ទីក្រុងម៉ូស្គូការពារអតីតនាយករដ្ឋមន្ត្រីអ៊ុយក្រែនដែលកំពុងជាប់ឃុំឃាំង
សេចក្តីថ្លែងការណ៍ធ្វើម្សិលមិញដោយលោកស្រី Julia Timochenko អតីតនាយករដ្ឋមន្ត្រីអ៊ុយក្រែនក្នុងតុលាការក្រុង Kiev ដែលបានពិនិត្យមើលហើយបានច្រានចោលពាក្យសុំឲ្យដោះលែងរូបលោកស្រី ថាសម្រាប់រូបគាត់ការគាំទ្រពីខាងម៉ូស្គូគឺជាដំណឹងគួរឲ្យភ្ញាក់ ផ្អើលដែលគាត់មិនបាននឹកស្មានសោះ បានត្រូវកាសែតរុស្ស៊ីលេខថ្ងៃនេះលើកយកមកចុះផ្សាយដោយគ្មានចន្លោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
សាច់រឿងដែលមានគឺថាកាលពីថ្ងៃទី៥សីហាលោកស្រី Timochenko ត្រូវបានតុលាការចេញដីកាឲ្យចាប់ខ្លួនគាត់ឃុំឃាំងរហូតដល់ថ្ងៃទី៣១សីហាសិន ដោយមកពីគាត់បានប្រើពាក្យសំដីទ្រគោះប្រមាថលើនីតិវិធីសួរចម្លើយរូបគាត់ដោយរដ្ឋអាជ្ញា។
ការសួរចម្លើយនេះ គឺជុំវិញបទចោទប្រកាន់លើរូបគាត់ដែលពេលធ្វើជានាយករដ្ឋមន្ត្រីអ៊ុយក្រែន គាត់បានប្រើអំណាចគាត់ទាំងរំលោភជ្រុលដោយកាលពីដើមឆ្នាំ២០០៩ហ៊ានចុះហត្ថលេខាជាមួយលោកនាយករដ្ឋមន្ត្រីរុស្ស៊ី Poutine លើកិច្ចព្រមព្រៀងដែលមានសុពលភាពរហូតដល់១០ឆ្នាំ ស្តីអំពីការទិញឧស្ម័នរុស្ស៊ីតាមតម្លៃខ្ពស់សំបើមដល់ទៅ៤៥០ដុល្លារអាមេរិកក្នុង ១.០០០ ម៣ ។ ការនេះ តាមមតិ រដ្ឋអំណាចថ្មីនៅអ៊ុយក្រែនគឺច្បាស់ជាបាននាំនូវផលប្រយោជន៍សម្រាប់រូបលោកស្រីផ្ទាល់ ប៉ុន្តែបែរទៅជានាំឲ្យរដ្ឋអ៊ុយក្រែនបង់ខាតក្នុង១ឆ្នាំៗអស់២០០លានដុល្លារឯណោះ។ ស្របនឹងច្បាប់អ៊ុយក្រែនចំពោះទង្វើខ្លួនលោកស្រីអាចត្រូវកាត់ទោសឲ្យជាប់ពន្ធនាគារដល់១០ឆ្នាំ។
គឺនាថ្ងៃចាប់ខ្លួនលោកស្រី Timochenko ឃុំឃាំងតែម្តង ដែលក្រសួងការបរទេសរុស្ស៊ីបានចេញសេចក្តីថ្លែងការណ៍ភ្លាមភ្លែតថា កិច្ចព្រមព្រៀងចុះឆ្នាំ២០០៩នោះ គឺចុះដោយត្រឹមត្រូវតាមច្បាប់អ៊ុយក្រែនផង រុស្ស៊ីផង ដ្បិតចុះនោះគឺទៅតាមបទបញ្ជារបស់ប្រធានាធិបតីប្រទេសទាំងពីរ។
តាមការវិភាគនៃនយោបាយវិទូខ្លះ ការដែលទីក្រុងម៉ូស្គូចេញមុខការពារលោកស្រីអតីតនាយករដ្ឋមន្ត្រីអ៊ុយក្រែនរូបនេះដែលតែងប្រកាន់ឥរិយាបថសត្រូវនឹងរុស្ស៊ីសោះគឺដើម្បីបង្ការជាមុនកុំឲ្យសំណុំរឿងលោកស្រីប៉ះពាល់ដល់រូបបុរសខ្លាំងនៅរុស្ស៊ី គឺលោកប្រមុខរដ្ឋាភិបាលពូទីន។
ចំណែកលោកស្រី Timochenko បានឆ្លៀតថ្លែងម្សិលមិញទៅពួកអ្នកកាសែតថា ៖ “ សម្រាប់រូបខ្ញុំសេចក្តីថ្លែងការណ៍របស់ទីក្រុងម៉ូស្គូ គឺសំខាន់ណាស់ពីព្រោះចំណុចជាគោលនៃកិច្ចព្រមព្រៀងនោះ គឺជួយឲ្យពុះពារជំនះបានរួចលើវិបត្តិហេតុឧស្ម័នដែលកាលណោះឡើងដល់កម្រិតធ្ងន់ធ្ងរមែនទែនរួចដោយហេតុថា កិច្ចព្រមព្រៀងនោះចុះដោយស្របនឹងច្បាប់ប្រទេសទាំងពីរសំណុំរឿងដែលចោទប្រកាន់លើរូបខ្ញុំពិតជាត្រូវតែរលាយខ្សុល “។
សហភាពអឺរ៉ុបនិងស.រ.អា.បន្តទាមទារពីអាជ្ញាធរអ៊ុយក្រែនឲ្យដោះលែងជាបន្ទាន់រូបលោកស្រី Timochenko ដោយចាត់ទុកការឃុំឃាំងរូបគាត់ជាមូលហេតុនយោបាយសុទ្ធសាធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ