IMFស្វាគមន៍ចិនក្នុងការបង្កើតធនាគារវិនិយោគហេដ្ឋារចនាសម្ព័ន្ធអាស៊ី
គម្រោងបង្កើតធនាគារវិនិយោគហេដ្ឋារចនាសម្ព័ន្ធអាស៊ី (BAII ឬ AIIB)បានទទួលការគាំទ្រកាន់តែច្រើនឡើងៗ។ នៅថ្ងៃចន្ទទី ២៣មីនា នេះ នាឱកាសបំពេញទស្សនកិច្ច៥ថ្ងៃ នៅក្នុងប្រទេសចិន លោកស្រីអគ្គនាយិកាអង្គការមូលនិធិរូបិយវត្ថុអន្តរជាតិ គ្រីស្ទីន ឡាហ្កាដ (Christine Lagarde) បានសម្តែងការស្វាគមន៍នឹងគំនិតផ្តួចផ្តើមរបស់ចិន និងត្រៀមធ្វើសហប្រតិបត្តិការជាមួយនឹងធនាគារវិនិយោគហេដ្ឋារចនាសម្ព័ន្ធអាស៊ីថ្មីនេះ។ គម្រោងបង្កើតធនាគារដែលប្រទេសធំៗនៅអឺរ៉ុបប្រកាសចូលហ៊ុន តែវ៉ាស៊ីនតោន បដិសេធ។
ចុះផ្សាយនៅថ្ងៃ៖
មិនត្រឹមតែលើកសរសើរអំពី កិច្ចខិតខំប្រឹងប្រែងរបស់មហាអំណាចសេដ្ឋកិច្ចទីពីរនៅលើលោក ក្នុងការប្រយុទ្ធប្រឆាំងនឹងអំពើពុករលួយ និងការបញ្ចេញផ្សែងបំពុលបរិស្ថានទេ លោកស្រីនាយិកាមូលនិធិរូបិយវត្ថុអន្តរជាតិថែមទាំងបានសម្តែងការស្វាគមន៍ ចំពោះគំនិតផ្តួចផ្តើមផ្សេងៗទៀតរបស់ចិន មានជាអាទិ៍គម្រោងបង្កើតធនាគារវិនិយោគហេដ្ឋារចនាសម្ព័ន្ធអាស៊ី។ IMF រីករាយនឹងធ្វើការជាមួយធនាគារថ្មីនេះ។ នេះជាប្រសាសន៍លោកស្រី គ្រីស្ទីន ឡាហ្កាដ។
ប្រទេសជាច្រើននៅអឺរ៉ុប រាប់ទាំងបារាំង អង់គ្លេស អាល្លឺម៉ង់ អ៊ីតាលី បានប្រកាសឱ្យដឹងអំពីឆន្ទៈចង់ចូលរួមបង្កើតធនាគារនេះ ជាមួយចិន កាលពីសប្តាហ៍មុន។ មានតែសហរដ្ឋអាមេរិកនិងជប៉ុនប៉ុណ្ណោះ ដែលបដិសេធ ដោយសំអាងថារដ្ឋាភិបាលចិនអាចធ្វើការខ្ជីខ្ជា ងាយឱ្យខ្ចី និងយល់ថាជាធនាគារដែលប្រជែងជាមួយធនាគារអភិវឌ្ឍន៍អាស៊ី(ADB) និងជាមួយធនាគារពិភពលោក។ អាមេរិកថែមទាំងបានព្រមានបណ្តាប្រទេសអឺរ៉ុបឱ្យគិតគូរឡើងវិញមុននឹងសម្រេចចិត្តដាក់ទុនបង្កើតធនាគារដែលមានប្រាក់ដើម៥០ពាន់លានដុល្លារ និងដែលចិនមានភាគហ៊ុនពាក់កណ្តាល។
ធនាគារពិភពលោក មិនបានជំទាស់នឹងគំនិតរបស់ចិនទេ លោកស្រីអគ្គនាយិកាធនាគារពិភពលោក បានអះអាងនៅថ្ងៃចន្ទនេះ ថាមានកង្វះធំធេងណាស់នៅក្នុងវិស័យវិនិយោគហេដ្ឋារចនាសម្ព័ន្ធនៅអាស៊ី។ ដូច្នេះគេត្រូវតែស្វាគមន៍រាល់គំនិតផ្តួចផ្តើមដែលអាចប្រមូលហិរញ្ញវត្ថុទៅបំពេញផ្នែកខ្វះខាតនោះ។
ដោយឡែក ឆ្លៀតពេលកំពុងបំពេញទស្សនកិច្ចនៅក្នុងប្រទេសចិន លោកស្រីនាយិកាមូលនិធិរូបិយវត្ថុ បានប្រកាសថា IMF នឹងសហការយ៉ាងស្អិតល្មួតជាមួយរដ្ឋាភិបាលក្រុងប៉េកាំង ដើម្បីបញ្ចូលប្រាក់យ័នទៅក្នុងចំណោមរូបិយបណ្ណរបស់មូលនិធិ និងបានចាត់ទុកកំណើនសេដ្ឋកិច្ចប្រចាំឆ្នាំទាបមិនធ្លាប់មាន (៧,៥%) របស់ចិនថាដំណឹងវិជ្ជមាន ព្រោះអាចបញ្ជាក់បាន អំពីឆន្ទៈរបស់រដ្ឋាភិបាលក្នុងការធ្វើកំណែទម្រង់សេដ្ឋកិច្ចឱ្យមានលំនឹង មានតម្រូវការក្នុងស្រុក។ បើតាមលោកស្រី កំណើនសេដ្ឋកិច្ចតិចតែប្រាកដ និងយូរអង្វែង ជាប្រការល្អសម្រាប់ចិន និងពិភពលោកទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ