ឃាតករជាតិន័រវ៉ែសឈ្មោះ Breivik អំពាវនាវឲ្យយកតម្រាប់តាមរុស្ស៊ី
បុរសជាតិន័រវ៉ែសអាយុ៣២ឆ្នាំ ដែលមុននឹងធ្វើអំពើភេរវកម្មសម្លាប់ជនរួមឈាមខ្លួនកាលពី៣ថ្ងៃមុនអស់ដល់ ៩៣នាក់ ហើយដែលថ្ងៃនេះ ត្រូវចូលខ្លួនទៅបង្ហាញនៅពីមុខតុលាការចំពោះឃាតកម្មនោះ បានចេញសេចក្តីថ្លែងការណ៍បង្ហើរតាមបណ្តាញអ៊ិនធ័រណេត សរុបទៅមាន ១.៥០០ទំព័រ រួចពីក្នុងនោះ មានវគ្គមួយ ជាទីដែលគាត់ស្រាប់តែលើកប្រទេសរុស្ស៊ី និងរូបលោកនាយករដ្ឋមន្ត្រី ពូទីន ជាគំរូសម្រាប់ខ្លួនតែម្តង។
ចុះផ្សាយនៅថ្ងៃ៖
ស្តាប់ - ០២:២២
សេចក្តីថ្លែងការណ៍មានទម្រង់ជានិវេទន៍ក្នុងទំហំ១.៥០០ទំព័រនោះ មានចំណងជើងថា “ សេចក្តីប្រកាសឯករាជ្យទ្វីបអឺរ៉ុបឆ្នាំ ២០៨៣ “ បានត្រូវបង្ហោះតាមអ៊ិនធ័រណេត គឺនៅចំថ្ងៃឃាតកម្មរង្គាលនោះឯង ថ្ងៃសុក្រ ២២ កក្កដា។ ខ្លឹមសារនិវេទន៍នោះ គឺបំបះមហាជនឲ្យក្រោកឡើងធ្វើបដិវត្តន៍ដើម្បីទៅទល់ពេលនោះ រំដោះទ្វីបអឺរ៉ុបឲ្យផុតពីលទ្ធិអ៊ីស្លាមនិយម។
កាសែតក្រុងម៉ូស្គូដ៏ល្បីឈ្មោះ Kommersant លេខថ្ងៃនេះបានច្បិចចេញពីនិវេទន៍នោះនូវវគ្គ ជាទីដែលភេរវជន Breivik ដំណាលអំពីវិធីបំពាក់អាវុធប្លែកៗ ដោយក្នុងឋានៈជាប្រភពមួយសម្រាប់ផ្គត់ផ្គង់អាវុធនោះ គឺពួកMafiaរុស្ស៊ី។ ក្នុងវគ្គនេះ ភេរវជនក៏រៀបរាប់យ៉ាងក្បោះក្បាយអំពីវិធីផលិតគ្រឿងបំផ្ទុះ។ ដោយស្រដីអំពីភាពចាំបាច់ត្រូវតែអប់រំយុវជនទៅដោយគំនិតស្នេហាជាតិ អភិរក្ស វប្បធម៌ជាតិ ម្ចាស់និវេទន៍នោះ ទូន្មានឲ្យយកតម្រាប់តាមបទពិសោធន៍របស់អង្គការយុវជនឈ្មោះ”ពួកយើង“ ដែលជាសាខាសសរទ្រូងមួយរបស់វិមានក្រេមឡាំង។
បុរសនោះក៏រំលឹកអំពីប្រទេសរុស្ស៊ីដែលតាមមតិគាត់ គឺមាន “ រចនាសម្ព័ន្ធនយោបាយសុក្រឹតឥតខ្ចោះ “ ដែលប្រទេសន័រវ៉ែសរបស់គាត់គប្បីយកជាគំរូ។ គាត់លំអិតថា ៖ “ ប្រជាធិបតេយ្យមហាជននៅអឺរ៉ុបដែលស្ទះលែងដំណើរការទៅហើយ ត្រូវតែជំនួសទៅដោយប្រជាធិបតេយ្យក្នុងរូបភាពអាចញាក់ទៅតាមខ្សែបង្ហៀរ ដូចនៅរុស្ស៊ីអ៊ីចឹង ”។
ភេរវជន Breivik ក៏និយាយប៉ះឈ្មោះលោកនាយករដ្ឋមន្ត្រីរុស្ស៊ីពូទីន ក្នុងឋានៈជាឥស្សរជនម្នាក់ដែលគាត់ប្រាថ្នាចង់ស្គាល់ដោយផ្ទាល់តែម្តង។ Breivik សរសេរក្នុងសេចក្តីថ្លែងការណ៍ខ្លួនថា ៖ “ រូបពូទីន ញ៉ាំងឲ្យគាត់មានចំណាប់អារម្មណ៍ជាមេដឹកនាំដែលយុត្តិធម៌ និងអង់អាចប្តូរផ្តាច់ សក្តិសមនឹងគោរព ប៉ុន្តែទោះយ៉ាងណាក្តី ក៏ត្រូវធ្វើវិភាគឲ្យបានល្អិតល្អន់អំពីបុគ្គលពូទីន ដើម្បីយល់ តើរដ្ឋបុរសនេះ ជាមិត្តដ៏ល្អ ឬក៏ជាសត្រូវយង់ឃ្នងបំផុតរបស់យើង “។
អ្នកនាំពាក្យផ្លូវការរបស់នាយករដ្ឋមន្ត្រីរុស្ស៊ី លោក Dmitri Peskov បានប្រតិកម្មថ្ងៃនេះថា ៖ ទី១ សូមកុំអាលធ្វើសេចក្តីសន្និដ្ឋានអ្វីណាឡើយ ដរាបណាដែលមិនទាន់បំភ្លឺឃើញថា ឃ្លាទាំងនោះពិតជាសរសេរមែន ដោយដៃឈ្មោះ Breivik។ ទី២ សូម្បីបើបំភ្លឺទៅឃើញថា ម្ចាស់ឃ្លានោះ គឺពិតជាភេរជននោះក្តី ដែលសារជាតិវា គឺតំណាងឲ្យឋាននរកទេតើ ហើយឃ្លានោះឯងគ្រាន់តែជា “គំនិតរវើរវាយរបស់មនុស្សឆ្កួតប៉ុណ្ណោះ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ