ប្រមុខដឹកនាំប្រទេសជាង៤០រូប ចូលរួមដង្ហែក្បួនប្រឆាំងភេរវនិយម និងដើម្បីសេរីភាព នៅប៉ារីស
ថ្ងៃអាទិត្យទី ១១មករា នេះ ប៉ារីសបានក្លាយជាទីណាត់ជួបគ្នា របស់ពិភពលោក ដើម្បីបរិហារប្រឆាំងនឹងអំពើភេរវនិយម ! គេរំពឹងថាមនុស្សម្នាប្រមាណជាងមួយលាននាក់ ដោយរួមមានទាំងប្រមុខរដ្ឋ ប្រមុខរដ្ឋាភិបាល មកពីជិត៥០ប្រទេស នឹងត្រូវមកចូលរួមដង្ហែក្បួន ក្បែរប្រធានាធិបតីបារាំង លោកហ្វ្រង់ស័រហូឡង់។ ជាការដង្ហែក្បួនក្នុងទ្រង់ទ្រាយធំជាពិសេស និងប្រកបដោយអត្ថន័យ អាចកត់ត្រាបានក្នុងប្រវត្តិសាស្ត្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៥០
ការដង្ហែក្បួនដែលគ្មានផ្អាកសញ្ញា គ្មានបដា គ្មានជ័យឃោស ត្រូវបានរៀបចំឡើងបន្ទាប់មានការបាញ់ប្រហារសម្លាប់អ្នកកាសែតរបស់ ទស្សនាវដ្តីCharlie Hebdo ការបាញ់សម្លាប់ប៉ូលិសនៅកណ្តាលថ្នល់ និងការចាប់ចំណាប់ខ្មាំងនៅហាងលក់ទំនិញជ្វីហ្វ... ក្នុងរយៈពេលបីថ្ងៃ ពីថ្ងៃពុធដល់ថ្ងៃសុក្រល្ងាចម៉ោង៥ ម៉ោងដែលប៉ូលិសកម្ចាត់ភេរវជនជីហាតទាំងបីនាក់បាន មនុស្ស១៧នាក់បានស្លាប់ ...
ដើម្បីការពារសេរីភាព សិទ្ធនៃការបញ្ចេញមតិ លទ្ធិប្រជាធិបតេយ្យ ប្រឆាំងនឹងដាច់ខាតអំពើភេរវនិយម ពលរដ្ឋរាប់លាននាក់បាននាំគ្នាក្រោកឈរឡើង ចុះដើរដង្ហែក្បួន តាមគ្រប់ខេត្តក្រុងនៃប្រទេសបារាំង និងនៅរដ្ឋធានីក្នុងបណ្តាប្រទេសផ្សេងៗនៅលើលោក មានជាអាទិ៍ នៅញូវយ៉ក វ៉ាស៊ីនតោន សហរដ្ឋអាមេរិក កាណាដា និងក្រុងជាច្រើនទៀតរបស់អឺរ៉ុប អាហ្វ្រិក ឬអាស៊ី។
ជាការប្រមូលផ្តុំ និងដង្ហែក្បួនដែលមានទ្រង់ទ្រាយនិងលក្ខណៈពិសេសមិនធ្លាប់មានពីមុនមកឡើយ ទាំងផ្នែកបរិមាណ និងទម្រង់ ៖ មិនដែលមានប្រធានាធិបតីណាចុះធ្វើបាតុកម្មទេ គិតចាប់តាំងពីឆ្នាំ១៩៩០មក ឬថានេះជាលើកទីពីរហើយ ដែលបារាំងមានប្រធានាធិបតីចុះថ្នល់ជាមួយពលរដ្ឋ គិតចាប់សង្គ្រាមលោកលើកទីពីរមក។ គេនៅចាំបានថាកាលពីថ្ងៃ១៤ឧសភា ១៩៩០ លោកហ្វ្រង់ស័រ មីតេរ៉ង់ ជាប្រធានធិបតីបារាំងទីមួយដែលចុះធ្វើបាតុកម្មប្រឆាំងនឹងការរើសអើងពូជសាសន៍។
អ្នកចូលរួមដង្ហែក្បួន
ម្យ៉ាងទៀត ក្រៅអំពីមានចំនួនពលរដ្ឋចូលរួមច្រើន សមាជិករដ្ឋាភិបាលទាំងមូល តំណាងសភាព្រឹទ្ធសភា គណបក្សនយោបាយ គ្រប់ព៌ណរបស់បារាំង ព្រមទាំងសហគមន៍សាសនាផ្សេងៗ នៅមានឥស្សរជននយោបាយបរទេស ជិត៥០រូបផ្សេងទៀត នឹងមកបំប៉ោងក្បួន តាមដងផ្លូវ កណ្តាលក្រុងប៉ារីស ឱ្យកាន់តែធំ។
ប្រមុខដឹកនាំរដ្ឋ រដ្ឋាភិបាលបរទេស ក្នុងក្បួន ៖ លោកស្រី ប្រមុខរដ្ឋាភិបាលអាល្លឺម៉ង់ លោក ដេវីត កាមឺរោន នាយករដ្ឋមន្ត្រីអង់គ្លេស ប្រមុខរដ្ឋាភិបាលអ៊ីតាលី អេស្ប៉ាញ ប្រធានគណៈកម្មាការអឺរ៉ុប លោក Jean-Claude Juncker។ ប្រធានាធិបតីអាមេរិក បារ៉ាក់អូបាម៉ា គ្មានវត្តមាននាពេលនេះ មែនតែបានបញ្ជូនតំណាងពិសេសគឺរដ្ឋមន្ត្រីក្រសួងយុត្តិធម៌។ ព្រះមហាក្សត្រនិងមហាក្សត្រីយានីហ្ស័កដានី ប្រមុខរដ្ឋនិងរដ្ឋាភិបាលនៃបណ្តាប្រទេសមកពីទ្វីបអាហ្វ្រិក៦រូប និងជាពិសេស ប្រមុខដឹកនាំអ៊ីស្រាអែល និងប៉ាឡេស្ទីន។
វត្តមានរបស់លោក នេតាន់យ៉ាហ៊ូ និងប្រធានដែនដីប៉ាឡេស្ទីន មះមូតអាបាស ទាំងពីរនាក់នៅក្នុងក្បួនបាតុកម្ម គឺពិតជាមានតម្លៃជានិមិត្តរូបខ្លាំងណាស់ !
កម្មវិធីនិងការដើរដង្ហែក្បួន
តាំងពីព្រឹក លោកហ្វ្រង់ស័រហូឡង់ បានទទួលជួបតំណាងសហគមន៍ជ្វីហ្វ ព្រោះការចាប់ចំណាប់ខ្មាំងនៅប៉ារីសកាលពីថ្ងៃសុក្រមានលក្ខណៈរើងអើងប្រឆាំងនឹងសហគមន៍នេះ។ បន្ទាប់មក លោកប្រធានាធិបតីបានបើកជំនួបប្រជុំពេញអង្គដ៏ធំមួយ ដែលមានវត្តមានសមាជិករដ្ឋាភិបាលទាំងអស់ អតីតប្រធានាធិបតីជាប្រធានបក្សប្រឆាំង លោក នីកូឡា សាកូហ្ស៊ី អតីតនាយករដ្ឋមន្ត្រីទាំងអស់ ព្រមទាំងគ្រប់តំណាងស្ថាប័នក្រុមប្រឹក្សារដ្ឋធម្មនុញ្ញ សភា និងព្រឹទ្ធសភា នៅម៉ោង១២ថ្ងៃត្រង់នេះ។ ចំណែកឯប្រមុខ រដ្ឋ និងរដ្ឋាភិបាលបរទេស នឹងត្រូវទទួលស្វាគមន៍នៅវិមានប្រធានាធិបតី វេលាម៉ោង ១ -២ ដើម្បីទទួលទានអាហារថ្ងៃត្រង់រួមគ្នា រួចទើបជិះរថយន្តក្រុងធំមួយរួមគ្នា ធ្វើដំណើរឆ្ពោះទៅកាន់ទីលានសាធារណរដ្ឋ ដើម្បីចុះដើរដង្ហែក្បួននៅម៉ោងបីរសៀល។ ការដើរហែ ដែលអាចមានរយៈពេលតែ ១៥ទៅ២០នាទីប៉ុណ្ណោះ សម្រាប់ក្រុមប្រមុខដឹកនាំប្រទេស។
ប្រវែងផ្លូវដែលក្បូនត្រូវដើរ ពីទីលានសាធារណរដ្ឋទៅទីលានជាតិ មានប្រវែង ៣គីឡូម៉ែត្រ។ យោលទៅចំនួនពលរដ្ឋចូលរួមសន្ធឹកសន្ធាប់ ក្បួនដង្ហែមានបំបែកជាពីរខ្សែ មួយដើរត្រង់ មួយទៀតដើរព័ទ្ធ វាងបន្តិច សំដៅទិសតែមួយ។
វិធានការសន្តិសុខ និងជំនួបកំពូលអឺរ៉ុបប្រឆាំងភេរវនិយម
មានកម្លាំងប៉ូលិស ទាហាន មិនតិចជាងពីរពាន់ពីររយនាក់ទេ ដែលត្រូវដាក់ពង្រាយការពារតាមដងផ្លូវដែលក្បួនជាតិត្រូវឆ្លងកាត់ និងជាង៥ពាន់៥រយនាក់ សម្រាប់ការពាររដ្ឋធានីនិងតំបន់ជុំវិញក្រុងប៉ារីស។
ហើយឆ្លៀតក្នុងឱកាសដែលប្រមុខដឹកនាំអឺរ៉ុបមានវត្តមាននៅទីក្រុងប៉ារីស ដើម្បីដើរដង្ហែក្បួន រដ្ឋមន្ត្រីក្រសួងមហាផ្ទៃបារាំងបានរៀបចំជំនួបកំពូលអន្តរជាតិមួយថ្នាក់រដ្ឋមន្ត្រីមហាផ្ទៃអឺរ៉ុប និងរដ្ឋមន្ត្រីក្រសួងយុត្តិធម៌អាមេរិក ដើម្បីពង្រឹងកិច្ចសហប្រតិបត្តិការរវាងគ្នាដើម្បីប្រយុទ្ធប្រឆាំងនឹងភេរវនិយម។
បញ្ហាភេរវនិយម ថ្វីបើពេលនេះ បារាំងរងគ្រោះជាងគេនិងដោយជាក់ស្តែងមែន ប៉ុន្តែហានិភ័យមិនបញ្ឈប់ត្រឹមព្រំដែនបារាំងឡើយ។ អឺរ៉ុបទាំងមូលក៏មានគ្រោះគំរាមកំហែងភេរវកម្មដូចគ្នា។ បើតាមប្រភពមិនបញ្ចេញឈ្មោះ របស់ភ្នាក់ងារស៊ើបការណ៍អាមេរិក NSA ដែលចាប់បានសំឡេងទាក់ទងគ្នារវាងមេកើយអង្គការរដ្ឋអ៊ីស្លាម ថាភេរវកម្មនៅប៉ារីស គ្រាន់តែជាការចាប់ផ្តើមប៉ុណ្ណោះ ការវាយប្រហារភេរវកកម្មនឹងមានជាបន្តបន្ទាប់ទៀត នៅតាមក្រុងផ្សេងៗរបស់អឺរ៉ុប។
ជាឧទាហរណ៍ នៅព្រឹកថ្ងៃអាទិត្យនេះទីស្នាក់ការកាសែតអាល្លឺម៉ង់មួយ បានរងការវាយប្រហារ ដោយអគ្គីភ័យចេតនាមួយ តែសំណាងល្អ គ្មានជនរងគ្រោះ។ កាសែតអាល្លឺម៉ង់មួយនេះ បានចុះផ្សាយបន្តក្នុងទំព័រកាសែតរបស់ខ្លួន រូបថ្លុកម៉ូហាម៉េតរបស់ទស្សនាវដ្តីCharlie-Hebdo។ កាសែតអាល្លឺម៉ង់ Bild ក៏បានបញ្ជាក់ដែរថា ពិតជាមានការគំរាមកំហែងភេរវកម្មថ្មីៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ