ប៉ូលិសInterpolទាញសញ្ញាអាសន្នក្រោយអ្នកទោសរាប់រយនាក់លួចរត់ចេញពីគុក
អន្តរប៉ូលិសInterpol បានជូនដំណឹង នៅល្ងាចថ្ងៃសៅរ៍ ម្សិលមិញ ដល់សមាជិកប្រទេសទាំង១៩០របស់ខ្លួន ឲ្យធ្វើការប្រុងប្រយ័ត្នផ្នែកសន្តិសុខ បន្ទាប់ពីមានព្រឹត្តិការណ៍ហែកគុក លួចរត់គេចចេញ ជាបន្តបន្ទាប់របស់អ្នកទោសរាប់រយនាក់ ក្នុងរយៈពេលមួយខែចុងក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
អ្នកទោសទាំងនោះភាគច្រើនជាភេរវករដែលលួចរត់ចេញពីគុកចំនួន ៩ ដែលនៅក្នុងនោះមានប្រទេសប៉ាគីស្ថាន អ៊ីរ៉ាក់ និងលីប៊ី។ ប៉ូលិស Interpolសង្ស័យថា គឺក្រុមអាល់កៃដា ដែលបានចូលរួមក្នុងការជួយរំដោះអ្នកទោសទាំងនោះ។ នៅក្នុងសេចក្តីប្រកាសរបស់ខ្លួនកាលពីថ្ងៃសៅរ៍ ម្សិលមិញ ប៉ូលិស Interpolអះអាងថា ការលួចរត់គេចពីគុករបស់អ្នកទោសកើតមានជាបន្តបន្ទាប់គ្នា ហើយអ្នកទោសដែលជាជនឧក្រិដ្ឋ និងភេរវកររាប់រយនាក់បានលួចរត់គេចចេញពីគុក។ Interpol បានស្នើដល់ប្រទេសសមាជិកឲ្យផ្តល់ព័ត៌មានបន្ថែម ដើម្បីកំណត់ថា តើការលួចរត់គេចជាបន្តបន្ទាប់របស់អ្នកទោសមានជាប់ពាក់ព័ន្ធគ្នា នឹងបណ្តាញអាល់កៃដា ដែរឬទេ។
អង្គការ Interpol ដែលមានទីស្នាក់ការក្នុងទីក្រុងលីយ៉ុងរបស់ប្រទេសបារាំង បានសំណូមពរផងដែរដល់ប្រទេសសមាជិកឲ្យជូនដំណឹងភ្លាម នៅពេលគេរកឃើញទីតាំងលាក់ខ្លួនរបស់អ្នកទោសដែលបានលួចរត់គេចចេញពីគុក។ ធ្វើដូច្នោះ គឺដើម្បីជៀសវាងការវាយប្រហាររបស់ក្រុមភេរវករ។
ប៉ូលិស Interpolបានរំលឹកថា សីហា គឺជាខែសំខាន់ សម្បូរកើតមានអំពើភេរវកម្ម និងការវាយប្រហារដ៏ហិង្សារបស់ក្រុមភេរវករ ទៅលើប្រទេសរុស្ស៊ី ឥណ្ឌា និងឥណ្ឌូនេស៊ី។ សប្តាហ៍ទីមួយរបស់ខែសីហានេះ ក៏ជាខួប១៥ឆ្នាំ នៃការវាយប្រហារជាបន្តបន្ទាប់គ្នារបស់ពួកភេរវករ ទៅលើស្ថានទូតអាមេរិក នៅក្នុងប្រទេសកិនយ៉ា និងតង់ហ្សានី។
នៅថ្ងៃទី ៧សីហា ឆ្នាំ ១៩៩៨ ការបំផ្ទុះគ្រាប់បែកភេរវកម្មបានកើតមានផ្ទួនៗគ្នាទៅលើស្ថានទូតអាមេរិកក្នុងទីក្រុងណៃរ៉ូប៊ី និងដារ៉េ សាឡឹម ដែលបានសម្លាប់មនុស្សជាង ២០០នាក់ ដែលពួកគេភាគច្រើនជាជនជាតិអាហ្រ្វិក។
គេមិនបានដឹងថា តើអ្នកទោសដែលជាក្រុមភេរវករ និងដែលលួចរត់គេចពីគុក ទាំងនេះ មានពាក់ព័ន្ធនឹងផែនការធ្វើភេរវកម្មរបស់ក្រុមអាល់កៃដា ដែរ ឬយ៉ាងណាទេ។ ប៉ុន្តែ កាលពីថ្ងៃសុក្រ ក្រសួងការបរទេសអាមេរិក បានចេញសេចក្តីប្រកាសអាសន្នស្តីពីការគំរាមកំហែងធ្វើភេរវកម្មរបស់អាល់កៃដាដើម្បីប្រឆាំងនឹងផលប្រយោជន៍របស់អាមេរិក នៅតំបន់ដើមបូព៌ា និងនៅអាហ្វ្រិកខាងជើង។ ស្ថានទូត និងកុងស៊ុលអាមេរិកនៅក្នុងតំបន់ទាំងពីរ ជាង ២០ត្រូវតម្រូវឲ្យបិទទ្វារ នៅថ្ងៃអាទិត្យនេះ។ ចំណែកសេចក្តីប្រកាសអាសន្នរបស់អាមេរិកស្តីពីអំពើភេរវកម្ម នឹងត្រូវមានសុពលភាពរហូតដល់ដំណាច់ខែសីហា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ