រង្វាន់ណូបែលផ្នែកវេជ្ជសាស្ត្រឆ្នាំ ២០១១ ត្រូវបានប្រកាសផ្តល់ឲ្យអ្នកស្រាវជ្រាវបីនាក់
រង្វាន់ ណូបែល ផ្នែក វេជ្ជសាស្ត្រ ឆ្នាំ ២០១១ ត្រូវបានប្រកាសផ្តល់ឲ្យអ្នកស្រាវជ្រាវបីនាក់ គឺជនជាតិ អាមេរិកាំង Bruce Beutler ជនជាតិកាណាដា Ralph Steinman និងជនជាតិ Luxembourg Jules Hoffmann សំរាប់ការងាររបស់អ្នកប្រាជ្ញ ទាំងបីនាក់នេះ ដែលបានអនុញ្ញាត ឲ្យយល់ដឹងកាន់តែច្បាស់ពីដំណើរប្រព្រឹត្តទៅនៃប្រព័ន្ធការពារ សព៌ាង្គកាយទល់នឹងមេរោគ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១០
ជ័យ លាភីរង្វាន់ណូបែលផ្នែកវេជ្ជសាស្ត្រឆ្នាំ២០១១នេះ បានធ្វើឱ្យមានការផ្លាស់ប្តូរយ៉ាងជ្រាលជ្រៅ ការយល់ឃើញរបស់យើងអំពីប្រព័ន្ធការពារសព៌ាង្គកាយ ទល់នឹងមេរោគ ដោយរកឃើញគោលការណ៍ធំៗរបស់វា នេះជាការប្រកាសរបស់គណៈកម្មាធិការណូបែលឲ្យដឹងនៅថ្ងៃចន្ទ៣តុលា នេះនៅទីក្រុង Stockholm នៃប្រទេសស៊ុយអែដ។
ជនជាតិអាមេរិកាំង Bruce Beuthler អាយុ ៥៥ឆ្នាំ និង Luxembourg Jules Hoffmann អាយុ៧០ឆ្នាំ ត្រូវចែកគ្នានូវប្រាក់ពាក់កណ្តាលដំបូងនៃប្រាក់រង្វាន់ ១០ លាន couronnes suède ត្រូវប្រមាណជា ១ លាន ៤៦ ម៉ឺនដុល្លារ ចំណែកឯអ្នកស្រាវជ្រាវជាតិកាណាដា Ralph Steinman អាយុ ៦៨ឆ្នាំ នឹងទទួលតែម្នាក់ឯង ប្រាក់រង្វាន់ពាក់កណ្តាលទៀត។ លោក Jules Hoffmann ធ្វើការនៅក្នុងវិទ្យាស្ថាន ជីវវិទ្យា អណូ និងកោសិកា នៅ Strasbourg ។ គាត់ បានទទួលមេដាយមាសនៃមជ្ឈមណ្ឌលជាតិខាងស្រាវជ្រាវវិទ្យាសាស្រ្ត CNRS នៅឆ្នាំ ២០១១ ។
របកគំហើញថ្មីៗទាំងនេះ បើកផ្លូវទៅរកការផលិតឱសថថ្មីៗ និងអនុញ្ញាត ឲ្យប្រយុទ្ធទល់នឹងភាពទន់ខ្សោយ នៃប្រព័ន្ធការពារសព៌ាង្គកាយ ដូចយ៉ាង រោគហឺតជាដើម។ ការងាររបស់អ្នកប្រាជ្ញទាំងបីនាក់ បានបើកផ្លូវថ្មីៗ សំរាប់អភិវឌ្ឍនៃ ការបង្ការ និងការព្យាបាលទល់នឹងជំងឺបង្កដោយមេរោគ រោគមហារីកនិងរោគបណ្តាលមកពីការរោលឬរលាក។
សប្តាហ៍ប្រកាសផ្តល់រង្វាន់ណូបែល ចាប់ផ្តើមនៅថ្ងៃចន្ទ៣តុលានេះនៅទីក្រុងStockholm ដោយការប្រកាសផ្តល់រង្វាន់ណូបែលផ្នែកវេជ្ជសាស្ត្រ ផ្នែករូបវិទ្យា នៅថ្ងៃអង្គារ ៤តុលាផ្នែកគីមី នៅថ្ងៃពុធ៥តុលា ផ្នែកអក្សរសិល្ប៍ នៅថ្ងៃព្រហស្បតិ៍ ៦តុលា និងផ្នែកសេដ្ឋកិច្ចនៅថ្ងៃ១០តុលា។
រង្វាន់ណូបែលផ្នែកសន្តិភាពដែលត្រូវទាំងអស់គ្នាទន្ទឹងរង់ចាំ នឹងត្រូវប្រកាស ផ្តល់ឲ្យនៅថ្ងៃសុក្រ៧តុលា នៅទីក្រុង Oslo នៃ ប្រទេស Norvège និងប្រហែលអាចប្រកាសផ្តល់ឲ្យសកម្មជននៃនិទាឃ រដូវ អារ៉ាប បន្តពីអ្នកប្រឆាំង រឹងរូសនឹងរដ្ឋអំណាចចិន Liu Xiaobo ដែលបានទទួលរង្វាន់សន្តិភាពនេះ នៅឆ្នាំ ២០១០ ។ គណៈកម្មាធិការណូបែលនៅ Norvège ត្រូវជ្រើសរើស ជ័យលាភីរង្វាន់ណូបែលផ្នែកសន្តិភាពឆ្នាំ ២០១១ នេះ ក្នុងចំណោម បេក្ខជនដ៏ច្រើនបំផុតមានទៅដល់ ២៤១ នាក់។
រង្វាន់ណូបែលគឺ មានសញ្ញាប័ត្រមួយ មេដាយមួយ និងមូលប្បទានប័ត្រ មួយតម្លៃ ១០ លាន គួរ៉ោន ប្រាក់ស៊ុយអែដ ត្រូវប្រមាណជា ១ លាន ៤៦ម៉ឺនដុល្លារ នឹងត្រូវផ្តល់ឲ្យជ័យលាភី នៅទីក្រុង Stockholm នៃប្រទេសស៊ុយអែដ និងនៅទីក្រុង Oslo នៃប្រទសNorvège នៅថ្ងៃ១០ធ្នូ ជាថ្ងៃ ខួប មរណភាពរបស់ស្ថាបនជន អ្នកប្រាជ្ញ និងឧស្សាហករជាតិស៊ុយអែដ គឺ លោក Alfred Nobel៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ