បស្ចិមប្រទេសជាទឹកដីដែលជនជាតិរុស្ស៊ីនៅតែប្រាថ្នាចង់ទៅរស់នៅ
ក្នុងចំណោមប្រជាពលរដ្ឋរុស្ស៊ី ដែលមានជីវភាពគ្រាន់បើទៅហើយ មានដល់ទៅ ១ ភាគ៣ ដែលនៅតែទោមនស្សនឹងមាតុភូមិរុស្ស៊ីរបស់ខ្លួន ហើយចង់ចាកចេញទៅរស់នៅជាប់ ជារៀងរហូត នៅឯប្រទេសលោកខាងលិច។ នេះជាលទ្ធផល នៃការស្រាវជ្រាវ ទើបចេញផ្សាយ ដោយអង្គការសង្គមសាស្ត្ររុស្ស៊ី Levada-Center។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ការស្ទាបស្ទង់នេះបានត្រូវធ្វើឡើង ទៅតាមកុម៉្មង់ចង់បាននៃកាសែតប្រឆាំងនៅរុស្ស៊ី មានទំនោរសេរីនិយមឈ្មោះ Novaya Gazeta។ អង្គការសង្គមសាស្ត្ររុស្ស៊ី Levada-Center បានធ្វើការស្រាវជ្រាវនោះ គឺទៅលើបណ្តាជន៣ប្រភេទ។ ប្រភេទទី១ គឺអ្នកស្រុកដែលមានអាយុពី២៥ ដល់៣៩ឆ្នាំ។ ប្រភេទទី២ អ្នកដែលមានប្រាក់ចំណូលខ្ពស់ ក្នុងមួយខែៗ សម្រាប់សមាជិកគ្រួសារគេម្នាក់ៗ ពោលគឺ នៅរដ្ឋធានី Moscou ក្នុងទំហំ ២០០០អឺរ៉ូ, នៅក្រុង Saint-Petersbourg ក្នុងទំហំ ១៥០០អឺរ៉ូ, នៅតាមក្រុងរុស្ស៊ីផ្សេងៗទៀត គឺពី ៨០០ ដល់ ១០០០អឺរ៉ូ។ ប្រភេទទី៣ គឺធ្វើទៅលើ អ្នកដែលរស់នៅម៉ូស្គូ និងក្រុង១២ទៀត ដែលមានបណ្តាជនចាប់ពី ១លាននាក់ឡើងទៅ។
លទ្ធផលនៃការស្រាវជ្រាវបង្ហាញឲ្យឃើញថា ក្នុងចំណោមអ្នកដែលមានកម្រិតជីវភាពគ្រាន់បើទៅហើយ ជាវណ្ណៈមធ្យម អ្នកដែលតាំងចិត្តធ្វើអន្តោប្រវេសន៍ទៅរស់នៅបស្ចិមប្រទេស មានចំនួនដល់ទៅ១ភាគ៣។ ជាទូទៅ គេមានវ័យនៅក្មេងមិនសំពីងសំពោងទៅដោយបញ្ហាគ្រួសារ ហើយច្រើនតែជាអ្នកក្រុងម៉ូស្គូតែម្តង។
ពីក្នុងចំនួននោះ ១៩% ចង់ទៅនៅប្រទេសអាល្លឺម៉ង់, ១៥%ទៅស.រ.អា., ១៣% ទៅអង់គ្លេស, ៨% ទៅរស់នៅអ៊ីតាលីនិងបារាំង , ៦% ទៅកាណាដា, ៥% ទៅស្វីស និង អេស្ប៉ាញ, ៤% ទៅ អូស្ត្រាលី, សល់ពីនេះ គឺចង់ទៅរស់នៅប្រទេសស៊ុយអែដ និងហ្វាំងឡង់។
កាសែត Novaya Gazeta ទាញយកសេចក្តីសន្និដ្ឋានពីការស្រាវជ្រាវនោះថា កត្តា២ ដែលជំរុញឲ្យប្រជាពលរដ្ឋរុស្ស៊ីដែលកំពុងពេញកម្លាំង ចង់ចាកចេញជារៀងរហូត ពីស្រុកកំណើតខ្លួនទៅកវែកកឆ្នាំងនៅតាមប្រទេសបស្ចិមលោកទៅវិញ ពីព្រោះ ៖ ទី១- គេយល់ថា នៅទីនោះ មានកម្រិតជីវភាពខ្ពស់ជាង។ ទី២- នៅទីនោះ មានបង្កើតបានលក្ខណៈសព្វគ្រប់ ដើម្បីធានាឲ្យគេមាន ជំនឿយ៉ាងកក់ក្តៅ ទៅអនាគត មិនគ្រាន់តែសម្រាប់រូបគេប៉ុណ្ណោះទេ តែក៏សម្រាប់កូនចៅគេទៅផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ