រុស្ស៊ី បាត់បង់នាវាអវកាសផ្ទុកស្បៀងមួយគ្រឿង ដែលពុំបានទៅដល់ទីដៅ
គឺកាលពីថ្ងៃ២៨មេសា ដែលនាវាអវកាសរុស្ស៊ី ធុន Progress M-27 M ផ្ទុកដោយស្បៀងទម្ងន់ ២តោនកន្លះ បានត្រូវបង្ហោះចេញពីផែនដីទៅ ដើម្បីនាំវាយកទៅផ្គត់ផ្គង់ដល់តម្រូវការនៃក្រុមអវកាសយានិកអន្តរជាតិរុស្ស៊ី-អាមេរិកាំង-អ៊ីតាលី មានគ្នា៦នាក់ ដែលកំពុងស្នាក់នៅធ្វើការស្រាវជ្រាវ ក្នុង ស្ថានីយអវកាសអន្តរជាតិ SSI ហោះ នៅកំពស់ ៤២០គ.ម. ជុំវិញផែនដី ប៉ុន្តែដោយមកពីមូលហេតុបច្ចេកទេស នាវានោះពុំបានទៅដល់ទីដៅឡើយ។
ចុះផ្សាយនៅថ្ងៃ៖
ស្តាប់ - ០២:០៥
ទីភ្នាក់ងារអវកាសរុស្ស៊ី RosCosmos បានឲ្យដឹងថា គឺថ្ងៃ២៨មេសា ដែលយានអវកាស Progress M-27 M ផ្ទុកស្បៀង ត្រូវបានបង្ហោះចេញទៅ តាមរយៈកាំជ្រួច ធុន Soyuz វេលាម៉ោង ១០ព្រឹក ហើយរំលង៦ម៉ោងមក គឺនៅម្តុំម៉ោង ១៦ វាត្រូវទៅតភ្ជាប់នឹង ស្ថានីយអវកាស អន្តរជាតិ SSI នៅកំពស់ ៤២០គ.ម. ប៉ុន្តែ ពេលដែលហោះដល់កំពស់ទើប ២៧០គ.ម. វាស្រាប់តែ វិលវល់អណ្តែត ក្នុងលំហអវកាសដ៏ល្វឹងល្វើយ។
ការវិភាគធ្វើដោយ មជ្ឈមណ្ឌលរុស្ស៊ីខាងគ្រប់គ្រងការហោះហើរនៅអវកាស សឲ្យឃើញថា មូលហេតុមកពី ពេលដែលម៉ូទ័រកាំជ្រួច នៃផ្នែកទី៣ ជាផ្នែកចុងក្រោយនៃកាំជ្រួចSoyuz ត្រូវច្រាននាវា Progress នោះ ឲ្យដាច់ចេញពីតួចុងក្រោយនៃកាំជ្រួច ដើម្បីឲ្យនាវានោះ ហោះតម្រង់ទៅស្ថានីយ SSI តែម្តង ហាក់បីមានការផ្ទុះឆេះ បណ្តាលឲ្យបំណែក ដែលគេរាប់ទៅឃើញដល់ ៤៤បំណែកឯណោះ នៃផ្នែកចុងក្រោយរបស់កាំជ្រួចនោះ បុកជាមួយនឹងនាវា Progress ផ្ទាល់ ទាល់តែរាំងស្ទះដល់ ដំណើរទៅមុខរបស់នាវា។
គួរនិយាយថា ការច្រានកាំជ្រួច ឲ្យហោះឡើង ប្រព្រឹត្តទៅជាដំណាក់ៗ។ មុនពេលនេះ ផ្នែក២ដំបូងនៃ កាំជ្រួច ត្រូវបានម៉ូទ័រកាំជ្រួច ច្រានឡើង ក្នុងរបបប្រក្រតីធម្មតា។
អ្វីជាការកត់សម្គាល់ នាវា Progress បង្ហោះចេញទៅលើកនេះ គឺទន្ទឹមនឹងស្បៀង បានផ្ទុកទៅ ជាមួយទាំង ទង់ជ័យជំនះ ឧទ្ទិសដល់ខួប៧០ឆ្នាំ នៃជ័យជំនះប្រទេសរុស្ស៊ី លើរបបហ្វាស៊ីសអាល្លឺម៉ង់ ក្នុងមហាសង្គ្រាមការពារជាតិ ដែលត្រូវប្រារព្ធនៅថ្ងៃ៩ឧសភាខាងមុខ។ រីឯ ក្នុងស្បៀង ២តោនកន្លះនោះ គឺមាន ទឹកសម្រាប់ហូប ៤២០គីឡូក្រាម ខ្យល់អុកស៊ីហ្ស៊ែន សម្រាប់ដកដង្ហើម ៥០គីឡូក្រាម និង ឥន្ធនៈ៥០០គីឡូក្រាម សម្រាប់ស្ថានីយ SSI ផ្ទាល់។
តាមការប្រមាណឃើញ នៃពួកអ្នកឯកទេសនាវា Progress ដែលខូចទៅហើយនោះ នឹងធ្លាក់មកលើផែនដី គឺនៅចន្លោះពី ថ្ងៃ ៥ ដល់៧ឧសភាខាងមុខ។ ហើយពេលធ្លាក់នោះ បំណែកវា នឹងឆេះខ្ទេច ក្នុងស្រទាប់ក្រាស់ឃ្មឹក នៃបរិយាកាសដែលព័ទ្ធជុំវិញផែនដី។ សម្រាប់រដ្ឋរុស្ស៊ី ការខាតបង់នេះ គឺក្នុងទឹកប្រាក់ប្រមាណ ១០០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ