សំណុំរឿងDSK បានបញ្ចប់នៅតុលាការព្រហ្មទណ្ឌក្រុងញ៉ូវយ័ក តែត្រូវបន្តនៅតុលាការស៊ីវិល Bronx
នៅថ្ងៃអង្គារ ទី២៣ សីហាម្សិលមិញ លោកចៅក្រមអាមេរិក Michael Obus បានយល់ព្រមទទួលយកអនុសាសន៍របស់លោករដ្ឋអាជ្ញាក្រុងញ៉ូវយ័ក Cyrus Vance ឲ្យបោះបង់ចោលទំាងស្រុងនូវគ្រប់ការចោទប្រកាន់លើលោកដូមីនិក ស្រ្តូសកាន់ (Dominique Strauss-Kahn) ហៅកាត់ថា DSK អតីតអគ្គនាយកមូលនិធិរូបិយវត្ថុអន្តរជាតិ ទាក់ទងនឹងរឿងអាស្រូវជាមួយស្រ្តីអ្នកបំរើសណ្ឋាគារម្នាក់ឈ្មោះ Nafissatou Diallo កាលពីថ្ងៃទី១៤ ឧសភា។ យោងតាមលោករដ្ឋអាជ្ញា ភស្តុតាងដែលបង្ហាញដោយ Nafissatou Diallo សុទ្ធតែប្រឌិតឡើងដោយគ្មានការពិត។
ចុះផ្សាយនៅថ្ងៃ៖
ស្តាប់ - ០៨:៣០
រឿងរ៉ាវរវាងលោក DSK និងអ្នកស្រី Nafissatou Diallo បានកើតមានឡើងកាលពីថ្ងៃទី ១៤ ឧសភា នៅក្នុងបន្ទប់លេខ ២៨០៦ នៃសណ្ឋាគារ Sofitel ក្នុងទីក្រុងញ៉ូវយ័ក។ Nafissatou Diallo បានប្រកាសប្រាប់ឲ្យគេដឹងថា ខ្លួនត្រូវបានលោក DSK ចាប់រំលោភ នៅពេលដែលចូលទៅបោសសំអាតក្នុងបន្ទប់របស់លោក DSK។ ក្នុងថ្ងៃទី ១៤ ឧសភានោះដដែល លោក DSK ដែលកំពុងស្ថិតក្នុងយន្តហោះ ដើម្បីធ្វើដំណើរមកប្រទេសបារំាង ក៏ត្រូវបានប៉ូលិសក្រុងញ៉ូវយ័កឃាត់ខ្លួនភ្លាមៗ។ ក្រោយមក រូបភាពរបស់លោកអគ្គនាយកមូលនិធិរូបិយវត្ថុអន្តរជាតិ ជាមួយនឹងទឹកមុខស្រពោន និងដៃជាប់ខ្នោះត្រូវបានទូរទស្សន៍អាមេរិកំាងផ្សព្វផ្សាយជាច្រើនថ្ងៃជាប់ៗគ្នា។ បន្តមកទៀត លោក DSK ត្រូវបានរដ្ឋអាជ្ញាក្រុងញ៉ូវយ័កលោក Cyrus Vance ចោទប្រកាន់ក្នុងបទល្មើសចំនួន ៧ ពិសេស ការបំពារបំពានផ្លូវភេទ ការប៉ុនប៉ងរំលោភសេពសន្ថវៈ និងការឃុំខ្លួនមនុស្សដោយខុសច្បាប់។ តំាងពីពេលនោះមក ដំណើរការស៊ើបអង្កេតក៏បានចាប់ផ្តើម ទំាងនៅខាងក្រុមមេធាវីរបស់លោក DSK ក៏ដូចជាក្រុមមេធាវីរបស់អ្នកស្រី Nafissatou Diallo។
គួរឲ្យភ្ញាក់ផ្អើល នៅថ្ងៃអង្គារ ទី២៣ សីហាម្សិលមិញ និងបន្ទាប់ពីមាននិតិវិធីអស់ជាង ៣ខែមក ស្រាប់តែរូបរដ្ឋអាជ្ញាក្រុងញ៉ូវយ័កលោក Cyrus Vance បែរជាប្រកាសបោះបង់ចោលទំាងស្រុង នូវគ្រប់ការចោទប្រកាន់លើលោកដូមីនិក ស្រ្តូសកាន់។ លោក Cyrus Vance បានពន្យល់បកស្រាយលំអិតអំពីមូលហេតុនៃសេចក្តីសម្រេចរបស់លោកនៅក្នុងរបាយការណ៍កម្រាស់ ២៥ទំព័រ។ មូលហេតុដែលសំខាន់នោះ គឺការនិយាយភូតភរ បោកប្រាស់ជាច្រើនលើក ច្រើនសាររបស់ Nafissatou Diallo។ យោងតាមលោករដ្ឋអាជ្ញាក្រុងញ៉ូវយ័ក គ្រាន់តែនៅក្នុងសំណួរមួយដែលសួរថា បន្ទាប់ពីមានរឿងរ៉ាវនៅក្នុងបន្ទប់លេខ ២៨០៦ របស់លោក DSK ភ្លាម តើអ្នកស្រីបានធ្វើខ្លះ ?
Nafissatou Diallo បានផ្តល់ចម្លើយរហូតដល់ទៅ៣ ដែលខុសគ្នាស្រឡះ។ ចម្លើយទីមួយ Diallo ឆ្លើយថា រត់ចេញពីបន្ទប់ DSK លេខ ២៨០៦ ទៅពួននៅកាច់ជ្រុងមួយនៃជាន់ទី២៨។ ចម្លើយទី២ Diallo ឆ្លើយថា បានទៅបោសសំអាតនៅក្នុងបន្ទប់មួយផ្សេងទៀត លេខ ២៨២០ រីឯចម្លើយទី៣ Diallo បែរជាឆ្លើយថា បានទៅបោសសំអាតបន្ទប់លេខ ២៨២០ រួចហើយ ទើបចូលទៅក្នុងបន្ទប់លេខ ២៨០៦ របស់ DSK។ នេះជាចំណុចមិនគួរឲ្យទុកចិត្តមួយ។
ចំណែកចំណុចមិនគួរឲ្យទុកចិត្តមួយទៀត គឺទាក់ទងនឹងរឿងរ៉ាវពីអតីតកាល ពិសេសនៅក្នុងប្រទេស Guinée ដែលជាប្រទេសកំណើតរបស់ Nafissatou Diallo។ យោងតាមលោករដ្ឋអាជ្ញា ការដែល Nafissatou Diallo បាននិយាយថា ខ្លួនធ្លាប់បានទទួលរងការចាប់រំលោភជាលក្ខណៈសមូហភាពនៅក្នុងប្រទេស Guinée នោះ គឺជារឿងប្រឌិតទំាងស្រុង គ្មានការពិតបន្តិចណាសោះ។ អ៊ីចឹងឃើញថា ដោយយោងទៅតាមពាក្យភូតភរ កុហករបស់ Diallo និងគ្មានសាក្សីណាផ្សេង ក្រៅពីរូប Diallo នោះឯង ដែលបានជម្រុញឲ្យលោករដ្ឋអាជ្ញាសម្រេចបញ្ឈប់ការចោទប្រកាន់ទំាងស្រុងលើរូបលោក DSK។
DSK មិនទាន់រួចខ្លួនទំាងស្រុង ពីតុលាការអាមេរិកទេ
បើគិតតាមប្រព័ន្ធតុលាការអាមេរិក រឿងអាស្រូវរបស់លោក DSK ជាមួយនឹងអ្នកស្រី Nafissatou Diallo មិនទាន់អាចចប់ត្រឹមនេះទេ។ មិនទាន់ចប់ ពីព្រោះមាននីតិវិធីពីរដាច់ពីគ្នាទាក់ទងនឹងរឿងនេះ គឺនីតិវិធីព្រហ្មទណ្ឌ និងនិតិវិធីស៊ីវិល។ តើអ្វីទៅ ជាភាពខុសគ្នារវាងនីតិវិធីព្រហ្មទណ្ឌ និងនីតិវិធីស៊ីវិល ?
នីតិវិធីព្រហ្មទណ្ឌ គឺជានីតិវិធីមួយដែលកំណត់តែពីទម្ងន់ទោសដែលជនជាប់ចោទត្រូវទទួល ឬត្រូវរួចខ្លួន។ ចំណែកនីតិវិធីស៊ីវិល គឺជានិតិវិធីមួយដែលកំណត់ពីចំនួនទឹកប្រាក់សងជំងឺចិត្ត ដែលតុលាការត្រូវកំណត់ឲ្យជនជាប់ចោទបង់ទៅឲ្យជនដើមចោទ។
បើនិយាយពីនីតិវិធីព្រហម្មទណ្ឌ គឺបានចប់ហើយ ដោយចៅក្រមបានសម្រេចបោះបង់ចោលទំាងស្រុងនូវរាល់ការចោទប្រកាន់លើរូបលោក DSK។ ក៏ប៉ុន្តែ លោក DSK នឹងត្រូវប្រឈមមុខនឹងនីតិវិធីស៊ីវិលម្តងនាថ្ងៃខាងមុខ ពីព្រោះកាលពីថ្ងៃទី ៨ សីហាកន្លងទៅថ្មីៗនេះ មេធាវីរបស់ Diallo បានដាក់ពាក្យប្តឹងលោក DSK នៅតុលាការស៊ីវិលក្នុងសង្កាត់ Bronx ដែល Diallo រស់នៅបច្ចុប្បន្ន។ តែយ៉ាងណាក៏ដោយ ក្នុងពេលជាមួយគ្នានេះ លោក DSK និង Dialloo តាមរយៈមេធាវីរបស់គេម្នាក់ អាចចរចាគ្នារឿងលុយកាក់ដើម្បីបិទបញ្ចប់នីតិវិធីស៊ីវិលនោះ ព្រោះសូមជម្រាបថា អ្វីដែល Diallo រង់ចំាពីនីតិវិធីស៊ីវិលនោះ គឺលុយសងជំងឺចិត្ត ពីលោក DSK។ តែនៅថ្ងៃពុធ ទី២៤ សីហានេះ មេធាវីរបស់លោក DSK បានប្រកាសឲ្យដឹងជាមុនថា លោក DSK មិនព្រមបង់លុយឲ្យ Diallo ទេ។
ជោគវាសនាអនាគតរបស់លោក DSK មិនច្បាស់លាស់
លោក DSK ជាអតីតអគ្គនាយកមូលនិធិរូបិយវត្ថុអន្តរជាតិផង និងក៏ជាអ្នកនយោបាយបារំាងក្នុងគណបក្សសង្គមនិយម ដែលជាគណបក្សប្រឆាំង។ លោក DSK គឺជាអ្នកនយោបាយដែលមានប្រជាប្រិយភាពខ្ពស់ជាងគេបំផុត និងដែលពលរដ្ឋបារំាងទូទៅសង្ឃឹមអាចប្រជែងយកតំណែងប្រធានាធិបតីបារាំង ក្នុងការបោះឆ្នោត នៅឆ្នាំ២០១២ខាងមុខ។
តែនៅពេលនេះ និងក្រោយពីរឿងអាស្រូវនោះមក គេពិបាកនិយាយថា ប្រជាប្រិយភាពរបស់លោក DSK នៅតែមាននៅក្នុងចំណោមពលរដ្ឋបារំាងទូទៅនោះ ព្រោះថា លោក DSK មិនមែនទើបតែមានរឿងអាស្រូវស្រីញីជាមួយ Nafissatou Diallo ស្រ្តីអ្នកបំរើសណ្ធាគារ Sofitel ក្នុងទីក្រុងញ៉ូវយ័កទេ។ នៅស្រុកបារំាង លោក DSK ក៏ធ្លាប់ជាប់ពាក់ព័ន្ធនឹងរឿងស្រីញីដូចគ្នានេះដែរ ពិសេសជាមួយអ្នកកាសែតនារីម្នាក់ឈ្មោះ Tristane Banon កាលពីឆ្នំា ២០០៣ ហើយរឿងនេះក៏មិនទាន់រួចខ្លួនដែរ។ សូម្បីតែអ្នកស្គាល់លោក DSK និងខ្លួនលោក DSK ផ្ទាល់ក៏ធ្លាប់បានប្រកាសថា ចំណុចខ្សោយរបស់លោកគឺជាប់វាក់វិនតែនឹងលុយកាក់ និងស្រីញី។ កាលក្នុងឆ្នំា ២០០៨ ទៀត ក្នុងនាមលោក DSK ជាអគ្គនាយកមូលនិធិរូបិយវត្ថុអន្តរជាតិ លោកក៏ធ្លាប់មានរឿងផ្លូវភេទស្រដៀងគ្នាជាមួយនឹងមន្រ្តីក្រោមបង្គាប់របស់ខ្លួន។
ចង់ ឬមិនចង់ កិត្តិយសរបស់លោក DSK ហាក់ដូចជាបានស្អុយគគ្រុក ពិបាកនឹងស្រោចស្រង់មកវិញ។ សូម្បីតែសកម្មជនមួយចំនួននៃគណបក្សសង្គមនិយម ក៏មិនហ៊ានទំាងអះអាងពីការវិលចូលប្រឡូកក្នុងឆាកនយោបាយជាថ្មីរបស់លោក DSK នៅមុនការបោះឆ្នោតប្រធានាធិបតីបារាំងនាឆ្នាំ២០១២ខាងមុខ។ មានតែលោក DSK ម្នាក់ឯងគត់ទើបដឹងពីជោគវាសនាអនាគតរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ