយករដ្ឋមន្ត្រីផុតអាណត្តិនៃបក្សអភិរក្សនិយម មានលក្ខណៈវាយវ័តខ្លាំងណាស់ ដែលធ្វើឱ្យគេគិតថាជាដង្ហើមចុងក្រោយ អស់អីលោតទៀតហើយ។ នៅថ្ងៃអង្គារម្សិលមិញ ពេលចុះឃោសនាពីចុងប៉ូចភាគខាងត្បូងបំផុតនៃប្រទេស មកដល់ទីក្រុងឡុងដ៍ លោក ដេវីត កាមឺរោន បានព្រមានជាថ្មី អំពីគ្រោះថ្នាក់នៃសម្ព័ន្ធភាពដឹកនាំប្រទេសរវាងបក្សពលករ និងបក្សជាតិនិយមអេកូស ថាអាចនឹងធ្វើឱ្យសេដ្ឋកិច្ចអង់គ្លេសហិនហោច។
ជាចម្លើយតប លោក អេដ ម៉ីលីបេន Ed Miliband នៃបក្សពលករ ដែលជាគូប្រជែងដ៏ធំរបស់បក្សអភិរក្ស បានវាយបកវិញថាគណបក្សឆ្វេងនិយមរបស់លោកនឹងស្រោចស្រង់ប្រព័ន្ធសុខាភិបាលប្រទេស ដែលកំពុងត្រដាបត្រដួស។ ចំណែកបេក្ខជននៃបក្សសេរីប្រជាធិបតេយ្យ លោក នីក ក្លេក Nick Clegg ដែលកំពុងចងសម្ព័ន្ធភាពក្នុងរដ្ឋាភិបាលចម្រុះផុតអាណត្តិវិញ បានបិទបញ្ចប់យុទ្ធនាការ ២០០០គីឡូម៉ែត្រ បានអះអាងថា មានតែបក្សរបស់លោកមួយគត់ដែលអាចធានាស្ថិរភាពឱ្យមាននិងក្នុងរង្វង់រដ្ឋាភិបាលចម្រុះ និងដែលបញ្ចៀសបានការជាប់គាំង រួចរៀបចំការបោះឆ្នោតម្តងទៀតបាន។
សម្តីរបស់អ្នកសេរីប្រជាធិបតេយ្យនេះមិនខុសទេ ! គ្រប់គណបក្សនយោបាយ បានចាប់ផ្តើមចរចានៅក្រៅឆាករួចទៅហើយ អំពីលទ្ធភាពនៃការចងសម្ព័ន្ធភាពបង្កើតរដ្ឋាភិបាលចម្រុះ។ ព្រោះបើតាមការស្ទង់មតិ គណបក្សអភិរក្ស និងពលករ ជាគូប្រជែងធំទាំងពីរ កំពុងមានកម្លាំងប្រហាក់ប្រហែលគ្នា។ គេមើលឃើញកាន់តែច្បាស់ថាគ្មានគណបក្សណាមួយអាចទទួលបានសំឡេងគាំទ្រដាច់ខាត សម្រាប់ដឹកនាំប្រទេសតែម្នាក់ឯងបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ