២៤សីហា១៩៩១-២៤សីហា២០១១៖ ខួប២០ឆ្នាំនៃឯករាជ្យរដ្ឋអ៊ុយក្រែន
ឧទ្ទិសដល់កាលបរិច្ឆេតដ៏វិសេសវិសាលនេះក្នុងប្រវត្តិរដ្ឋខ្លួន លោក យ៉ានូកូវិច ប្រធានាធិបតីអ៊ុយក្រែនសម្តែងនូវជំនឿជឿជាក់ថា ម្តុំ១០ឆ្នាំទៀតរដ្ឋអ៊ុយក្រែននឹងត្រូវទទួលចូលជាសមាជិកថ្មីរបស់ សហភាពអឺរ៉ុប។ លោកប្រធានគណៈកម្មការអឺរ៉ុប Jose Manuel Barroso ពីចំណែកខ្លួនវិញគឺស្វាគមចំពោះបំណងនេះរបស់អ៊ុយក្រែន ប៉ុន្តែសុំឲ្យទីក្រុង Kiev បញ្ជាក់ពីភក្តីភាពរបស់ខ្លួនចំពោះស្តងដារជាគ្រឹះគន្លឹះរបស់សហភាព អឺរ៉ុបបែបយ៉ាងការគោរពសិទ្ធិមនុស្ស ប្រកាន់យកលិទ្ធិប្រជាធិបតេយ្យ សេរីភាពបញ្ចេញមតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ជាបឋម គួររំលឹកថា គឺ២០ឆ្នាំមុនគត់ថ្ងៃ២៤សីហាឆ្នាំ១៩៩១ ដែលរដ្ឋសភាអ៊ុយក្រែនបានអនុម័ត“សេចក្តីប្រកាសស្តីអំពីឯករាជ្យរដ្ឋអ៊ុយក្រែន” ជាទីដែលមានចែងថា ៖ “ចាប់ពីអំណើះតទៅ នៅលើដែនដីអ៊ុយក្រែនមានសុពលភាពដំណើរការទៅកើតគឺតែរដ្ឋធម្មនុញ្ញអ៊ុយក្រែនប៉ុណ្ណោះ មិនមែនរដ្ឋធម្មនុញ្ញសូវៀតទៀតឡើយ”។ សេចក្តីប្រកាសនេះ ធ្វើឡើងគឺរំលងតែ២ថ្ងៃក្រោយពីនៅរដ្ឋធានីម៉ូស្គូបានធ្លាក់ក្នុងបរាជ័យទៅរដ្ឋប្រហារដើម្បីរក្សាសហភាពសូវៀតឲ្យនៅគង់វង់ដដែលតាមវិធីផ្តួលលោកប្រធានាធិបតីសូវៀត Gorbatchev ពីអំណាច។
តាមរយៈអត្ថបទមួយពិសេស ចុះផ្សាយក្នុងទស្សនាវដ្តីឈ្មោះ” កញ្ចក់ប្រចាំសប្តាហ៍ “ ឧទ្ទិសដល់ខួប២០ឆ្នាំនៃឯករាជ្យរដ្ឋអ៊ុយក្រែន លោកប្រធានាធិបតីអ៊ុយក្រែន យ៉ានូកូវិច សរសេរជាអាទិ៍ ៖ រដ្ឋអ៊ុយក្រែនសព្វថ្ងៃកំពុងដើរយ៉ាងខ្ជាប់ខ្ជួននៅលើផ្លូវធ្វើកំណែទម្រង់និងទំនើបកម្ម ហើយជាផ្លែផ្កានៃនយោបាយនេះ ខ្ញុំជឿជាក់ថាប្រមាណ១០ឆ្នាំទៀតអ៊ុយក្រែននឹងក្លាយទៅជាសមាជិកថ្មីរបស់សហភាពអឺរ៉ុបដោយព្រមជាមួយនេះចូលខ្លួនទៅសណ្ឋិតនៅក្នុង“គ្រួសារនៃប្រទេសលូតលាស់” តែម្តង។
ជម្រើសអ៊ុយក្រែនជាសមាជិកសហភាពអឺរ៉ុប គឺជាគ្រឹះមូលដ្ឋាននៃអត្តសញ្ញាណ សម្គាល់នយោបាយក្រៅប្រទេសអ៊ុយក្រែន។ ចំណែក តម្លៃផងទាំងឡាយប្រកាន់យកដោយសហភាពអឺរ៉ុប គឺបម្រើជាគ្រឹះមូលដ្ឋានសម្រាប់ការអភិវឌ្ឍន៍រដ្ឋអ៊ុយក្រែន។
លោក យ៉ានូកូវិច ក៏សង្កត់ធ្ងន់ថា ជាការចាំបាច់ដែលត្រូវចុះជាកិច្ចព្រមព្រៀងស្តីអំពីការបង្កើតឡើងជា”តំបន់សេដ្ឋកិច្ចសេរី “នៅទ្វីបអឺរ៉ុបតំបន់ដែលរួមក្តោបទាំងអ៊ុយក្រែនផងដើម្បីឲ្យអ៊ុយក្រែនសមិទ្ធិបានដូចចិត្ត “របបលើកលែងទិដ្ឋាការ” ជាមួយសហភាពអឺរ៉ុប របបដែលអ៊ុយក្រែននឹងចាប់អនុវត្តនៅឆ្នាំ២០១២ខាងមុខគ្រាន់នឹងសម្រួលដល់ការធ្វើដំណើរនៃភ្ញៀវអឺរ៉ុបមកទស្សនាការប្រកួតបាល់ទាត់រើសជើងឯកទ្វីបអឺរ៉ុបដែលនឹងប្រព្រឹត្តទៅនៅអ៊ុយក្រែនផង ប៉ូឡូញផង។
លោកប្រធានគណៈកម្មការអឺរ៉ុប Jose Manuel Barroso ក្នុងសារអបអរនៅឱកាសខួប២០ឆ្នាំនៃឯករាជ្យរដ្ឋអ៊ុយក្រែនបានស្វាគមចំពោះបំណងរបស់អ៊ុយក្រែន ប៉ុន្តែសុំឲ្យទីក្រុង Kiev បញ្ជាក់ពីភក្តីភាពស្មោះត្រង់ចំពោះគោលការណ៍និងតម្លៃណាជាគ្រឹះគន្លឹះ របស់សហភាពអឺរ៉ុប ដូចយ៉ាងការគោរពសិទ្ធិមនុស្ស គោរពឧត្តមភាពនៃច្បាប់ ប្រកាន់យកលិទ្ធិប្រជាធិបតេយ្យ សេរីភាពបញ្ចេញមតិជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ