នាយករដ្ឋមន្ត្រីផ្អាកការឈប់សម្រាកវ៉ាកងរបស់ខ្លួន
រាជធានីអង់គ្លេសបានឆេះសន្ធោសន្ធៅបីថ្ងៃជាប់គ្នាគិតមកទល់ថ្ងៃចន្ទម្សិលមិញ៨សីហា។ ប៉ូលិសបានរាយការណ៍ជាលើកទី១អំពីហិង្សាកើតមាននៅក្រៅរាជធានី។ លោកនាយករដ្ឋមន្ត្រីអង់គ្លេស David Cameron បានបំប្រួញរយៈពេលឈប់សម្រាកវ៉ាកងរបស់ខ្លួន ដើម្បីវិលត្រឡប់មកកាន់ទីក្រុងLondresវិញ។ ដោយសរុប មានជនជាង២០០នាក់ត្រូវបានចាប់ខ្លួនចាប់តាំងពីកើតមានការបះបោរមក។
ចុះផ្សាយនៅថ្ងៃ៖
ស្តាប់ - ០១:៥៧
ទាំងជនស៊ីវិលរួមទាំងប៉ូលិសផងត្រូវរបួសជាច្រើនសិបនាក់ ហាងលក់ទំនិញត្រូវបានវាយបំផ្លាញនិងលួចប្លន់ រថយន្តប៉ូលិស រថយន្តក្រុងនិងអគារផ្សេងៗត្រូវបានដុតបំផ្លាញ។ ទីក្រុងLondresតាំងពីបីថ្ងៃមកហើយ រស់នៅដោយរន្ធត់ស្មារតីនិងពុំបានស្គាល់អំពើហិង្សាពុះកញ្ជោ្រលបែបនេះទេ ចាប់តាំងពីជាង២០ឆ្នាំមកហើយ។
នៅថ្ងៃទីបីនៃអំពើហិង្សានេះ យ៉ាងតិច មានអគារមួយត្រូវបានដុតបំផ្លាញ នៅខាងត្បូងរាជធានី។ឩប្បត្តិហេតុបានកើតមាន នៅសង្កាត់ជាច្រើនទៀតនៃជាយក្រុង។
អំពើវាយបំផ្លិចបំផ្លាញជាច្រើនទៀតក៏ត្រូវបានសង្កេតឃើញដែរ នៅកណ្តាលទីក្រុងLondres។ ជាលើកទី១ ប៉ូលិសរាយការណ៍ថា ហាងលក់ដូរត្រូវបានវាយបំផ្លាញនិងលួចប្លន់ នៅBirminghamខាងពាយ័ព្យទីក្រុងLondres។នៅHackneyខាងកើតរាជធានីជាទីដែលនឹងប្រព្រឹត្តទៅល្បែងកីឡាអូឡាំពិករដូវក្តៅក្នុងចន្លោះពេលពុំដល់មួយឆ្នាំទៀតផង ហាងលក់ដូរត្រូវបានលួចប្លន់ហើយរថយន្តជាច្រើនគ្រឿងត្រូវបានដុតបំផ្លាញ។ ប៉ូលិសក៏ត្រូវបង្ខំចិត្តធ្វើអន្តរាគមន៍ នៅCroydon LewishamនិងPeckham នៅខាងត្បូងរាជធានី។
ឃើញថា ចលាចលមិនងាយនឹងចប់ទេ ដោយហេតុថា បន្ទាប់ពីបានកើតមានតែនៅក្នុងសង្កាត់ក្រីក្រនិងសម្បូណ៌ដោយជាតិសាសន៍ផ្សេងៗរស់នៅច្របូកច្របល់គ្នាមក ឥឡូវ ការបះបោររំកិលទៅរកសង្កាត់អ្នកមាន នៅកណ្តាលក្រុង។ នៅក្នុងបរិយាកាសអសន្តិសុខនេះ ប៉ូលិសទូន្មានឱ្យអ្នកក្រុងLondresស្ថិតនៅក្នុងផ្ទះខ្លួនហើយនិងទាក់ទងកូនចៅខ្លួន ដើម្បីចង់ដឹងទីកន្លែងដែលគេកំពុងតែស្ថិតនៅ។ ចំណែកឯលោកនាយករដ្ឋមន្ត្រី David Cameronវិញ ផ្អាកការឈប់សម្រាកវ៉ាកងរបស់ខ្លួន ដើម្បីវិលត្រឡប់មកកាន់ទីក្រុងLondresវិញជាបន្ទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ