ឈ្មួញមរណៈ Viktor Bout ជាប់ពន្ធនាគារ ២៥ឆ្នាំ
សាលក្រមបែបនេះ នៅទីបំផុតត្រូវបានបំភ្លឺឡើងនៅពេលរសៀលថ្ងៃទី ៥មេសា នៅក្រុងញូវយ៉កដែលត្រូវនឹងកណ្តាលអធ្រាត្រទៅហើយម៉ោងនៅម៉ូស្គូដោយតុលាការអាមេរិកដែលប្រកាសថាឈ្មោះ Viktor Bout អាយុ៤៥ឆ្នាំជាពាណិជ្ជករជាតិរុស្ស៊ីត្រូវជាប់គុក២៥ឆ្នាំ ចំពោះ បទពិរុទ្ធ ក្នុងការលក់អាវុធ ទៅឲ្យពពួកក្រុមភេរវនិយម ហេតុដែលជា គ្រោះថ្នាក់ដល់ ជីវិតជាតិអាមេរិកាំង។ ក្រសួងការបរទេសរុស្ស៊ី មិនទទួលស្គាល់សាលក្រមនេះទេ ហើយបន្តទាមទារពីស.រ.អា.ឲ្យប្រគល់ពលរដ្ឋរុស្ស៊ីនោះមកភាគីរុស្ស៊ីវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ទន្ទឹមនឹងទោស ២៥ឆ្នាំ តុលាការអាមេរិក ក៏តម្រូវឲ្យ សាមីជននោះ បង់ប្រាក់ពិន័យ ក្នុងទំហំ ១៥លានដុល្លារអាមេរិកទៅផង។ ប្រាក់នេះ នឹងត្រូវរឹបអូសយកពី ធនាគារណា ដែល លោក Viktor Bout អាចមានលុយផ្ញើទុក។
ប៉ុន្តែតាមសំដីភរិយាគាត់ ថ្លែងទៅពួកអ្នកកាសែតក្នុងក្រុង ញូវយ៉កក្រោយពីឮ សាលក្រមនោះ លុយច្រើនម៉្លឺងៗគ្រួសារគាត់មិនដែលមានទេ។ ស្ត្រីនោះ ក៏ថ្លែងដែរថាការកាត់ទោស២៥ឆ្នាំនេះគឺជាជាជ័យជំនះសម្រាប់គ្រួសារគាត់ និង សម្រាប់ប្រទេសរុស្ស៊ី តែម្តង ទាំងកោតសរសើរ លោកស្រីចៅក្រម Shira Scheindlin ថា បានជ្រើសយក រយៈពេលខ្លីបំផុត គឺត្រឹម២៥ឆ្នាំ ឲ្យ
ប្តីគាត់ ជាប់គុក មិនមែនដល់មួយជីវិត ដូចការទាមទារនៃភាគី រដ្ឋអាជ្ញាឡើយ។
ដ្បិតលោកស្រី ចៅក្រមនោះ បានថ្លែងថា “គ្មានភស្តុតាងអ្វីណាដែលសឲ្យឃើញ ថា លោក Bout ពាក់ព័ន្ធ ទៅនឹង អង្គការភេរវនិយមឡើយ”។
តាមប្រពន្ធលោក Bout លោកស្រីចៅក្រមអាមេរិកាំង ដែល កាត់ទោសនោះ គឺទាំងបង្ខំក្នុងចិត្ត ទេតើ ដ្បិតត្រូវយោងទៅលើ បទវិនិច្ឆ័យចេញទៅហើយ ដោយ“ក្រុមជំនុំអមសាលាក្រុមចោទ” ដែលថា លោក Bout ពិតជាជាប់ទោសមែន ទៅតាមការចោទប្រកាន់៤ករណី ក្នុងនោះ មានការប៉ុនប៉ង លក់ រ៉ុកកែត សម្រាប់បាញ់យន្តហោះ ទៅឲ្យ”កងកម្លាំងបដិវត្តប្រដាប់អាវុធនៅ Columbie” ហៅកាត់ថា FARC ដែលត្រូវស.រ.អា. ចាត់ទុក ជាអង្គការភេរវនិយម ហើយ រ៉ុកកែត នោះ គឺ ទុក ធ្វើឃាតពួក Pilote អាមេរិកាំង តែម្តង។
គួររម្លឹកថា លោក Bout បានធ្លាក់ខ្លួន ជាប់ក្នុងអន្ទាក់អាមេរិកាំង នៅក្រុងបាងកក កាលពីខែ មិនា ឆ្នាំ២០០៨ ដោយថ្លោះការជួបជាមួយពួកភ្នាក់ងារអាមេរិក ដែលក្លែងខ្លួន ធ្វើជាម៉ូយទិញអាវុធសម្រាប់ កងកម្លាំង FARC នោះឯង។ ២ឆ្នាំក្រោយមក នៅខែធ្នូឆ្នាំ២០១០ រូបគាត់ត្រូវបានអាជ្ញាធរថៃ ធ្វើបត្យាប័ន ប្រគល់ខ្លួន ទៅឲ្យស.រ.អា.ទៅ។
គឺក្រោយពីសហភាពសូវៀតរលាយទៅក្នុងឆ្នាំ ១៩៩១ដែលលោក Bout ជាអតីតនាយទាហានសូវៀត ចេះច្រើនភាសា កាលណោះ អាយុទើប ២៤ឆ្នាំ បានបង្កើតឡើងជាក្រុមហ៊ុន មាន យន្តហោះ ធុនធំៗដឹកជញ្ជូនអាវុធសូវៀតនៅសេសសល់យ៉ាងច្រើន ទៅកាន់ច្រកល្ហកប្លែកៗ នៃផែនដី មានទ្វីបអាហ្វ្រិកជាដើម។
ក្រសួងការបរទេសរុស្ស៊ី ព្រឹកមិញ បានចេញសេចក្តីថ្លែងការណ៍ថា ការកាត់ទោសពលរដ្ឋរុស្ស៊ី ដោយតុលាការអាមេរិកាំង គឺគ្មានតឹកតាងអ្វីជាមូលដ្ឋានសំអាងឡើយនិងលំអៀងជាមុនស្រេច ទៅខាងបម្រើផលប្រយោជន៍ មជ្ឈដ្ឋានជាក់លាក់នៅស.រ.អា. ហើយរុស្ស៊ី នឹងបន្តទាមទារ ពីភាគីអាមេរិក ឲ្យប្រគល់ ពលរដ្ឋរុស្ស៊ីនោះ មកឲ្យភាគីរុស្ស៊ីវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ